बैंकक- अन्तर्राष्ट्रिय तामाङ परिषद् (आइटिसी)मा पहिलोपटक महिला अध्यक्ष निर्वाचित भएकी छन् । थाइल्याण्डको बैंककमा आइतबार सम्पन्न पाँचौं सम्मेलनबाट चम्पाडोल्मा लामा अध्यक्षमा चयन भएकी हुन् । आयोजक राष्ट्र पदेन अध्यक्ष रहने नियमानुसार थाइल्याण्डकी चम्पाडोल्मा अध्यक्ष चयन भएकी हुन् । चम्पाडोल्मा अघि आइटिसीमा पुरुषमात्र अध्यक्ष बनेका थिए ।
सम्मेलनबाट महासचिवमा टासी लामा चयन भएका छन् । नेपालका टासी यसअघि वरिष्ठ उपाध्यक्ष थिए । यसपटक आइटिसीको विधानमा संशोधनसमेत गरिएको छ । योसँगै महासचिवलाई कार्यकारी अधिकार प्राप्त भएको छ ।
‘यसपटक विधान संशोधन भयो, सोहीअनुसार महासचिवलाई कार्यकारी अधिकार दिइएको छ,’ महासचिवमा निर्वाचित लामाले भने, ‘संशोधित विधानअनुसार आइटिसी महासचिव प्रणालीमा गएको हो ।’ अन्तर्राष्ट्रिय मान्यताअनुसार महासचिवलाई कार्यकारी अधिकार दिइएको उनको भनाइ छ । अघिल्लो कार्यकालसम्म अध्यक्ष कार्यकारी भूमिकामा रहने व्यवस्था थियो । निवर्तमान कार्यसमितिमा भारतका केएम तितुङ अध्यक्ष र नेपाल तामाङ घेदुङका अध्यक्ष मोहन गोले महासचिव रहेका थिए ।
आइटिसीले विधान संशोधनसँगै यसपटकदेखि उपाध्यक्ष पद हटाइएको छ । परिषद्को उपमहासचिवमा अमेरिकाका लक्यान लामा, राष्ट्रिय सचिवमा भारतका आरपी तामाङ, सम्बन्ध सचिवमा दक्षिण कोरियाबाट शुभराज तामाङ, महिला सचिवमा रोमानियाबाट बुदुमाया तामाङ र कोषाध्यक्षमा जापानका हवलचन्द्र लामा चयन भएका छन् ।
जेठ २० गतेबाट थाइल्याण्डको राजधानी बैंकक सहरस्थित हुहाइनमा भएको दुईदिने सम्मेलनमा १७ मुलुकका १९ सदस्य संस्थाहरुका तर्फबाट प्रतिनिधि सहभागी भएका थिए । पदाधिकारी रहेकाबाहेक अरु मुलुकका एक–एक जना सदस्य रहने व्यवस्था रहेको छ ।
सम्मेलनले विधान संशोधनलगायत विश्व कार्ययोजना र समसामायिक प्रस्तावहरु समेत पारित गरेको जानकारी दिइएको छ । सम्मेलनमा थाइल्याण्ड, नेपाल, जापान, म्यानमारका प्रतिनिधिहरू नेपाल, भारत, अमेरिका, कोरिया, हङकङ, बहराइन, युएई, पोर्चुगल, रोमनिया, माल्टा, थाइल्याण्ड, बर्मा, जापान, बेल्जियम, मलेसिया, कतार र इटालीका तामाङहरुको सहभागिता रहेको थियो । सन् २००२ डिसेम्बरमा आइटिसीले पहिलो सम्मेलन आयोजना गरेको थियो । यसअघि सम्मेलन नेपाल र भारतमा मात्र हुँदै आएकोमा पहिलोपटक तेस्रो मुलुकमा आयोजना भएको हो ।
प्रकाशित मिति: सोमबार, जेठ २२, २०८० १३:२६
