सांसद, जनताले निर्वाचित गराएर पठाएका जनप्रतिनिधि । जनतालाई ऐन कानुन बनाएर ठेगान लगाउने बहादुर । अहिले त भन्ने हो भने संघीय सरकारका बादशाह । तिनै बादशाह अहिले ‘झोले’ भएको भन्दै सर्वत्र आलोचना भइरहेको छ । संसद्को रोस्ट्रममा बसेर आफ्नो हैसियत नै विर्सिएर संघीय सांसद भन्दै छन्, ‘हामी त झोले, त्यही भएर साँझ झोल खाएकाहरुले फोन गरेर थर्काउँछन्, त्यसैले हामी झोलेहरुलाई बालेनले ठीक गरे वडाध्यक्षभन्दा पनि तल बनाइदिए ।’
यस्तै–यस्तै रोदन चलिरहेको छ संघीय संसद् नाट्यशालामा । आखिर दशकौंदेखि गाईजात्रा अभिनय गर्दै आइरहेको नाट्यशालामा जनतासँग भक्कानिनु सांसदको भाग्य नै हो । कम्तीमा संसद्मा बसेर आफूहरु हुतिहारा भएको प्रमाणित त गर्दै छन् ।
पिएचडीधारी अर्थमन्त्रीले ल्याएको बजेटमा संघीय सांसदहरुलाई पाँच करोड छुट्याइदिए गरिखा भनेर । त्यो पनि सांसद विकास कोषमार्फत, जुन विगतमा खारेज नै भइसकेको थियो । त्यही भएर होला महानगरका मेयर बालेन्द्र (बालेन) साहले एक झट्का सामाजिक सञ्जालमा के दिएका थिए । नाट्यशालामा सुरु भैगो आफूहरु साँच्चै नै झोले भएको बयान ।
बालेन साह । लरोतरो कहाँ हुन् र ? युवा पुस्ताको मनमा बसेका । युवा पुस्ताले काँधमा बोकेका । विश्वभरका नेपालीले स्वीकार गरेका । पहिले चुनाव लडिरहँदा त्यसै गीत गाका थिए र– ‘लौरो टेकौला, भेटौला बालेन दाइ दुःख बिसौंला’ । भेटौला नभेटौला फरक कुरा होला । दुख बिसाउ वा नविसाउ त्यो पनि समयको खेला होला ? तर बेला बेलामा दिने दनकले सेतोघरभित्र बसेका झोलेहरुलाई भने राम्रै छनक मिलेको भने छ ।
बालेनले त्यसै वडाध्यक्ष बन्नुभएकोमा धन्यवाद सांसद भनेको हो र ? वार्षिक पाँच करोड लिनका लागि बन्द भइसकेको सांसद विकास कोष पुनः खडा गर्न लगाए । पाँच करोड लिनकै लागि सांसद बन्नुभन्दा त महागरको वडाध्यक्ष नै भएको भए बरु १० करोड पाउँथ्यो नि भनेको होला नि ।
महानगरका वडाध्यक्षलाई मेयर बालेनले वार्षिक १० करोड दिएका छन् । यो वर्ष अझै बढ्ने संकेत देखे अनि भने सांसदज्यू वडाध्यक्ष भएकोमा बधाई ! कहाँको हिरा, कहाँको झुसिल्किरा । ठीकै पनि हो । बालेनजस्तो व्यक्ति जसले साँच्चिकै काम गर्न खोजेका छन् । भारतले उता अखण्ड भारतको नक्सा टाँस्यो । यता बालेनले ग्रेटर नेपाल टाँसिदिए । त्यही आँट झोले सांसदहरुलाई किन आएन ? किनकि आफैंले आफैंलाई झोले सांसद भन्ने झोलेहरु त बिके त्यसकारण आफ्नो मनमा लागे पनि खुसुक्क झिके बोल्न सकेनन् ।
एउटा मेयरले भारतलाई चुनौती दिए तर सांसदले त के सरकार पनि चुइक्कसमेत बोलेन । आखिर चोरको खुट्टा काट भन्दा उचालेको जस्तो भइगो नि ! बरु २५० वर्षअघि साँच्चै ‘ग्रेटर नेपाल’ बनाएका पृथ्वीनारायण शाहले दूरदर्शी राजाका पगरीमात्र लिएनन् । साँच्चै दूरदर्शी दिव्योपदेश दिएर गएका रैछन् ।
विदेशीलाई तराईबाट माथि नल्याउनू, तिनीहरुले देश बिगार्छन् । साहले जे भने अहिले त्यही भइरहेको छ । नेपालका लागि विदेशी फिरंगीहरुले भद्रगोल गरिदिएका छन् । त्यही भएर होला सांसदहरु आफैंले आफैंलाई झोले भनेका । कसैले चीनको झोला बोके, कसैले भारतको झोला वोक्थे । अहिले झोले सांसदहरुको पनि बढुवा भएको छ । शान बढेको छ । अहिले त भारत चीनको थोरै झोला बोकेर अन्तै सल्केका छन् ।
अहिले बालेन साहको कुरा गर्दा पृथ्वीनारायण शाहको कुरा किन आयो भन्ने पनि लाग्ला । तर, खास कुरा के हो भने अहिले बालेनले छलाङ मारिरहेका छन् उबेला पृथ्वीनारायण शाहले मारेका थिए । भारतसँगको सम्बन्ध अहिले बालेनले झट्का लगाइदिएका छन् । त्यसबेला पृथ्वीनारायणले भनेका थिए नि, ‘यो राज्य दुई ढुंगाबीचको तरुल हो । उत्तरको चीन बादशाहसित ठूलो साइनो जोड्नु, दक्षिणको समुद्रका बादशाहसित पनि सम्वन्ध त राख्नु तर त्यो महाचतुर छ’ ।
हुन पनि अलि अलि चतुर हो र निकै नै चतुर अहिले अखण्ड भारत भनेर अर्काको देशलाई आफ्नो देशका गाभ्ने ? त्यो भन्दा महाचतुर के होला र ! त्यस्तो चतुर भारतलाई सातो उडाउने खोज्ने बालेनले सांसदलाई वडाध्यक्षमा झारिदिएपछि यिनको हैसियत त उही झोले नै हो बरु अहिले अलि महँगा झोले भएका छन् । अलि महँगो सल्काइ छ झोलेहरुको ! उत्तर दक्षिणबाट युरोप अमेरिका नै पुग्न लागेका छन् । केही–केही झोलेहरु त अमेरिका र युरोपियन युनियनको झोला बोकिसकेका छन् । त्यसैले पनि यिनी भष्मासुरहरु सत्य त बोल्दै बोल्दैनन् ।
बालेनले ग्रेटर नेपाल टाँस्यो भनेर हल्लीखल्ली मच्चाउने र बालेनलाई असफल बनाउने रणनीति पनि हो । यिनीहरुले आ–आफ्नो स्वार्थपूर्तिका लागि जे पनि गर्न तयार हुन्छन् । त्यसैले बालेनले जे गरे, जे भने ठीक गरे । आँट छ र पो गरे । आँट नहुने झोलेहरु त बर्वर आँशु झार्छन् । आँट हुने बालेनले आफ्ना वडाध्यक्षलाई १० करोड दिए ।
ग्रेटर नेपाल सिंहदरबारमा टाँसिनुपर्दथ्यो तर उनीेहरुले सकेनन् । बालेनले टाँसे । बालेनले किन टाँसे भने फेरि झोलेहरुले अर्को झोला वोक्नका लागि तयारी पो गर्दै छन् । विचरा झोले सांसदहरु आफ्ना नेताहरुको भनेको मानेर बालेनले जसरी नक्सा टाँस गर्न नसके पनि उनैलाई गाली गर्दै हामी त झोले सांसद बरु बालेनले ठीक गर्यो भन्दै छन् ।
बालेनले अब यिनीहरुको दोहोलो काटलान् । सत्य धेरो धर्म । झोलेहरुले झोला बोक्नेभन्दा अरु केही नै गर्न सक्दैनन् । झोलेहरुको अत्तोपत्तो छैन । बालेनले त पाँच वर्ष ढुक्कसँग झोलेहरुलाई तह लगाउने कार्यमा सक्रिय हुने छन् ।
प्रकाशित मिति: मंगलबार, जेठ ३०, २०८० ०८:४३
