काभ्रेपलाञ्चोक–प्रधानमन्त्री केपी शर्मा ओलीले सरकार महिला र पिछडिएका समुदायको उत्थान, रोजगारी र युवालाई विदेशप्रति विकर्षणका कार्यक्रम ल्याइएको जानकारी गराएका छन् ।
धुलिखेल नगरपालिकाको ३४औँ स्थापना दिवसको अवसरमा उनले सो जानकारी गराएका हुन् । उनले हाम्रा प्रतिभा, श्रम–सामथ्र्य बाहिर नजाऊन् भन्नका लागि सीपयुक्त बनाएर दक्ष जनशक्तिमा परिणत गर्ने पनि प्रण गरे । उनले शिक्षालाई जीवनसँग जोडेर जीवनयोपयोगी बनाउने प्राविधिक र ज्ञानमूलक शिक्षा नागरिकमा पुर्याउने काम भईरहेको पनि बताए ।
उनले सरकार ‘डिजिटल नेपाल’ बनाउने महाअभियानमा रहेको बताउँदै भने, ‘डिजिटल नेपालका लागि विकास र सेवाका क्षेत्रमा आधुनिक प्रविधि प्रयोग गर्ने नीति लिइएको छ ।’
उनले डिजिटल नेपालका लागि विकास र सेवाका हरेक क्षेत्रमा आधुनिक प्रविधि कार्यान्वयन गर्दै अघि बढिरहेको र फोरजी सेवा पनि सबै जिल्लामा पुगिसकेको जनाउँदै हरेक दिन हामी युगान्तकारी काम गरिरहेका जनाए ।
उनले हाल ८८ प्रतिशतभन्दा बढी जनतामा विद्युत् पहुँच पुगिसकेको उल्लेख गर्दै अबको दुई वर्षभित्र बाँकी १२ प्रतिशतलाई विद्युत् सेवा पुर्याइसक्ने र स्मार्ट मिटर जडान गरिसक्ने बताए ।
प्रधानमन्त्री ओलीले एक गाउँमा मात्रै नभएर सबै गाउँमा विकास गर्ने आफुहरूको लक्ष्य रहेको बताए । उनले विकासको लागी बाटो अनिवार्य भएकोले सरकारले सुरुङ बाटोलाई प्राथमिकतामा राखेको जनाए । उनले कोटेश्वरको जाम हटाउन ‘अण्डरग्राउण्ड रोड’ बनाइने जानकारी पनि दिए ।
प्रधानमन्त्री ओलीले सोमबारबाट काठमाडौंमा टेलिफोनका तार जमीनमुनिबाट पाइपबाट लैजाने कामको शुरुआत भएको जानकारी गर्दै जमीनमा खनेर धुलो र खाल्डा बनाउनुपर्ने कामको अन्त्य भएको पनि बताए ।
प्रधानमन्त्रि ओलीले सरकारले सडक बालबालिका र सडक मानव कहीँ पनि रहन नदिने बताउँदै हाल धेरै व्यवस्थापन गरिसकिएको जानकारी गराए ।
उनले एक सय वर्षदेखि दक्षिण एशियाको सबैभन्दा पहिलो बिजुली उत्पादन गर्ने नेपाल ५०० मेगावाटभन्दा कम उत्पादन गरेर बसेकामा दुई वर्षमा हजार मेगावाट नघाइएको जानकारी गराए । उनले हाल अलिअलि विद्युत् निर्यात गर्ने गरेको जनाउँदै अर्को वर्षदेखि निर्यात बढाइँदै लगिने बताए ।
कार्यक्रममा सञ्चार तथा सूचना प्रविधि एवं शहरी विकासमन्त्री गोकुलप्रसाद बाँस्कोटा, खानेपानीमन्त्री विना मगर, नगरप्रमुख अशोक व्याञ्जू श्रेष्ठले आगामी २० वर्षमा नेपालकै उत्कृष्ट नमूना नगर हुने गरी काम अघि बढाइएको जानकारी गराएका छन् ।
सो अवसरमा प्रधानमन्त्री ओलीले विभिन्न विधामा उत्कृष्ट जिल्लाका व्यक्तित्वलाई सम्मान गरेका थिए ।
