- पछिल्लोपटक आरजुमाथि अनुसन्धान फेरि सोझिनु कांग्रेस सभापति देउवालाई थप अप्ठेरो पार्नु भएको बताइएको छ
- कांग्रेस महामन्त्री गगन थापाले कांग्रेसभित्रका असन्तुष्टि निरन्तर पोख्न थालेको घटनाबाट देउवा झनै अप्ठेरोमा
- पछिल्लोपटक नेपाली राजनीतिमा अमेरिकी चासो बढ्न थालेको कांग्रेस नेता डा. नारायण खड्काबाटै पुष्टि
काठमाडौं- नेपाली राजनीतिको आवरण हेर्दा शेरबहादुर देउवा नेपाली कांग्रेसका सभापतिमात्र हैनन्, सत्ताको हर्ताकर्तासमेत हुन् । प्रधानमन्त्री पुष्पकमल दाहाललाई छेउकुना गर्ने शक्ति भएका देउवा अहिले निकै आपत्मा परेका चर्चा चल्न थालेको छ । आफ्ना विश्वासपात्र बालकृष्ण खाण पक्राउ परेयता देउवा राजनीतिक गतिविधिमा खासै खुलेर लागेको देखिँदैन ।
नेपालीलाई नक्कली भुटानी शरणार्थी बनाएर अमेरिका पठाउने प्रकरणमा खाण अहिले जेलमा छन् । देउवानिकट कांग्रेस नेता आङटावा शेर्पा पनि जेलमै छन् । अरु अभियुक्तसहित दुवै कांग्रेस नेता पूर्पक्षका लागि थुनामा पर्दा हरेक दिन खाण पक्षधर नेताहरु धुम्बाराहीस्थित देउवानिवास धाउँछन्, खाणलाई छुटाउन खबरदारी गर्छन् ।
त्यही कारणले होला केन्द्रीय सदस्यसमेत रहेका खाणलाई देउवाले अहिलेसम्म कारबाहीको डण्डा चलाउन सकेका छन् । खाण पक्राउ परेपछि प्रश्नबाट बच्न देउवाले लामो समय केन्द्रीय समितिसमेत स्थगित गरे । अन्ततः दुई महिनामा एकपटक बस्नुपर्ने वैधानिक बाध्यता भएको कांग्रेस केन्द्रीय समिति भदौपछि पहिलोपटक भोलि बुधबार बस्दै छ ।
आरजुमाथि आक्रमण
शरणार्थी प्रकरणमा कांग्रेसका खाण र शेर्पामात्र हैनन्, बालकृष्णपत्नी मञ्जु र देउवापत्नी आरजु राणा देउवाको नाम पछि जोडिएको छ । यो प्रकरणमा आरजुलाई पैसा दिएको भन्दै पक्राउ परेका सन्देश शर्माले बयान दिएका थिए । आरजुले अडियो ‘फेक’ भन्दै नेपाल प्रहरीको साइबर ब्युरोमा निवेदन दिँदा बालबाल बचेकी थिइन्, अनुसन्धानबाट । तर, उक्त स्वर सन्देश शर्माकै भएको पुष्टि प्रहरीले गरेको छ ।
भुटानी शरणार्थी प्रकरणमा पक्राउ परेर थुनामा रहेका दाङका शर्मा ठगी तथा संगठित अपराध कसूर मुद्दामा अनुसन्धानका लागि थुनामा छन् । त्यही निवेदनमाथि अनुसन्धान गर्दा त्यो अडियो शर्माको आवाजसँग मिलेको आइतबारमात्र नेपाल प्रहरीका प्रवक्ता कुवेर कडायतले जानकारी दिएका हुन् । सोमबार आरजुले उक्त स्वर सन्देशकै भएको स्विकारेकी छन् ।
‘त्यो मान्छे केसमा मुछिएको मान्छे हो । तर उसले भनेको बयान गलत हो,’ प्रतिनिधिसभाको बैठकपछि सञ्चारकर्मीसँग कुराकानी गर्दै आरजुले आफू चोखै रहेको दाबी गरिन् । मञ्जु खाण लामो समय फरार रहेपछि सदनमा उपस्थित भएकी थिइन् । पछिल्लोपटक आरजुमाथि अनुसन्धान सोझिनु कांग्रेस सभापति देउवालाई थप अप्ठेरो पार्नु भएको बताइएको छ ।
केही समयअघि भ्रष्टाचार काण्डमै जेल परेर अहिले साधारण जीवन बिताइरहेको जेपी गुप्ताले प्रधानमन्त्री दाहालको टार्गेटमा आरजु पर्नसक्ने बताएका थिए । खाण पक्राउपछि गुप्ताले भनेका थिए, ‘देउवाले यसरी पुलपुलाएको व्यक्ति अथवा ठाउँ दिएको व्यक्तिलाई कारबाहीको प्रक्रियामा तान्नु भनेको अनुसन्धान तार्किक निष्कर्षतिर जाँदै छ भन्न सकिने आधार हो । अब दाहालसँग देउवाले ‘कम्प्रोमाइज’ गर्नुपर्ने अवस्था आउनसक्छ । किनभने, दाहालको हात शेरबहादुरको भान्साघरमा पुगिसकेको छ । भान्साघरमा छिर्नमात्र बाँकी छ ।’ भान्साघर भनेर गुप्ताले आरजुतिर लक्षित गरेका थिए ।
बढ्दो अमेरिकी चासो
देउवालाई थप कमजोर पार्न अहिले उनका अर्को विश्वासी ज्ञानेन्द्रबहादुर कार्कीलाईसमेत प्रहार गर्ने तयारी भइरहेको चर्चा चल्न थालेको छ । अमेरिकाबाट १३ लाख डलर भित्र्याएका पृथ्वीबहादुर सिंह अहिले कारागारमा छन् । यही प्रकरणमा कार्कीलाईसमेत तान्ने तयारी भइरहेको चर्चा राजनीतिक वृत्तमा छ । पछिल्लोपटक नेपाली राजनीतिमा अमेरिकी चासो बढ्न थालेको कांग्रेस नेता तथा सांसद डा.नारायण खड्काले पुष्टि गरेका छन् ।
सोमबार बसेको अन्तर्राष्ट्रिय सम्बन्ध र पर्यटन समितिको बैठकमा खड्काले नेपालमा युरोप र अमरिकाको चासो बढिरहेको बताए । यस्तो अवस्थामा राष्ट्रिय एकताको रुपमा परराष्ट्र नीतिहरु अघि बढाउन जरुरी रहेको खड्काले बताए । उनले पररराष्ट्र मन्त्रालयले प्रत्येक दुई हप्तामा परराष्ट्र सम्बन्धित गतिविधिलाई जानकारी गराउनुपर्ने बताए । यसो त राजनीतिक बेमेलका कारण अहिले काठमाडौंमा चिनियाँ गतिविधि पनि बढ्दो छ । सांसद खड्काले छिमेकी देशहरु चीन र भारतसँग सम्बन्ध नबिगारीकन अन्य देशसँगको सम्बन्ध बिस्तार गर्नुपर्ने सुझाव दिएका छन् ।
गगन झन् गर्जिंदै
पछिल्ला दिनहरुमा कांग्रेस महामन्त्री गगन थापाले कांग्रेसभित्रको असन्तुष्टि पोख्न थालेका छन् । त्यस्तै परे संसदीय दलको नेताबाट देउवालाई हटाउन सकिने चेतावनीसमेत थापाले दिएका छन् । शनिबार बूढानीलकण्ठ पुगेर थापाले देउवाविरुद्ध उक्त चेतावनी दिएका हुन् ।
‘नेपाली कांग्रेसबाट भूतपूर्व भएको प्रधानमन्त्री कांग्रेसले पछि प्रधानमन्त्री बनाउन पाएको बेलामा बन्नुहुँदैन, त्यस कारणले गर्दा फेरि कांग्रेसको संसदीय दलको नेता बदल्ने कुरामा म लाग्छु । सके बदल्छु बदल्छु । त्यसलाई बदल्छु सके आफू बन्छु, नसके अरुलाई बनाउँछु तर बदल्नुपर्छ भन्नेमा छु,’ थापाले भनेका थिए ।
अमेरिकी परियोजना एमसिसीमा व्याख्यात्मक विश्लेष्णको प्रचार गरेका थापालाई अमेरिकानिकट नेता मानिन्छन् । त्यसो त देउवा पनि अमेरिका निकट नेता नै हुन् । देउवाले पछिल्लोपटक अमेरिकी चासोका विषयमा सुन्न छाडेकोले उनलाई पाखा लगाएर गगन अघि सार्ने अमेरिकी तयारी रहेको चर्चासमेत चल्न थालेको छ ।
अन्तिम चेतावनीका लागि अमेरिकाले देउवालाई सिंगापुरमा बोलाएको र उपचारको बहानामा उनी त्यसतर्फ जेठ ३१ गते लागेका थिए । एक हप्ताका लागि भनेर सिंगापुर पुगेका देउवा जोडी झन्डै दुइ हप्तापछि स्वदेश फर्केका थिए । त्यसयता देउवा सार्वजनिक कार्यक्रममा बिरलै देखिन थालेका छन् । आफ्नो पार्टीको जिल्ला सभापतिहरु भेला भएको बैठकमासमेत देउवा बिहीबार र शुक्रबार सानेपा पुगेनन् ।
यसलाई कतिपयले देउवाविरुद्ध गगनका विद्रोहको रुपमासमेत चर्चा गर्न थलिएको छ । देउवा साँच्चै अप्ठेरोमा परेका हुन् कि हैनन् भन्ने बारे थाह पाउन भने राजनीतिक चलखेलको केही पर्दा खुल्नैपर्ला । त्यसका लागि केही समय अझै लाग्ने बताइन्छ ।
