काठमाडाैं- वरिष्ठ नृत्यनिर्देशक जोगेन्द्र केसी ‘राष्ट्रिय तथा प्रादेशिक प्रतिभा पुरस्कार २०७९’ बाट पुरस्कृत भएका छन् । संस्कृति, पर्यटन तथा नागरिक उड्डयन मन्त्रालयले प्रदान गर्ने उक्त पुरस्कार अन्र्तगत संगीत तथा नाट्य विधा तर्फ केसीले लुम्विनी प्रदेशबाट प्रादेशिक प्रतिभा पुरस्कार प्राप्त गरेका हुन् ।
भानु जयन्तीको अवसर पारी शुक्रबार राजधानीको नेपाल प्रज्ञा प्रतिष्ठानमा आयोजित एक समारोहका विच संस्कृति, पर्यटन तथा नागरिक उड्डयन मन्त्री सुदन किरातीले नृत्यनिर्देशक केसीलाई उक्त पुरस्कारबाट पुरस्कृत गरेका हुन् ।
उक्त पुरस्कारको राशी ५० हजार रुपैयाँ रहेको छ । नेपाली मौलिक नृत्यलाई लोप हुन नदिन केसीको योगदान महत्वपूर्ण छ । उनले नेपाल सहित विश्वका विभिन्न देशमा गएर मौलिक नृत्य प्रस्तुत गर्नुका साथै नेपाली कला, संस्कार र संस्कृतिको प्रचार गर्दै साँस्कृतिक पर्यटन प्रवद्र्धनमा समेत महत्वपूर्ण योगदान दिदै आएका छन् ।
राष्ट्रिय जीवनका विविध क्षेत्रमा आ–आफ्नो तर्फबाट विशिष्ठ योगदान पु¥याएका प्रतिभालाई पुरस्कृत गर्ने हेतुले २०५० देखि यो पुरस्कारको स्थापना भएको हो । मन्त्रालयका अनुसार राष्ट्रिय तथा प्रादेशिक प्रतिभा पुरस्कार कार्यविधि २०७४ अन्र्तगत रही पुरस्कृत व्यक्तित्वहरुको छनौट गरिएको हो ।
भाषा एवम् साहित्य, संस्कृति, संगीत तथा नाट्य र ललितकला गरि चार विधामा विभिन्न सष्टा तथा सर्जकहरुलाई ‘राष्ट्रिय तथा प्रादेशिक प्रतिभा पुरस्कार २०७९’ प्रदान गरिएको हो ।
लुम्विनी प्रदेशका केसीसँगै कोशी प्रदेशका शेखर चापागाई, मधेश प्रदेशका सुनिल मल्लिक, बाग्मती प्रदेशका भुवनदास श्रेष्ठ, गण्डकी प्रदेशका खिम बहादुर गौतम, कर्णली प्रदेशका फुलमाया दर्जी र सुदुरपश्चिम प्रदेशका डम्बर बहादुर रोकाया पनि संगीत तथा नाट्य विधा तर्फ प्रादेशिक प्रतिभा पुरस्कारबाट पुरस्कृत भएका छन् ।
सोही कार्यक्रममा महाकवि देवकोटा पुरस्कार, भगतसर्वजित मानव मर्यादा राष्ट्रिय पुरस्कार, गोपालप्रसाद रिमाल राष्ट्रिय पुरस्कार, इतिहास शिरोमणि बाबुराम आचार्य पुरस्कार, आदिकवि भानुभक्त राष्ट्रिय पुरस्कार, योगमाया राष्ट्रिय पुरस्कार, युगकवि सिद्धिचरण श्रेष्ठ राष्ट्रिय पुरस्कार र शताब्दी पुरुष सत्यमोहन जोशी राष्ट्रिय पुरस्कारबाट विभिन्न सष्ट्रा तथा सर्जकहरुलाई पुरस्कृत गरिएको थियो ।
