काठमाडौं– मंगलबार कांग्रेस केन्द्रीय समिति बैठकमा ‘ब्रेक’ लाग्यो । कारण, साउन २ बाट जारी बैठकको मैझारो र निर्णय तय गर्न पदाधिकारीको बैठकका लागि । पदाधिकारी बैठक मंगलबार साँझ कांग्रेस सभापति शेरबहादुर देउवाको निवासमा तय भएको थियो । यही मौका पारी कांग्रेस केन्द्रीय सदस्य डा. शशांक कोइरालाले चियापान आयोजना गरे भने डा. शेखर कोइरालले ‘गुटभेला’ ।
लैनचौरस्थित लैनचौर बैंक्वेटमा आयोजित शशांकको चियापानमा सभापति शेरबहादुर देउवादेखि महामन्त्री गगन थापासम्म ओइरिए । बिहान १० बजे आयोजना गरिएको चियापान ‘पार्टी एक छ’ भन्ने सन्देश दिन रहेको शशांकले जनाए । चियापानमा कार्यवाहक प्रधानमन्त्रीसमेत रहेका उपसभापति पूर्णबहादुर खड्का, कानुनमन्त्रीसमेत रहेका उपसभापति धनराज गुरुङलगायत अधिकांश मन्त्री र केन्द्रीय सदस्यहरु उपस्थित भए ।
पार्टीको केन्द्रीय समितिमा देउवापछि आफू नै जितको ‘रेकर्डधारी’ रहेको दाबी गरेकै दिन शशांकले चियापानको निम्तो दिएका थिए । शशांकले आफूले चार–चार पटक निर्वाचन जितेको र यस्तो रेकर्ड देउवाबाहेक अरुसँग नरहेको दाबी पेस गरेका थिए । ‘मेरो क्षेत्रमा हेर्नुस् नेपालमा कति जनाले चारपटक जिते ? मेरो विचारमा एक जना शेरबहादुर देउवा हो । अरू कोही छन् ? दोस्रो म हो । लगातार जितेको भनेको,’ शशांकले भनेका थिए ।
शशांकको भनाइ अबको सभापतिमा आफ्नो दाबी भएकोतिर लक्षित थियो । कांग्रेसमा अहिले सबैभन्दा बलिया देखिन्छन् सभापति देउवा । तर, बलिया उत्तराधिकारी नहुँदा देउवा कसलाई ‘प्रोसेसर’ बनाउने भन्दै लागिपरेका छन् । यही मेसोमा कतिपयले डा. शेखर कोइरालालाई उत्तराधिकारीका रुपमा हेर्छन् । त्यसैले होला देउवाका कटु आलोचक शेखर अहिले नेतृत्वविरुद्ध मौन छन् । ‘एकैपटक, यसैपटक’ नाराका साथ १४औं महाधिवेशनमा उत्रिएका शेखर अहिले फेरि १५औं महाधिवेशनमा सभापतिको प्रत्यासी बन्ने अभियानमा छन् । कांग्रेस वृत्तमा शेखर देउवाको उत्तराधिकारी चर्चा बन्ने चर्चा चलेकै बेला शशांकले गरेको चियापानलाई अर्थपूर्ण रुपमा हेरिएको छ ।
लैनचौरमा देखिएनन् विश्व
आइतबार नै सानेपामा चियापानको निम्तो बाँडिएको थियो । ‘आदरणीय साथीहरु नेपाली कांग्रेसका नेता डा. शशांक कोइरालाले पर्सी बिहान ९ गते बिहान ९ बजे चियापानका लागि निम्तो गर्नुभएको छ । स्थान लैनचौर बैंक्वेट,’ बैठक सकिनसाथ महामन्त्री विश्वप्रकाश शर्माले चियापानको निम्तो दिएका थिए । तर, अधिकांश नेता देखिँदा निम्ता दिने महामन्त्री विश्वप्रकाश भने चियापानमा देखिएनन् ।
शेखरको ‘गुटभेला’
नेपाली कांग्रेसका पूर्वजिल्ला सभापतिहरुले केन्द्रीय समिति बैठक ‘ब्रेक’ भएको अवसर पारी संस्थापनइतरको ‘गुटभेला’ आयोजना गरे । मंगलबार बत्तीसपुतलीस्थित अनुपम फुडल्याण्डमा डा. शेखर कोइराला र महामन्त्री गगन थापाको उपस्थितिमा भेला तय भएको थियो ।
कार्यक्रममा कानुनमन्त्रीसमेत रहेका उपसभापति धनराज गुरुङले अर्कोपटक सभापति शेखर बन्ने ठोकुवा गरे । ‘अहिले नै पार्टी सभापति बदल्नुपर्छ भन्ने चाहन्न । तर १५औं महाधिवेशनमा पार्टी सभापति बदल्ने हो,’ उनले भने । त्यो बेला शेखरलाई उम्मेदवार बनाउनेमात्र होइन, सभापतिमा स्थापित गर्ने उनको दाबी छ ।
कार्यक्रममा प्रमु्ख अतिथिका रुपमा उपस्थित शेखरले निर्वाचन प्रणाली परिवर्तन गर्नुपर्ने बताए । वर्तमान निर्वाचन प्रणालीबाट एक दलले बहुमत ल्याउन नसक्ने भएकाले विकल्प खोज्नुपर्ने उनको धारणा थियो । ‘यस्तो निर्वाचन प्रणाली बनाएका छौं, बहुमतको सरकार बनाउन सम्भव नै छैन । प्रत्यक्ष निर्वाचनबाट समानुपातिक चरित्रको निर्वाचन गर्न सक्दैनौं र ?,’ शेखरले प्रश्न गरे । प्रत्यक्ष निर्वाचनमार्फत नै समानुपातिक र समावेशी बनाउन सकिने विकल्प प्रस्तुत गर्दै उनले भने, ‘यही निर्वाचन प्रणालीबाट गठबन्धनमा त जानै पर्दछ । चुनावअघि गठबन्धन होइन, चुनावपछि गठबन्धन गर्ने गरी एक्लै चुनाव लड्न सक्छौं भन्ने आँट अहिलेदेखि गरौं ।’
देखिएनन् गगन
कार्यक्रममा महामन्त्री थापालाई पनि निम्ता गरिएको थियो । तर, कार्यक्रमको अन्तिम समयसम्म महामन्त्री थापा देखिएनन् । डा. शेखर बोल्ने पालो आएपछि कार्यक्रम सञ्चालकसमेत रहेका नुवाकोट कांग्रेसका पूर्वसभापति जगदीश्वर नरसिंह केसीले व्यस्तताले थापा आउन नपाएको जानकारी दिए ।
त्यसपछि प्रमुख अतिथिका रुपमा उपस्थित शेखरले आफ्नो मन्तव्य सुरु गरे । उनले थापा नआउनुका कारण आफूलाई पनि थाहा नभएको बताए । ‘गगनजी किन आउनुभएन भन्ने पनि होला । गगनजी र म बसेरै छलफल भएको हो कार्यक्रमका लागि,’ शेखरले भने, ‘फोन पनि लागेन । फोन पनि स्वीच अफ छ उहाँको ।’
१४औं महाधिवेशनमा एकै समूहबाट होमिएका शेखर र गगनबीच पछिल्लो समय टकराव बढ्न थालेको छ । गगन एक्लै गुट निर्माणतिर लाग्दा शेखर भने देउवातिर ढल्केका छन् । दुई नेताको तीक्तता साम्य पार्न कार्यक्रम आयोजना गरे पनि गगन नआएपछि कार्यक्रममा उनको खोजी भएको थियो ।
