कास्की- एसियाली खेलकुदको सर्वोच्च प्रतियोगिता एशियाली खेलकुद(एसियाड) को १९ औँ संस्करण आगामी असोज ६ देखी २३ गतेसम्म मित्रराष्ट्र चीनको हाङझावमा हुँदैछ । हरेक चार वर्षमा हुने यस प्रतियोगितामा एसिया महादेशका राष्ट्रहरुले प्रतिस्पर्धा गर्दछन् । नेपालले पनि प्रतियोगिताका विभिन्न २९ खेलहरुमा सहभागिता जनाउँदैछ । त्यसमध्ये महिला ह्याण्डबल पनि हो ।
नेपाली महिला ह्याण्डबल टोलीले पहिलोपटक एसियाली खेलकुदमा ‘डेब्यु’ गर्दैछ । त्यसैले पहिलो सहभागितालाई स्मरणीय बनाउनका लागि नेपाली टोलीले पर्यटकीय शहर पोखरामा साउन पहिलो सातादेखी बन्द प्रशिक्षण गरिरहेको छ ।पोखरा रङ्गशालाभित्रको बहुउद्धेश्शीय कभर्ड हलमा नेपाली टोलीका १६ खेलाडी अभ्यासरत छन् । देशका अन्य स्थानमा भन्दा पोखराको बसाई उनीहरुका लागि सुखद् छ ।
खेल पूर्वाधार र यहाँको वातावरणबाट खेलाडी प्रभावित बनेका छन् । यहाँको प्रशिक्षणले एसियाली खेलकुदको पहिलो सहभागितामा राम्रो प्रभाव पार्न सकिनेमा खेलाडी र प्रशिक्षक आशावादी छन् ।यसअघि विसं २०७६ मा पोखरामा सम्पन्न १३ औँ दक्षिण एशियाली खेलकुदमा नेपाल उपविजेता बनेको थियो । तर एशियाडमा भाग लिने टोली उच्चस्तरका छन् । आयोजक राष्ट्र चीन, जापान, हङकङ, भारत लगायतका देशहरुसँग भिड्दा नेपाली टोली उच्च मनोवलका साथ मैदानमा उत्रिने छ ।
नेपाली महिला ह्याण्डबल टोलीका उपकप्तान उमा राइले एशियाडका लागि टोलीका सबै सदस्यहरु उत्साहित रहेको बताए ।हरेक खेलाडीको सपना प्रतियोगितामा पदकको हुने भएपनि पहिलो सहभागिता र अन्य देशहरु बलियो रहेकाले आफूहरुले सक्दो मिहिनेत गरेर राम्रो प्रदर्शन गर्ने राई बताए ।
उनले भने,“पोखराको वातावरणमा राम्रोसँग अभ्यास गरिरहेका छौँ । मेडल ल्याउने कोसिस गर्नेछौ, नसकेपनि प्रदर्शन राम्रो गर्दै राम्रो स्थान हासिल गर्नेछौँ । टिम गेम हो,एक जनाले मात्र राम्रो गरेर पनि हुँदैन । सबै जनाले आफ्नो तर्फबाट राम्रो गर्नेछौँ ।”
नेपाली टोलीमा अधिकाँस नयाँ खेलाडी छन् । उनीहरुलाई प्रतियोगिता अनुभव कम छ । राम्रो टोलीसँग अभ्यास गर्ने, वैदेशिक प्रशिक्षण लगायतको अपेक्षा खेलाडीको रहेपनि मौका पाएका छैनन् । पोखरामा बन्द प्रशिक्षणमा रहेको टोलीले हप्तामा एक दिन यहाँको कास्की जिल्ला ह्याण्डबल संघको पुरुष टोलीले अभ्यास खेल खेल्ने गरेको छ ।
“बाहिरको राम्रो खेलाडीसँग मैत्रीपूर्ण खेलबाट अनुभव बुटल्न चाहन्छौँ तर मिलेको छैन । नयाँ बहिनीहरु टोलीमा छन्, थोरै खेल खेलेर अहिले राष्ट्रिय टोलीमा स्थान बनाएका खेलाडीहरुलाई अनुभव आवश्यक पर्दछ तर खेलको अनुभव गर्न पाइएको छैन ।”उपकप्तान राईले भने ।
नेपाली टोली सागको तयारीका लागि थाइल्याण्डमा गएर अभ्यास गरेको थियो । तर यसपटक वैदेशिक अभ्यासको व्यवस्था नहुँदा स्थानीय टोलीसँग खेल्न उनीहरु बाध्य छन् । पोखराको बन्द प्रशिक्षणबाट भने खेलाडी उत्साहित छन् । विगतका तुलनामा राम्रो अभ्यासस्थल, हल, म्याट लगायतका खेल सामग्रीको उपलब्धताले खेलाडी खुशी छन् ।
आयोजक चीन, जापान, हङकङ, भारत लगायतका शक्तिशाली देशसँग नेपालले खेल्नुपर्नेछ । एसियाडमा नेपालको प्रदर्शन कस्तो रहला भन्नेमा नेपाली टोलीका प्रशिक्षक समेत निश्चिन्त हुनुहुन्न । टोलीलाई म्याच अनुभव नभएकाले खेलाडीको प्रदर्शन त्यहाँ गएर कस्तो होला भन्ने कौतुहलता प्रशिक्षकलाई पनि छ ।
नेपाली राष्ट्रिय महिला ह्याण्डबल टोलीका प्रशिक्षक विन्दा थापाले प्रतियोगितामा खेलाडीको प्रदर्शन त्यही गएर हेरेपछि मात्र थाहा हुने बताए । प्रतियोगितामा पहिलो सहभागिताले खेलाडी उत्साहित भएको र महिला ह्याण्डबल अन्तर्राष्ट्रिय खेलकुदमा प्रवेश गरेको उनले बताए।
वैदेशिक प्रशिक्षणले खेलाडीको आत्मवल बढाउने भएपनि त्यो सम्भव नभएको प्रशिक्षकको भनाई छ । “बाहिर लान पाएको भए राम्रो हुने थियो । खेलाडीले बाहिर गएर खेल्दा अनुभव बटुल्न पाउथे तर यसपटक त्यो अवसर मिलेन तर खेलाडी प्रतियोगितालाई लिएर उत्साहित छन् ।” प्रशिक्षक थापाले भने । एसियाली खेलकुदमा नेपालले आफ्नो पहिलो खेल आयोजक चीनसँग खेल्नेछ । त्यसैगरी जापान, हङकङ र भारतसँग पनि नेपालले खेल्नेछ ।
महिला ह्याण्डबल टोलीमा १६ खेलाडी र दुई प्रशिक्षक रहेका छन् । खेलाडीहरुमा बन्दना राई(कप्तान), उमा राई(उपकप्तान) तथा खेलाडीहरु आइत ल्याह्मु शेर्पा, कल्पना सिंजाली र विमला तामाङ हुन् । यसैगरी अन्य खेलाडीमा कल्पना ओली, रमिला बस्नेत, देवी श्रेष्ठ, ममता राना, अदिती चौधरी, संगीता चौधरी, बिमला भुजेल, सञ्जु राई, राम कुमारी चौधरी, सम्झना कुमाल र हेलिना राना रहनुभएको छ । यसैगरी टिम प्रशिक्षकमा विन्दा थापा र दिपक सिंह बोहरा रहेका छन् ।
