- १५ औं महाधिवेशनको सुरसार चल्दा पनि ७० विभागमध्ये १६ विभागमात्र बल्ल गठन भएको छ
- विधानअनुसार केन्द्रीय समितिलाई ६ महिनामा पूर्णता दिनुपर्ने हो । तर देउवाले किस्ताकिस्तामा केन्द्रीय सदस्य थपिरहेका छन् ।
- सत्ता भागबण्डा र केही पदमा भाग पाएपछि संस्थापइतर पनि मौनता साँधेर बसेको देखिन्छ
काठमाडौं– नेपाली कांग्रेसका सभापति शेरबहादुर देउवा उही गति र उही मतिमा चल्न थालेका छन् । सभापतिमा निर्वाचित भएपछि विधानअनुसार चल्नुपर्नेमा देउवा मैमत्त हिसाबले चल्न थाले पनि केन्द्रीय सदस्यहरु भने चुपचाप देखिन्छन् ।
विधानअनुसार केन्द्रीय समितिलाई ६ महिनामा पूर्णता दिनुपर्ने हो । तर देउवाले किस्ताकिस्तामा केन्द्रीय सदस्य थपिरहेका छन् । केन्द्रीय समितिमा अझै पनि कोषाध्यक्ष चयन हुन सकेको छैन भने २ जना केन्द्रीय सदस्य मनोनित कोटा अझै बाँकी छ ।
पार्टीका विभागहरु ६ महिनाभित्रै गठन भइसक्नुपर्ने हो । तर १५ औं महाधिवेशनको सुरसार चल्दा पनि ७० विभागमध्ये १६ विभागमात्र बल्ल गठन भएको छ । तिनमा पनि संयोजकमात्र तोकिएका छन् । १४ औं महाधिवेशनमा जसरी मनोमानीमा उत्रिएर चौतर्फी आलोचनाका पात्र बनेका थिए देउवा । जसका कारण कांग्रेस इतिहासमै कमजोर पार्टी साबित बन्यो । दोस्रो कार्यकालमा भने कांग्रेस संसदमा ८९ सिटसहित पहिलो दल बन्यो ।
केन्द्रीय समितिमा पनि ८० प्रतिशत बढी शक्ति आर्जेका देउवा पुरानै शैलीमा फर्कन थालेका देखिन्छन् । पहिलो कार्यकालमा रामचन्द्र पौडेल समूहले खबरदारी गरिरहे पनि यसपटक भने संस्थापनइतरले खासै ‘काउन्टर’ दिन सकेको देखिँदैन । सत्ता भागबण्डा र केही पदमा भाग पाएपछि डा शेखर कोइराला समूह मौनता साँधेर बसेको देखिन्छ ।
थपे ८ केन्द्रीय सदस्य
केन्द्रीय समितिअघि सभापति देउवाले ८ जनालाई केन्द्रीय सदस्यमा मनोनित गरेका छन् । पार्टीको विधान, २०१७ (संशोधन सहित) को धारा २१ को उपधारा (१०) बमोजिम बिहीबार ८ जनालाई केन्द्रीय कार्यसमिति सदस्य पदमा मनोनयन गरेका हुन् ।
देउवाले मानबहादुर विश्वकर्मा (अर्घाखाँची), अर्जुनप्रसाद जोशी (पर्वत), डा चन्द्रकान्त भण्डारी (गुल्मी), शिवप्रसाद हुमागाई (काभ्रेपलाञ्चोक), किरणराज शर्मा पौडेल (बाग्लुङ), भरतकुमार शाह (रुपन्देही), शारदा पौडेल (कास्की) र अनिलकुमार रुंगटा (पर्सा) लाई मनोयन गरेका हुन् । देउवाले मनोनित गरेका ८ मध्ये चन्द्र भण्डारी र शारदा पौडेल संस्थापनइतरका हुन् ।
२०७८ मंसिरमा सम्पन्न १४ औं महाधिवेशनबाट दोस्रो कार्यकालका लागि निर्वाचित १९ महिने अवधिमा पटकपटक गरी ३२ जनालाई केन्द्रीय सदस्य मनोनीत गरेका छन् ।१६७ सदस्यीय रहने केन्द्रीय समितिमा सभापतिसहित १३ जना पदाधिकारी र १२२ जना केन्द्रीय सदस्य महाधिवेशनबाट निर्वाचित भएर आएका थिए । सभापतिलाई ३३ जना केन्द्रीय सदस्य मनोनीत गर्ने अधिकार विधानले दिएको छ ।
यसअघि सभापति देउवाले ०८० वैशाख २२ गते मीनेन्द्र रिजाललाई केन्द्रीय सदस्य मनोनीत गरेका थिए । त्यसअघि देउवाले ०७९ साउन ३१ गते १० जनालाई केन्द्रीय सदस्य मनोनीत गरेका थिए ।महोत्तरीकी किरण यादव, काठमाडौंकी राधा घले, ललितपुरकी धना खतिवडा, धादिङकी उर्मिला थपलिया, मोरङकी रुकमिनी कोइराला, काठमाडौंकी कल्याणी रिजाल, झापाकी गोमा भट्टराई, रुपन्देहीकी गंगा शाही, सुनसरीकी लक्ष्मी खतिवडा र नवलपुरकी सीता देवकोटा केन्द्रीय सदस्य भएका थिए ।
०७८ पुस १७ गते सभापति देउवाले रामचन्द्र पौडेल, प्रकाशमान सिंह, विमलेन्द्र निधि, विजयकुमार गच्छदार, कृष्णप्रसाद सिटौला, प्रकाशशरण महत, नारायण खड्का, उमा रेग्मी, सुजाता कोइराला र मीनबहादुर विश्वकर्मालाई केन्द्रीय सदस्य बनाएका थिए । राष्ट्रपतिमा निर्वाचत पौडेल अहिले पार्टीसँगको आवद्धता टुंगाएका छन् ।भोलिपल्ट पुस १८ गते सभापति देउवाले जीवनबहादुर शाही, प्रदीप पौडेल र कल्याणकुमार गुरुङलाई केन्द्रीय सदस्य मनोनीत गरेका थिए ।
मनोनित केन्द्रीय सदस्यको योग्यतामाथि प्रश्न
कांग्रेस केन्द्रीय समितिको बैठकमा मनोनीत केन्द्रीय सदस्यको योग्यता र आधारमाथि प्रश्न उठेको छ । गण्डकी कांग्रेस सभापति शुक्रराज शर्माले सभापति देउवासँग केन्द्रीय सदस्यहरू मनोनीतको योग्यता र आधार खोजेका हुन् । ‘आज पनि तपाईंले केन्द्रीय सदस्य मनोनीत गर्नुभयो, केन्द्रीय सदस्य बन्ने योग्यता के हो ?,’ देउवालाई शर्माको प्रश्न छ, ‘केन्द्रीय सदस्य हुन केके काम गर्नुपर्छ ? के–के काम गरेपछि मात्रै कांग्रेस सदस्य हुन पाइन्छ ? मापदण्ड हुनुपर्दैन ।’विचार पु¥याएर मात्रै केन्द्रीय सदस्य मनोनीत गर्न सभापति देउवालाई शर्माले ध्यानाकर्षण गराए । जथाभावी मनोनीत गर्दा संगठनलाई नै क्षति पुग्न सक्ने उनको भनाइ थियो ।
शिक्षकको मागबारे केन्द्रीय समितिमा छलफल
महासमिति बैठकलाई मुल एजेन्डा बनाएर शुरु भएको कांग्रेस केन्द्रीय समितिमा शिक्षक आन्दोलनको विषयबारे पनि छलफल भएको छ । बैठकमा अधिकांश सदस्यले आन्दोलनका कारण पठनपाठन ठप्प हुनु गम्भीर विषय भएको भन्दै शिक्षकहरुसँग वार्ता गरेर समस्याको समाधान निकाल्न सरकारको ध्यानाकर्षण गराएका छन् । कल्याण गुरुङ, प्रतिमा गौतम, नैनसिंह महरलगायतले शिक्षकका जायज माग सरकारले सम्बोधन गर्नुपर्ने बताए ।
केन्द्रीय सदस्य गौतमले शिक्षकहरुको आन्दोलनले काठमाडौं उपत्यकाको ट्राफिक व्यवस्थापन अस्तव्यस्त भएको भन्दै यस विषयमा कांग्रेस चुप लागेर बस्न नमिल्ने बताइन् । उपसभापतिसमेत रहेका कार्यवाहक प्रधानमन्त्री पूर्णबहादुर खड्काले शिक्षकहरूसँग सरकारले वार्ता थालेको जानकारी गराएका छन् ।‘उपप्रधान तथा गृहमन्त्री नारायणकाजी श्रेष्ठको नेतृत्वमा आजदेखि शिक्षकहरूसँग वार्ता सुरू भएको छ,’ उपसभापति खड्काले भने, ‘शिक्षकहरूको समस्या समाधान हुन्छ, हामीले समस्या समाधान गर्छौं ।’
शिक्षकहरूले मुलुकको अवस्था र संविधानले गरेको प्रबन्धलाई बुझेको खड्काको भनाइ छ । ‘शिक्षक आन्दोलनले उठाएका सवालका सन्दर्भमा सरकारबाट अग्रसरता लिइरहेको छ,’ उनले भने, ‘समाधान निस्किन्छ ।’उनले यसअघि शिक्षकहरूसँग गरिएका सहमतिबाट सरकार पछि नहट्ने बताएका छन् । ‘शिक्षकहरूको पेसागत अवस्थालाई सुधार र व्यवस्थित गर्न सरकार खुला छ,’ खड्काले भने, ‘ऐनमा, नियमावलीमा, कार्यविधिमा कसरी व्यवस्था गरेर समस्याहरूलाई समाधान गर्न सकिन्छ भन्नेबारे छलफल गर्न तयार छौं ।’
सरकारले ल्याएको विद्यालय शिक्षा विधेयकमा असन्तुष्टि जनाउँदै शिक्षकहरूले बुधबारदेखि काठमाडौं केन्द्रित आन्दोलन जारी राखेका छन् । नेपाल शिक्षक महासंघ र उपप्रधानमन्त्री श्रेष्ठसहितले बिहीबार बिहान गृह मन्त्रालयमा वार्ता गरे पनि छलफल निष्कर्षमा पुगेको थिएन ।
