- नेपाली जनताले यो सरकार जुनसुकै तरिकाले भए पनि यसलाई टिपेर मिल्काउनुपर्ने हुन्छ
- आज प्रचण्डका कार्यकर्ता भएर शेरबहादुरजीहरु पछाडिपछाडि हिँड्नुभएको छ
- अहिले त सरकार बनाएर छोराछोरीका घर हेर्नुस्, गाडी हेर्नुस् । आफन्त सप्रिएको हेर्नुस् । मुला पनि त्यति राम्ररी सप्रिँदैन ।
- चट्टानको कारणले हुम्लाको सदरमुकाममा दुई किलोमिटरको बाटो छिचोल्न सकेको छैन । यदि मै प्रधानमन्त्री भएको भए देशभरि पुग्यो त्यहाँ नपुग्ने कुरा थिएन
काठमाडौं– सरकारबारे पछिल्लो समय नरम सुनिएका प्रमुख प्रतिपक्षी दलका नेता केपी शर्मा ओली आइतबार एकाएक खरो सुनिएका छन् । ओखलढुंगामा सहिद गुरु लुइँटेल स्मृति पार्क उद्घाटन गर्न पुगेका एमाले अध्यक्ष ओलीले माओवादी केन्द्रका अध्यक्ष पुष्पकमल दाहाल नेतृत्वको सरकारमाथि खरो टिप्पणीमा उत्रिएका हुन् ।
दाहाल नेतृत्वको सरकार नालायक देखिएकोले जुनसुकै तरिकाल फाल्नुपर्ने ओलीको तर्क रह्यो । ‘अहिलेको सरकार । यो सरकार बसिरहन हुन्छ ? तपाईंहरु भन्नुस् त यस्तो सरकार ? यस्तो सरकार बसिरहन हुन्छ ? राख्न हुन्छ अब ? तपाईं हामी नेपाली जनताले यो सरकार जुनसुकै तरिकाले भए पनि यसलाई टिपेर मिल्काउनुपर्ने हुन्छ,’ आक्रोशित हुँदै ओलीले भने ।
अर्थतन्त्र जर्जर भएको बेला दाहाल नेतृत्वको सरकारले जनतालाई वास्तै नगरेको उनको भनाइ थियो । बरु सुन तस्करीमा अहिलेको सरकार लागिपरेको ओलीको आरोप रह्यो । ‘यति नलायक । जनता हेर्दैन । सुनतिर हेर्छ । ब्रेक शुमा ल्याउँछ सुन । पानी तान्ने मोटरमा ल्याउँछ सुन । स्याउमा ल्याउँछ सुन,’ ओलीले भने, ‘बूढाबूढीले उहिले आसिक दिँदै माटो छुँदा अन्नै होस् । ढुंगा छुँदै द्रव्य होस् भनेजस्तै अहिले जे छोए पनि सुन ।’
कांग्रेस माओवादीको ‘पुच्छर’
संसद्को सबैभन्दा ठूलो दल नेपाली कांग्रेस दाहाल नेतृत्वको प्रमुख सत्ता साझेदार हो । यो सरकारमा कांग्रेसका तर्फबाट नौ जनामन्त्री छन् । तर, कांग्रेस सभापति शेरबहादुर देउवा प्रधानमन्त्री दाहालको पछाडिपछाडि हिँडेको ओलीले आरोप लगाए । ‘आज त नेपाली कांग्रेसको कुरा नगरौं । नेपाली कांग्रेसका साथीहरु पनि हुनुहुन्छ होला यहाँ । लोकतन्त्रका लागि तपाईंहरु अडिनुभएको होला,’ ओलीले भने, ‘लोकतन्त्र हैन आज प्रचण्डका कार्यकर्ता भएर शेरबहादुरजीहरु पछाडिपछाडि हिँड्नुभएको छ ।’
सरकार आफैं सुन तस्करीमा लागेको आरोपसमेत ओलीले लगाए । ‘सरकारले दिनको क्विन्टल क्विन्टलका दरले सुनको तस्करी गर्छ । देख्नुभयो तपाईंले ? भनेर सोधे देखिनँ भन्छ । सुन तस्करी भइरहेको छ भनेर सोध्यो भने अर्कोतिर फर्केर देखिनँ भन्छ,’ ओलीले व्यंग्य कसे ।माओवादी नेतृत्वको सरकारले तस्करी र हिंसा मच्चाएको छ । मलंगवामा कफ्र्यु छ । देशमा हिंसा भड्काउने काम भइरहेको छ । सरकार नदेखेको नदेखेझैं कानमा तेल लगाएर बसेको छ ।
मुलाझैं सप्रिए माओवादी
अध्यक्ष ओलीले आफ्नो पालामा धेरै काम भएको उल्लेख गर्दै अहिलेको सरकारले केही नगरेको दाबी पेस गरे । ‘हामीले विकास निर्माणका काम चौतर्फी गरेका छौं । चट्टानको कारणले हुम्लाको सदरमुकाममा दुई किलोमिटरको बाटो छिचोल्न सकेको छैन । यदि मै प्रधानमन्त्री भएको भए देशभरि पुग्यो त्यहाँ नपुग्ने कुरा थिएन,’ ओलीले भने । दाहाल नेतृत्वको सरकारले अहिले तस्करीमात्र हैन हिंसासमेत मच्चाएको उनको दाबी रह्यो । ‘माओवादी नेतृत्वको सरकारले तस्करी र हिंसा मच्चाएको छ । मलंगवामा कफ्र्यु छ । देशमा हिंसा भड्काउने काम भइरहेको छ । सरकार नदेखेकोझैं कानमा तेल लगाएर बसेको छ,’ ओलीले भने ।
उनले माओवादीमाथि लक्षित भनाइ राख्न कुनै कसर बाँकी राखेनन् । पुस ११ गते कांग्रेसलाई छक्याएर बालकोटको बार्दलीमा दाहाललाई उभ्याउन सफल ओलीले सरकार छाडेको छ महिनामै माओवादी नेतृत्वमाथि चर्को आलोचना गर्न भ्याएका हुन् । ‘किन ग¥या रहेछ तथाकथित जनयुद्ध ? जनयुद्धले को सप्रियो ? उहिले हामी जेलमा हुँदा गीत गाउँथ्यौं । गैतीबेल्चा उचालेर कुल्ली दाइले बाटो बनायो । मोटर अर्कैले कुदायो, आफूलाई त धुलो उडायो,’ ओलीले माओवादीलाई निशाना गर्दै भने, ‘अहिले त सरकार बनाएर छोराछोरीका घर हेर्नुस्, गाडी हेर्नुस् । आफन्त सप्रिएको हेर्नुस् । मुला पनि त्यति राम्ररी सप्रिँदैन मज्जाले बढे पनि । त्यति राम्ररी आफन्त सपारेको छ ।’
जनताको पक्षमा भने यो सरकारले सिन्को नभाँचेको ओलीको तर्क रह्यो । ‘जनतालाई केही गरेको छैन । नौ महिनामा सरकारले केही गरेको छ ? सिन्को भाँचेको छैन । एउटा कानुन बनाएको छैन,’ उनले भने । अहिले प्रधानमन्त्री चीन र अमेरिका भ्रमणमा जाँदा संसद् ठप्प रहेको प्रसंग निकाल्दै सुन तस्करीको विषयमा एमाले विरोधमा उत्रँदा सबै एमालेको आलोचनामा उत्रिएकोप्रति दुःख जनाए ।
सुन तस्करी रोक्न एमालेले संसद्बाट माग गरे पनि त्यसबेला संसद् अवरोध गरेर कानुन बनाउन नदिएको भन्ने हल्ला चलाइएको उनको भनाइ थियो । प्रधानमन्त्री अमेरिका र चीन भ्रमणमा जाँदा संसद् रोकिएको उनको भनाइ छ ।
