काठमाडौं– नवगायक कर्साङ शेर्पाले आफ्नो डेब्यु गीत ‘दिल बस्यो’को भिडियो सार्वजनिक गरेका छन् । उक्त गीतमा शब्द गणेश सुवेदीको रहेको छ भने संगीत बिक्रम थापाको रहेको छ । गीतको संगीत संयोजन विशन मानन्धरले गरेका हुन् ।
स्वयंम गायक कर्साङ र नायिका वर्षा सिवकोटी फिचर्ड भिडियोमा दुई जनाबिचको चोखो र सरल प्रेमकहानी प्रस्तुत गरिएको छ । उत्सव दहालले छायाङ्कन गरेको भिडियोलाई नविन निरौलाले सम्पादन गरेका हुन् । गायक कर्साङको कन्सेप्टमा तयार पारिएको भिडियोलाई जीवन शाहीले निर्देशन गरेका हुन् ।
लामो समयदेखि अमेरिका बस्दै आएका कर्साङले सानैदेखि गीतसंगीतमा रुचि भएको बताएका छन् । किशोर कुमार, नारायण गोपाल, भक्तराज आचार्य, दिप श्रेष्ठजस्ता गायकको गायनकलाबाट प्रभावित बताउने कर्साङले अमेरिकामा हुने विभिन्न सांगीतिक कार्यक्रमहरूमा सहभागिता जनाउँदै आएका छन् । हरेक नेपालीमा सामाजिक सेवाभाव हुनुपर्छ भन्ने विचारका कर्साङले यो भिडियो हाल अस्पतालमा उपचाररत आफ्ना भाई टेण्डी शेर्पा (नेपाल बास्केटबल संघका अध्यक्ष) प्रति समर्पित गरेका छन् ।
गीतसंगीतबाट आगामी दिनहरूमा नेपालको प्राकृतिक सुन्दरता, जीवनशैली, प्रेम र यथार्थापन झल्काउने म्युजिक भिडियो निर्माण गर्दै जाने गायक कर्साङले बताएका छन् ।
