काठमाडौं– नेकपा माओवादी केन्द्रक अध्यक्ष पुष्पकमल दाहाल नेतृत्वको सरकारको कार्यशैलीप्रति सत्तारुढ गठबन्धनभित्रै असन्तुष्टि चुलिँदो छ । गठबन्धनको प्रमुख साझेदार नेपाली कांग्रेसका नेताहरू विभिन्न मञ्चबाट दाहाल नेतृत्वको सरकारविरुद्ध आलोचनामा उत्रिन थालेका छन् ।आइतबारमात्र सरकारको कामप्रति असन्तुष्टि जनाउँदै कांग्रेस महामन्त्री गगन थापाले सरकारबाट कांग्रेस फिर्ता हुनुपर्ने बताएका थिए । ‘मलाई लाग्छ कांग्रेसका सबै मन्त्री फिर्ता बोलाउँ । दुई अढाइ वर्ष मोर्चालाई चलाउन दिउँ । हामी चुप लागेर बसौं न,’ दाहालले समाजवादी मोर्चा कसेकोप्रति असन्तुष्टि जनाउँदै थापाले भनेका थिए ।
अब अति भयो । जति दिन यो सरकार राख्यो त्यति देशको राष्ट्रियता, सार्वभौमिकता, राजनीतिक र अवस्था कमजोर हुँदै जान्छ ।
डा. शेखर कोइराला
नेता, नेपाली कांग्रेस
बुधबार कांग्रेस संस्थापनइतरका नेता डा. शेखर कोइरालाले वर्तमान सरकार तत्काल सच्चिनुपर्ने नभए नेतृत्व छाड्न तयार हुनुपर्ने धारणा राखे । कपिलवस्तुको तौलिहवामा आयोजित कांग्रेस कपिलवस्तुको प्रथम जिल्ला सम्मेलनलाई सम्बोधन गर्दै कोइरालाले यस्तो अभिव्यक्ति दिएका हुन् । ‘अब अति भयो, जति दिन यो सरकार राख्यो त्यति देशको राष्ट्रियता, सार्वभौमिकता, राजनीतिक र अवस्था कमजोर हुँदै जान्छ । नेपाली कांग्रेसको नेतृत्वमा सरकार गठन अपरिहार्य भइसक्यो,’ कोइरालाले भने । कोइरालाले सरकारको हेपाहा र बलमिच्याइँले चर्को महँगीका कारण जनताको चुलो नबल्ने अवस्थामा पुगेको बताए । जनतालाई सहुलियत दिनुपर्नेमा चाडपर्वको मुखमा दैनिक उपभोग्य वस्तुहरूको भाउ बढ्नु राम्रो संकेत नभएकोसमेत बताए ।
मुख नमिठ्याउन माधव नेपालको आग्रह
कांग्रेस नेताले सरकारको विरोध गरिरहँदा गठबन्धनका एक साझेदार एकीकृत समाजवादीका अध्यक्ष माधवकुमार नेपालले भने यही सरकारले निरन्तरता पाउने दाबी पेस गरेका छन् । ‘को प्रधानमन्त्री बन्छ भनेर मुख मिठ्याएर बस्ने होइन, कहिले आउँछ भनेर ढुकेर बस्ने होइन । अहिले भएको सरकारलाई अघि बढाउने हो । नेपाली कांग्रेसका नेता शेरबहादुर देउवा यो सरकारलाई अघि बढाउने पक्षमा हुनुहुन्छ,’ अध्यक्ष नेपालले भने, ‘हामी पनि यो सरकार अघि बढाउने पक्षमा छौं । कमजोर र असहयोग गर्ने पक्षमा छैनौं ।’ यद्यपि कांग्रेसविनाको सरकार कल्पनै गर्न नसकिने नेपालको भनाइ थियो ।
को प्रधानमन्त्री बन्छ भनेर मुख मिठ्याएर बस्ने होइन, कहिले आउँछ भनेर ढुकेर बस्ने होइन । अहिले भएको सरकारलाई अघि बढाउने हो ।
माधवकुमार नेपाल
अध्यक्ष, एकीकृत समाजवादी
मेची–महाकाली समाजवादी जागरण अभियानको क्रममा बुधबार जनकपुरधाम पुगेका नेपालले अहिलेको संसद्को संरचनामा शक्ति सन्तुलन मिलाउन कांग्रेस अपरिहार्य भएको बताएका हुन् । प्रधानमन्त्री दाहालले राम्रो काम गर्न खोजिरहे पनि पर्याप्त नभएको नेता नेपालले बताए । ‘उहाँले केही राम्रा काम पनि गर्न खोज्नुभएको छ । तर त्यो पर्याप्त भएन । त्यसको निम्ति हामीले उहाँलाई सहयोग पनि गर्नुपर्छ,’ उनले भने ।
‘डिफेन्सिभ’ मुडमा ओली
प्रमुख प्रतिपक्षी दल नेकपा एमालेका नेता केपी शर्मा ओलीले केही दिनअघि वर्तमान सरकारलाई जसरी भए पनि टिपेर मिल्काउनुपर्ने अवस्था आएको बताएका थिए । तर, अहिले उनी ‘डिफेन्सिभ’ मुडमा उत्रिएका छन् । ‘अहिलेको सरकार बसिरहन हुन्छ ? तपाईंहरू भन्नुस् त, यस्तो सरकार राख्न हुन्छ ?,’ असोज ७ गते ओखलढुंगा पुगेर ओलीले भनेका थिए, ‘तपाईं–हामी नेपाली जनताले यो सरकार जुनसुकै तरिकाले भए पनि यसलाई टिपेर मिल्काउनुपर्ने अवस्था आइसक्यो ।’
तर, उनै ओली हप्ता दिनमै एकाएक प्रतिरक्षात्मक ढंगमा प्रस्तुत हुन थालेका छन् । सत्तारुढ दलका कांग्रेसदेखि एकीकृत समाजवादीसम्म फुटाउन कोसिसमा लागेको आरोप खेपेका ओलीले बुधबार उल्टै आफ्नै पार्टी फुटाउन खोजेको आरोप लगाए । एमाले कोशी प्रदेशको नयाँ कमिटीको शपथ ग्रहण समारोहलाई सम्बोधन गर्दै उनले विरोधीले एमालेभित्र फुट ल्याउन प्रयास गरेको बताएका हुन् । पछिल्लो समय प्रदेश महाविधेशनमा प्यानलै बनाएर ओली गुटविरुद्ध लागेकोप्रति लक्षित गर्दै ओलीले आक्रोश पोखेका हुन् ।
देश चलाउने एमाले भएको बताउँदै ओलीले फुटको प्रयास गर्नेहरू एमालेभित्र कहिल्यै सफल नहुने बताए । त्यसो त कांग्रेससहितका सत्ता गठबन्धन फुटाएर वा कांग्रेसलाई फकाएर माओवादीलाई सत्ताबाट निकाल्ने अभ्यासमा रहेको ओलीले मंगलबार प्रतिनिधिसभामा सबै दलमाथि रोष पोखेका छन् । ओलीले कांग्रेसका मन्त्री र राष्ट्रपतिमाथि निशाना साँधेर कांग्रेसलाई बिच्काउने काम गरेको कतिपय राजनीतिक विश्लेषकहरू बताउँछन् ।
ओलीले कांग्रेसबाट सहभागी कानुनमन्त्री र अर्थमन्त्रीको कामका चर्को आलोचना गरेका थिए । ‘धेरै कुरा किन गरौं, मेराविरुद्धको मुद्दामा उफ्रीउफ्री सक्रिय भूमिका खेल्ने फर्मका सहयोगी वकिललाई न्यायाधीश बनाउनुपरेको रहेछ । पारितोषिक त कहाँ–कहाँबाट लम्कीलम्की कति याद गरेको ? आफ्नो सेवा गरेका मान्छेको कति याद आउँदो रहेछ,’ ओलीले भनेका थिए ।
त्यसैगरी ओलीले अर्थमन्त्री डा. प्रकाशशरण महतको कार्यक्षमतामाथि प्रश्न गर्दै गठबन्धन पद टिकाउनैमा केन्द्रित हुँदा त्यसको प्रभाव अर्थतन्त्रमा परेको दाबी गरेका थिए । सरकारले विदेश भ्रमणलगायतका नाममा अर्थतन्त्रको दोहन गरिरहेको आरोपसमेत लगाए । नेपालको अर्थतन्त्र इतिहासकै कमजोर अवस्थामा रहेको उल्लेख गर्दै उनले राजस्व संकलनमा गिरावट आउँदा, बचत गर्नुपर्नेमा तलब खुवाउन नसकेर ऋण लिन बाध्य हुँदासमेत सरकार गम्भीर नदेखिएको बताएका थिए ।
