काठमाडौं– माथिल्लो मैलुङ खोला जलविद्युत लिमिटेडको साधारण सेयर (आईपीओ) बिक्री खुलेको छ । कम्पनीले आजदेखि सर्वसाधारणका लागि आईपीओ बिक्री खुलाएको हो । यसअघि वैदेशिक रोजगारीमा गएका र स्थानीयका लागि सेयर बाँडफाँड भइसकेको छ ।
सर्वसाधारणका लागि जारी पूँजी १ अर्ब रुपैयाँको १५ प्रतिशतले हुन आउने १५ लाख कित्ता सेयर बिक्री गर्दैछ । कम्पनीले १०० रुपैयाँ अंकित १५ करोड रुपैयाँ बराबरको १५ लाख कित्ता सेयर सर्वसाधारणमा क्रिी गर्न लागेको हो ।
यसमध्ये १० प्रतिशतले हुन आउने १ लाख ५० हजार कित्ता सेयर वैदेशिक रोजगारीमा गएकालाई बिक्री गरिसकेको छ । यस्तै, सामूहिक लगानी कोषका लागि ७५ हजार कित्ता छुट्याइएको छ भने स्थानीयलाई बिक्री गरेर बाँकी रहेको ९ हजार २०० कित्ता सेयर समेत थपेर सर्वसाधारणमा बिक्री गर्न लागेको हो ।
आजदेखि कूल १२ लाख ८४ हजार २०० कित्ता सेयर बिक्री खुलाएको कम्पनीले १४.३ मेगावाट क्षमताको जलविद्युत परियोजना सञ्चालन गरिरहेको छ । यसको लागत २ अर्ब ५० करोड रहेको छ भने लगानीकर्ताको लगानी फिर्ता हुने अवधि ७.१० वर्ष रहेको छ ।
कम्पनीको प्रतिसेयर नेटवर्थ ९५.८८ प्रतिशत छ भने प्रतिसेयर आम्दानी ०.४९ रुपैयाँ छ ।
