काठमाडौं– गीतकार आदर्श लिम्बूको शब्दरचना र रोहित लिम्बुको संगीतमा ‘सहयात्री’को ‘जानु नै थियो भने’ बोलको गीत सार्वजनिक भएको छ ।
उक्त गीतमा गायिका आशा साम्बाको सुमधुर स्वरमा सुन्न सकिन्छ । उक्त गीतको भिडियोलाई ट्रिएक म्युजिक प्रोडक्सन प्रालिले सार्वजनिक गरेको हो । भिडियोमा गीतकार आदर्श लिम्बूकै निर्देशन रहेको छ भने अञ्जित श्रेष्ठको छायाङ्कन र सम्पादन रहेको छ । सो म्युजिक भिडियोमा सुरज लिम्बू र सीता लिम्बूको अभिनय रहेको छ । ‘सहयात्री’ गीतमा वैदेशिक रोजगारमा जाने बाध्यताका कारण परिवारमा निम्त्याएको समस्यालाई उजागर गर्न खोजिएको निर्देशक लिम्बूले जानकारी दिए ।
मोफसलमा रहेर नेपाली गीतसंगीतमा योगदान पुर्याउने उद्देश्यले स्थापना गरिएको ट्रिएक म्युजिक प्रोडक्शनले आगामी दिनमा स्थानीयस्तरमा लुकेर रहेका प्रतिभालाई उजागर गर्दै जाने योजना कम्पनीका अध्यक्ष सुरज लिम्बूले बताए । उक्त भिडियो झापाको दमकबाट सञ्चालित संगीत दर्पण नेपाल नामक युट्यूब च्यालनबाट सार्वजनिक गरिएको हो ।
