काभ्रेपलाञ्चोक–नेपाल प्रहरी श्रीमती संघकी अध्यक्ष श्रीमती ज्ञानु ज्ञवालीको प्रमुख आतिथ्यमा सोमबार आयोजित एक कार्यक्रमबीच नेपाल पुलिस स्कुल साँगाको ३६औँ स्थापना दिवस तथा वार्षिक खेलकुद दिवस सम्पन्न भएको छ ।
उक्त अवसरमा संघकी अध्यक्ष ज्ञवालीले विद्यालयको वार्षिक म्यागजिन ‘दिपीका’ ३१औँ अङकको लोकार्पण गरिन् साथै उनले विद्यालयका उत्कृष्ट खेलाडीहरू, उत्कृष्ट विद्यार्थीहरू, विभिन्न विधामा उत्कृष्ट विद्यार्थीहरू, स्थापना दिवसमा आयोजित विविध अतिरिक्त क्रियाकलापका विजेताहरू, उत्कृष्ट शिक्षक तथा प्रशिक्षकहरू तथा प्रहरी कर्मचारीहरूलाई नगद, शील्ड, मेडल, पुरस्कार तथा प्रशंसापत्र वितरण गर्नुभयो । साथै विद्यार्थीहरूले निर्माण गरी प्रदर्शनीमा राखेका विभिन्न विज्ञान तथा कला प्रदर्शनीको समेत उनले अवलोकन गरेकी थिईन् ।
कार्यक्रममा संघकी अध्यक्ष ज्ञवालीले पुलिस स्कुलले नियमित पठनपाठन साथै अतिरिक्त क्रियाकलाप र खेलकुद मार्फत चरित्रवान नागरिक निर्माणमा योगदान पुर्याएको चर्चा गर्दै यस्ता कार्यक्रमबाट विद्यार्थीहरूलाई बहुआयामिक एवं असल नागरिक बन्न प्रेरणा मिल्ने बताईन् । शिक्षा बालबालिकाको अधिकार भएकोले अभिभावकहरू आफ्ना सन्ततीहरूलाई राम्रो शिक्षा दिनेबारे चिन्तित हुनुपर्ने उल्लेख गर्दै शिक्षाको साथै अनुशासन, सीप र संस्कार पनि बालबालिकालाई सिकाउनुपर्ने उनले चर्चा गरिन् ।
स्कुलका प्रिन्सीपल संजिव घिमिरेले स्वागत मन्तव्य व्यक्त गरेको सो कार्यक्रममा विद्यालयका समादेशक प्रहरी नायव उपरीक्षक श्रीराम भण्डारीले धन्यबाद ज्ञापन गरेका थिए । सोही अवसरमा स्काउट टीम लगायतका विद्यार्थीहरूले मार्चपास, जुडो, कराँते, तेक्वान्दो, जिमन्यास्टिक तथा साँस्कृतिक कार्यक्रम प्रस्तुत गरेका थिए । उक्त अवसरमा नेपाल प्रहरी श्रीमती संघका पदाधिकारीहरू, विद्यालय व्यवस्थापन समितिका पदाधिकारीहरू, बरिष्ठ प्रहरी अधिकृतहरू, स्थानीय तहका जनप्रतिनिधिहरू लगायत अभिभावकहरू समेतको उपस्थिति रहेको थियो ।
प्रकाशित मिति: मंगलबार, फागुन १३, २०७६ ०६:५०
