काठमाडौं- पठन संस्कृति प्रबद्र्धनका लागि कार्यरत संस्था बालवाङ्मय तथा अनुसन्धान केन्द्रले बालसाहित्यमा योगदान पुर्याएका चार स्रष्टालाई सम्मान तथा पुरस्कार समर्पण गरेको छ ।
केन्द्रले आफ्नो ११ औँ वार्षिकोत्सवका अवसरमा सोमबार काठमाडौंमा आयोजना गरेको विशेष साहित्यिक कार्यक्रममा वरिष्ठ कलाकार टेकवीर मुखियालाई २५ हजार राशीसहितको साहित्य सृष्टि बालवाङ्मय साधना सम्मान अर्पण गरेको हो । कार्यक्रमका प्रमुख अतिथि गीतकार, चलचित्र निर्देशक एवम् लेखक यादव खरेलले केन्द्रका तर्फबाट सम्मान अर्पण गरेका हुन् । यो सम्मान लेखक एवम् पत्रकार प्रमोद प्रधानले स्थापना गरेका हुन् ।
यसैगरी कलाकार के.के. कर्माचार्यबाट स्थापित के.के. बालवाङ्मय कला साधना सम्मान युवा कलाकार कृष्णगोपाल श्रेष्ठलाई प्रदान गरिएको छ । सम्मानमा १० हजार नगदसहित सम्मान पत्र रहेको छ ।
यसैगरी स्रष्टा रामकुमार पाँडेद्वारा स्थापित २० वर्षमुनिका लेखकका पुस्तकमध्येबाट उत्कृष्टलाई प्रदान गरिने राकुपा बालवाङ्मय पुरस्कार कक्षा ८ की छात्रा सोइना दाहालको कथासंग्रह ‘कथाको खोजी’ का लागि प्रदान गरिएको छ ।
लेखक सिर्जना शर्माद्वारा स्थापित जयहिरा बालवाङ्मय किशोरसाहित्य पुरस्कार भने ‘तनुजा’ किशोरलक्ष्यित कथासंग्रहका लागि डा.जानुका पौडेल नेपाललाई प्रदान गरिएको छ । दुवै पुस्तक २०७९ सालका उत्कृष्ट पुस्तकका रूपमा चयन भएका हुन् भने दुवैमा १०÷१० हजार नगदसहित प्रशंसा पत्र रहेको छ ।
पुरस्कार तथा सम्मान समर्पण गर्दै प्रमुख अतिथि खरेलले उपयुक्त पात्र चयनले ती सम्मान तथा पुरस्कारबाट पुरस्कार प्रदान गर्ने संस्था आफैं पुरस्कृत भएको बताए । कार्यक्रममा कलाकार के.के. कर्माचार्यले सम्मानित कलाकारद्वय मुखिया र श्रेष्ठको व्यक्तित्वबारे चर्चा गरेका थिए भने प्रा. तारानिधि भट्टराईले पुरस्कृत पुस्तकहरूबारे चर्चा गर्नु गरेका थिए । समारोहमा लेखक प्रमोद प्रधान, कलाकार कृष्णगोपाल श्रेष्ठ, पुरस्कृत कृतिका कृतिकारद्वय सोइना दाहाल तथा डा. जानुका पौडेल नेपालले पनि आ–आफ्नो मन्तव्य व्यक्त गरेका थिए ।
केन्द्रका अध्यक्ष अनन्त वाग्लेको सभापतित्वमा भएको कार्यक्रमको सञ्चालन महासचिव शान्ति सापकोटाले गरेकी थिइन् ।
