- आजका लागि डाकिएको बैठकमा नजाने गगनको अड्डीपछि डा शेखर बैठक सार्न राजी
- दुई नेताबीच बढेको टकराव मत्थर गराउन गगनका ससुरासमेत रहेका कांग्रेस नेता अर्जुननरसिंह केसीको प्रयास
- पछिल्लो समय केदार कार्कीलाई कोशीको मुख्यमन्त्री बनाएपछि शेखरसँग गगन असन्तुष्ट बनेका थिए
काठमाडौं– डा शेखर कोइराला र महामन्त्री गगन थापाको टकरावका कारण कांग्रेस संस्थापनइतर कमजोर बन्दै गएपछि अर्जुन नरसिंह केसी यो समूह मिलाउन लागिपरेको छ । मंगलबारका लागि डा शेखरले डाकेको बैठकमा गगनले असन्तुष्टि जनाएपछि केसीले सोमबार साँझ दुबैलाई डाकेर टकराव मत्थर गराउने सुत्र खोजे ।
उक्त भेटपछि शेखरले बैठक बुधबारका लागि सारिएको छ । बैठकमा गगनसमेत आउने पक्का भएको सहमहामन्त्री जीवन परियारले बताए । ‘बैठक एक दिनका लागि सारिएको हो । महामन्त्री थापा पनि आउनुहुन्छ,’ परियारले भने ।
नेता केसी महामन्त्री थापाका ससुरासमेत हुन्, जसले इतर संस्थापन पक्षका नेताबीच विगतदेखि नै मेलमिलाप प्रयास गर्दै आएका छन् ।
संघीय मन्त्रिपरिषद गठनबाटै संस्थापनइतरमा बेमेल शुरु भइसकेको थियो । कोशीमा केदार कार्की मुख्यमन्त्री बनेयता दुई नेताको दुरी झन बढ्न थालेको हो ।
पार्टीमा सभापति शेरबहादुर देउवाको मनपरी बढेको भन्दै एक भएर महाधिवेशन उत्रेका दुई नेताको अहिले बोलचाल नै बन्द थियो । देउवाले महासमिति बैठक पटक–पटक सारेपछि शेखर पक्षले मंगलबार बत्तीसपुतलीस्थित अनुपम फुडल्यान्डमा बैठक डाकेका थिए । उक्त बैठकमा गगनको उपस्थिति हुनुपर्ने माग संस्थापनइतरका युवा नेताहरूले गरेका थिए । देउवाको एकलौटीविरुद्ध १४औं महाधिवेशनमा डा. शेखर र गगन ‘टिम अप’ गरी भिडेका थिए ।
सभापतिमा देउवाले जित निकाल्दा महामन्त्रीमा गगन निर्वाचित भए । कोशी प्रदेशमा शेखर समूहका नेता केदार कार्की मुख्यमन्त्री भएसँगै शेखर गगनको दुरी झनै बढेको हो । कोशी प्रकरणमा असन्तुष्ट जनाएका गगनले आफूले महिना दिनयता नेता शेखरलाई नभेटेको भन्दै कात्तिक २ गते असन्तुष्टि पोखेका थिए । अनुपम फुडल्यान्डमा आयोजित एक कार्यक्रममा गगनले भनेका थिए, ‘वरिष्ठ नेताजीसँग एक महिना जति भयो भेट नभएको । पत्रपत्रिकामा पढिरहेको छु ।’
ठिक एक महिनाअघि असोज २ गते डा शेखरले आफ्नो सचिवालय बालुवाटारमा आफू इतरका नेताहरूको भेला डाकेका थिए । उक्त बैठकमा अर्का महामन्त्री विश्वप्रकाश शर्मा र प्रदीप पौडेललाई पनि निम्तो दिइएको थियो । दुबै जना अनुपस्थित हुँदा गगन भने बैठकमा पुगेका थिए ।
यही विषयमा कोशीका मुख्यमन्त्री कार्कीले ओखलढुंगा पुगेर गगनमाथि असन्तुष्टि पोखेका थिए । मंसिर १९ गते ओखलढुंगामा भएको कांग्रेसको जिल्ला सम्मेलनमा थापालाई लक्षित गर्दै कार्कीले भनेका थिए, ‘अरूले नै लगिसकेको मुख्यमन्त्री मैले खोसेर ल्याउँदा केही मान्छेलाई पचेन। बोमिट आयो ।’ कोशीमा एमालेसँग गठबन्धन गरी कांग्रेसले माओवादीबाट मुख्यमन्त्री आफ्नो पोल्टामा पारेको थियो । सत्ता गठबन्धनले माओवादीका इन्द्र आङ्बोलाई मुख्यमन्त्रीमा समर्थन गरेपछि शेखर पक्षले विद्रोह गरी कार्कीलाई मुख्यमन्त्री बनाएका थिए । पछि कार्कीलाई गठबन्धनले नै मुख्यमन्त्री स्वीकारिसकेको छ ।
