काठमाडौं (प्रसं)–काठमाडौं उपत्यकालगायत देशभरको प्रकृति हेर्दा अझै दुई–तीन दिन मौसम सुधार नहुने मौसमविद्को भनाई छ ।
पश्चिमी न्यून चापीय प्रणालीको प्रकृति कमजोर रहेको र तल्लो वायुमण्डलमा स्थानीय वायुको प्रभाव रहेकाले बदलीसँगै हल्का वर्षा भइरहेको मौसमविद् राजु प्रधानाङ्गले बताए । यसैको कारण बुधबार पनि मौसममा कुनै सुधार नदेखिने उनको भनाई छ । बुधबार देशभर आंशिकदेखि सामान्य बदली रही देशका केही स्थानमा मेघ गर्जन चट्याङसहित वर्षाको सम्भावना रहेको बताइएको छ । बिहीबार देशको पहाडी भेगमा आंशिकदेखि सामान्य बदली भई हल्का वर्षाको सम्भावना रहेको जनाएको छ । पश्चिमी न्यून चापीय वायुको प्रभाव अझै दुई–तीन दिन पर्ने जल तथा मौसम पूर्वानुमान महाशाखाले जनाएको छ ।
प्रि–मनसुनको मौसमको पूर्वावस्था भएकाले पनि यस्तो गतिविधि तथा मौसम फेरबदल भइरहने गर्दछ । नेपालमा प्रि–मनसुन भित्रिने सरदर समय मार्च १ भएपनि यसलाई हेर्दा अब प्रि–मनसुन प्रवेश गर्न सात–आठ दिन बाँकी रहेको संकेत गरेको छ । अङ्ग्रेजी महिना मार्चदेखि शुरु हुने प्रि–मनसुन मे महिनासम्म रहने गर्छ । त्यस अवधिमा पहाडी भेगमा दिनभर घाम लाग्ने र अपराह्न तथा साँझपख हावाहुरी, मेघ गर्जन चट्याङसहित फाटफुट वर्षा हुने गर्दछ ।
प्रकाशित मिति: बुधबार, फागुन १४, २०७६ ०८:४४
