चितवन– गाउँघरमा कोल र ढिकी लोप हुँदै गइरहेका बेला चितवनको चेपाङ गाउँमा त्यही परम्परागत प्रविधि प्रयोग गरी घ्यू उत्पादन गर्ने गरिएको छ ।
कालिका नगरपालिका-१० जिङलाउका चेपाङ समुदायले जंगलमा खेर गइरहेको चिउरीको दाना पेलेर गरेर घ्यू उत्पादन गर्ने गरेका छन । जंगलमा खेर गइरहेको चिउरीको दाना पेलेर घरमै घ्यू उत्पादन गर्दैआएको कालिका-१० जिङलाउका कलाराम चेपाङले बताए ।
कलारामले भने, ‘बाउ बाजेको पालादेखि यहाँ चिउरीको राम्रो उत्पादन हुँदै आएको छ, हामीले पनि प्रत्येक वर्ष घ्यू उत्पादन गर्दै आएका छौँ ।’ उनले चिउरीकै घ्यू प्रयोग गरेर खाना पकाउँदै आएको बताए ।
बजारको तेलप्रति रुचि नभएको उल्लेख गर्दै उनले घरमै एकपटक चिउरीको बियाँ पेलेपछि वर्षभरिलाई पुग्ने जानकारी दिए । बजारको तेल किन्नै पर्दैन, पैसाको पनि बचत हुन्छ’, कलारामले भने, ‘चिउरीको घ्यू स्वास्थ्यका लागि पनि राम्रो छ ।’
चिउरीको घ्यूमा कुनै मिसावट पनि नहुने उनको भनाइ छ । चिउरी असारमा पाक्छ । साउनमा टिप्ने गरिन्छ । कलारामले भने, ‘चिउरी खाएर रहेको बियाँलाई धोएर नबिग्रने गरी सुरक्षित राख्छौँ ।’ एक वर्षमा झण्डै चार मुरी चिउरी टिप्ने गरेको वर्षभरीलाई पुग्ने गरेको कलारामले बताए ।
‘यसको बजार भाउ छैन । तर न्यून संख्यामा घ्यू किन्न आउने गरेका छन्’, कलारामले भने । राष्ट्रिय आधारभूत विद्यालयका शिक्षक रामलाल चेपाङले चिउरीको बियाँबाट निस्कने घ्यू औषधीको रुपमा समेत प्रयोग गर्ने गरेको बताए ।
‘हातखुट्टा, ओठ फुटेको ठाउँमा लगाउने गरेका छौँ’, शिक्षक रामलालले भने । बोटको बोक्रा टन्सिल, कुष्ठरोग, मधुमेह जस्ता रोगमा औषधीका रूपमा प्रयोग हुने गरेको उनको भनाइ छ ।
घ्यू निकालेर निस्कने पिना खेतबारीमा कीटनाशक औषधीका रुपमा प्रयोग हुने गरेको शिक्षक रामलालले बताए । विगतमा चेपाङ समुदायमा छोरीलाई चिउरीको रुख नै दाइजो दिने चलन थियो ।
तर, अहिले चिउरीको रुख दाउरा बाल्न, चिउरीको पात खसीबाख्रालाई खुवाउन प्रयोग हुन थालेको छ । चिउरी, चमेरो र चेपाङको सम्बन्ध रहेको उल्लेख गर्दै उनले पुर्खाले चिउरीको रुखलाई संरक्षण गरेर राखेको उल्लेख गरे ।
दाउरा बाल्न थालेपछि चिउरीको रुख नासिदै गएको छ । चिउरीको फूलको रसबाट बनेको मह बजारमा प्रशस्तै पाइन्छ । अहिले चिउरीको फूल फुल्ने मौसम भएकाले यस क्षेत्रमा मौरी चराउन आउनेको घुइँचो लाग्ने गरेको छ ।
कालिका(१० का वडाध्यक्ष नरजंघ प्रजाले चिउरीको घ्यूले बजार पाउन नसकेको बताए । ‘अरु तेलको प्रयोग बढेपछि चिउरीको घ्यूको खासै माग छैन’, वडाध्यक्ष प्रजाले भने, ‘यसको महत्वबारे बुझाउनुपर्ने आवश्यकता छ ।’
चितवनको इच्छाकामना गाउँपालिका, कालिका नगरपालिका, राप्ती नगरपालिकाका साथै भरतपुर महानगरपालिकाका केही स्थानमा चिउरी पाइन्छ ।