- २० फागुनमा २० जना राष्ट्रिय सभा सदस्यको पदावधि सकिँदै
- गठबन्धनले मात्रै चुनाव लडे एमाले शून्य हुनसक्ने
- एमालेसँग चुनावमा सहकार्य गर्ने गठबन्धनको तयारी
- गणतन्त्रविरोधीहरूलाई जवाफ दिन गठबन्धन–एमाले सहकार्यको प्रयास
गणतन्त्रविरोधी शक्तिहरू जसरी सल्बलाउन थाले नि, हामीले गणतन्त्र गुम्न दिनुहुँदैन, जुन बलिदानले सम्भव भएको हो । त्यसैका लागि सहकार्य चाहियो ।
अष्टलक्ष्मी शाक्य,
उपाध्यक्ष, नेकपा एमाले
प्रधानमन्त्रीज्यूसँग एमाले अध्यक्षज्यूले हामीलाई शून्य नबनाउनुस् भन्नुभयो भन्ने कुरा आयो । यो कुरा आएपछि हामीले सबै दलहरूसँग सरसल्लाह गरेर एमालेको खास कंक्रिट प्रस्ताव के हो ? बुझेरमात्रै टुंगो गरौं भन्ने कुरा भयो ।
राजेन्द्र पाण्डे
उपाध्यक्ष, एकीकृत समाजवादी
काठमाडौं– आसन्न राष्ट्रिय सभा निर्वाचनमा सत्ता गठबन्धन बलियो अवस्थामा देखिन्छ । सबै प्रदेशमा सत्ता गठबन्धनका उम्मेदवार विजयी हुने देखिएपछि प्रमुख विपक्षी दल नेकपा एमाले यतिखेर तनावमा छ ।
अघिल्लोपटक भएको उपनिर्वाचनमा एमाले एक सिटमा खुम्चिएको थियो । यसपटक भने गठबन्धनले १९ सिटका लागि हुन लागेको निर्वाचनमा ‘क्लिन स्वीप’ गर्न सक्ने आकलन गरिएको छ । सबै प्रदेशमा गठबन्धनका दलहरू स्पष्ट जितउन्मुख छन् । यस्तो अवस्थामा एमाले अध्यक्ष केपी शर्मा ओलीले प्रधानमन्त्री पुष्पकमल दाहालसँग एमालेलाई शून्यमा नपार्न आग्रह गरेका छन् ।
बुधबार दिउँसो बसेको गठबन्धन दलहरूको बैठकमा प्रधानमन्त्री दाहालले ओलीको उक्त आग्रह सुनाएको नेकपा एकीकृत समाजवादीका उपाध्यक्ष राजेन्द्र पाण्डेले बताए । ‘प्रधानमन्त्रीज्यूसँग एमाले अध्यक्षज्यूले हामीलाई शून्य नबनाउनुस् भन्नुभयो भन्ने कुरा आयो । यो कुरा आएपछि हामीले सबै दलहरूसँग सरसल्लाह गरेर के हो ? उहाँहरूको खास कंक्रिट प्रस्ताव के हो ? बुझेरमात्रै टुंगो गरौं भन्ने कुरा भयो,’ गठबन्धनको बैठकपछि उपाध्यक्ष पाण्डेले पत्रकारहरूसँग भने ।
उनका अनुसार एमालेको ठोस प्रस्ताव आएपछि गठबन्धनले उपयुक्त निर्णय लिने छ । गठबन्धनको बैठक आज बिहान ९ बजे प्रधानमन्त्रीकै सरकारीनिवास बालुवाटारमा बस्ने तय भएको छ । ओलीले कांग्रेस सभापति शेरबहादुर देउवालाई समेत केही दिनअघि एमालेलाई नएक्ल्याउन र शून्यको स्थितिमा नपार्न आग्रह गरेको विवरण सार्वजनिक भएको थियो ।
तर, गठबन्धन दलहरूले औपचारिकरूपमा एमालेसँग राष्ट्रिय सभा चुनावमा सहकार्य गर्नेबारे निर्णय गरेका छैनन् । नभए पनि गठबन्धन दलहरू ओलीको प्रस्तावबारे सकारात्मक रहेको र ओलीसँग प्रस्ताव माग्ने पक्षमा छन् । ओली नेतृत्वको दल एमालेकी उपाध्यक्ष अष्टलक्ष्मी शाक्यले गणतन्त्रविरोधी शक्तिहरू सल्बलाउन थालेकाले परिवर्तनकारी शक्तिहरूबीच चुनावी सहकार्य हुनुपर्ने बताइन् ।
‘हाम्रो दलले बैठकबाट गठबन्धन दलहरूसँग सहकार्यबारे एउटा निर्णय गर्ला तर गणतन्त्रविरोधी शक्तिहरू जसरी सल्बलाउन थाले नि, हामीले गणतन्त्र गुम्न दिनुहुँदैन, जुन बलिदानले सम्भव भएको हो,’ उनले प्रभावसँग भनिन्, ‘त्यसविरुद्ध परिवर्तनकारीहरू चुनावमा पनि एकजुट हुनुपर्छ ।’
राष्ट्रिय सभा निर्वाचनका लागि उम्मेदवारी दर्ता गर्ने दिन यही २३ पुसमा हो । निर्वाचन ११ माघमा हुँदै छ । किनभने २० फागुनमा राष्ट्रपतिबाट मनोनीत एक जनासहित २० जना राष्ट्रिय सभा सदस्यको पदावधि सकिँदै छ । पदावधि सकिन लागेका सदस्यहरूको पदमा हुन लागेको निर्वाचनमा यसपटक भने गठबन्धन र एमालेबीच सहकार्य हुने सम्भावना देखिएको हो ।
तर, एमालेलाई गठबन्धनले किन समेट्न खोजेको हो ? उत्तर पाइसकिएको छैन । कांग्रेस प्रचार विभाग प्रमुख मीन विश्वकर्माका अनुसार भने गणतन्त्र विरोधी शक्तिलाई जवाफ दिनका लागि चुनावी सहकार्यबारे छलफल भइरहेको हो ।
यसअघि सोमबार कांग्रेसले आयोजना गरेको मेलमिलाप दिवसमा शान्ति सम्झौतामा सहभागी दलहरू एकठाउँमा भेला भएर एकताको सन्देश दिएका थिए । संसदीय समिति सभापति पद बाँडफाँटमा पनि गठबन्धन दलहरूले एमालेलाई सम्मानजनक हिस्सा दिएका थिए ।
प्रधानमन्त्री दाहालले बरु झुक्ने तर विपक्षीलाई टाढा नराख्ने रणनीति अख्तियार गरेका छन् । जसले गर्दा एमाले पछिल्ला दिनमा सरकारविरुद्ध आक्रमक नभएको विश्लेषण हुने गरेको छ । यी घटनाक्रमले राप्रपासहितका गणतन्त्रविरोधी शक्तिहरूले थप गतिविधि बढाएपछि गठबन्धनले एमालेलाई समेट्न लागेको हो ।
‘संसदवादी र शान्ति प्रक्रियामा रहेका दलहरू एक ठाउँमा रहनपर्छ भनेर कार्यक्रम गरियो । त्यसपछि ओली पनि नजिक नजिक हुनुहुन्छ मिल्नुपर्छ भनेर भन्ने समाचार पनि आए,’ उनले भने, ‘अहिले कांग्रेस र माओवादी, माओवादी र एमाले, कांग्रेस र एमाले बसेको अवस्था छ । हेरौं के हुन्छ ।’
एमालेलाई पनि सहभागी गराएर चुनावमा जाने कि भन्ने कुरा पार्टीभित्र चलेको तर निर्णयमा कांग्रेस नपुगेको बताएका छन् । ‘कुरा चलेको मात्र हो । हुन्छ नि भन्ने अवस्थामा कांग्रेस पुगेको छैन,’ विश्वकर्माले बताए ।
राष्ट्रिय सभा चुनावमा गणतन्त्रविरोधी दल राप्रपाको एकल उम्मेदवार खडा गरेर चुनाव जिताउन सक्नेगरिको मतभार छैन । कुनै पनि प्रदेशमा तेस्रो दलकोसम्म हैसियत छैन । तैपनि, राप्रपाले आगामी फागुनदेखि लगातार वर्तमान राजनीतिक व्यवस्था परिवर्तनका लागि लगातार आन्दोलन गर्ने घोषणा गरिसकेको छ ।
बुधबार भैरहवामा देशको अन्तिम राजा ज्ञानेन्द्रले राप्रपाका नेताहरूलाई राप्रपाले गर्ने भनेको आन्दोलनको तयारीबारे जानकारी लिएको प्रवक्ता सगुनसुन्दर लावतीले बताए । पार्टी अध्यक्ष राजेन्द्र लिङ्देन, वरिष्ठ उपाध्यक्ष रवीन्द्र मिश्र, उपाध्यक्ष बुद्धिमान तामाङ, महामन्त्री डा. धवलशमशेर जबरा र सांसद दीपक सिंहसँग शाहको भेट भएको हो । यहीबेला गठबन्धन र एमाले भने राष्ट्रिय सभा चुनावमा एकताबद्ध भएर अघि बढ्ने माहोल सिर्जना गर्न व्यस्त छन् ।
२० फागुनमा एमालेबाट राष्ट्रिय सभा अध्यक्ष भएका गणेश तिमिल्सिना, प्रमुख सचेतक भैरवसुन्दर श्रेष्ठ, इन्दु कडरिया, कुमार दसौंदी, दीपा गुरुङ, दिलकुमारी रावल थापा (पार्वती), नरपति लुवार, रामचद्र राई र डा. विमला राई पौड्यालको पदावधि सकिँदै छ ।
कांग्रेस राष्ट्रिय सभा दलका नेता रमेशजंग रायमा
झी, प्रमुख सचेतक अनिता देवकोटा, प्रकाश पन्थ र जितेन्द्रनारायण देवको पदावधि पनि फागुन २० मा सकिने छ । माओवादीका विना पोखरेल, महेशकुमार महरा र हरिराम चौधरी तथा एकीकृत समाजवादीका नन्दा चपाईं र सिंगबहादुर विश्वकर्मा, जसपाका प्रमिलाकुमारी यादव र स्वतन्त्रका डा. खिमलाल देवकोटाको पनि पदावधि फागुन २० मा सकिने छ ।
चुनावमा नगरपालिकाका प्रमुख÷उपप्रमुख तथा गाउँपालिकाका अध्यक्ष/उपाध्यक्ष र प्रदेश सांसदहरू मतदाता छन् । उनीहरूको मतभार छुट्टाछुट्टै छ । उनीहरूकै मतभारकै आधारमा उम्मेदवारहरूको जित÷हार हुने गरेको छ ।
