काठमाडौं– बिहीबार बिहान बालुवाटारमा बसेको सत्ता गठबन्धनको बैठकमा प्रमुख प्रतिपक्ष दल नेकपा एमालेले राष्ट्रियसभाको माघ ११ गते हुने निर्वाचनमा ६ सिट मागेको छ ।
‘एमालेले राष्ट्रियसभाका ६ सिट मागेको हो । शान्ति प्रक्रिया टुंग्याउन एमालेलाई पनि सहमतिमै लिएर जाउ भन्ने मेरो प्रयास हो, के गर्न सकिन्छ ?’, गठबन्धनको बैठकमा माओवादी अध्यक्ष समेत रहेका प्रचण्डले भनेका थिए ।
बैठकमा चार दलबिचको एकतामा असर नगर्ने गरी राष्ट्रियसभामा एमालेलाई पनि सँगै लैजान सकिनेमा नेताहरूले जोड दिएका थिए ।
‘चार दलबिचको एकतामा आँच नआउने गरी र टीआरसी तत्काल पारित हुने गरी एमालेलाई पनि समेटेर लान सकिन्छ भन्ने कुरा भयो’, नेकपा एकीकृत समाजवादीका उपाध्यक्ष राजेन्द्र पाण्डेले भने, ‘हिजो समितिका सभापति दिने सवालमा पनि दुईवटा सभापति टीआरसी बिल पारित गर्नका लागि भनेर दिइएको हो । तर त्यसपछि ओलीको भाषा फेरियो ।’
नेता पाण्डेले आजै कानुन समितिको बैठक बस्ने र त्यसमा एमालेको भाषा कस्तो आउँछ सोही अनुसार अघि बढ्ने गठबन्धनको तयारी रहेको पनि बताए ।