काठमाडौं– वैदेशिक रोजगार विभागले बेलायत रोजगारीमा जान अन्तिम छनोटमा परेका नर्सहरुलाई निःशुल्क अभिमुखीकरण तालिम दिने जनाएको छ । विभागले निःशुल्क तालिमका लागि सम्पूर्ण प्रक्रिया पूरा गरी अन्तर्वार्ताबाट अन्तिम छनोटमा परेका नर्सहरुको नामावलीसमेत सार्वजनिक गरेको छ ।
बेलायत रोजगारीका लागि मापदण्ड पूरा गरी आवेदन दिएका ७१ जनामध्ये अन्तर्वार्तामा ४५ जना नर्स छनोट भएका थिए । तीमध्ये विभिन्न कारणले तीनजना ‘ड्रप आउट’ भएपछि विभागले तालिममा सहभागी हुने ४२ जना नर्सको मात्रै नामावली सार्वजनिक गरेको छ ।
विभागले मंगलबार एक सूचना जारी गर्दै बेलायत जान अन्तिम छनोटमा परेका नर्सहरुलाई यही फागुन ८ गतेदेखि निःशुल्क रूपमा पूर्वप्रस्थान अभिमुखीकरण तालिम दिने उल्लेख गरेको छ । तालिम भैँसेपाटीस्थित राष्ट्रिय व्यावसायिक प्रशिक्षण प्रतिष्ठानमा हुने भएकाले छनोट भएका उम्मेदवारहरुलाई अनिवार्य सहभागी हुन विभागले आग्रह गरेको छ ।
अभिमुखीकरण तालिममा सहभागी हुनु बेलायत जाने प्रक्रियाको सुरुआत भएको विभागका निर्देशक एवं सूचना अधिकारी कविराज उप्रेतीले बताए । ‘तलिमपश्चात् उनीहरुलाई बेलायत पठाउने प्रक्रिया अघि बढ्छ,’ उनले भने, ‘तालिम सँगसँगै भिसाको प्रोसेस पनि भइरहेको छ, त्यसपछि विभागले श्रम स्वीकृति उपलब्ध गराएर बेलायत पठाउने छ ।’ बेलायत रोजगारीका लागि तयार भएका नर्सहरुहरुलाई आगामी मार्चभित्र पठाइसक्ने निर्देशक उप्रेतीले जानकारी दिए ।
दक्ष जनशक्तिको उच्च माग रहेको बेलायतको स्वास्थ्य क्षेत्रमा ‘हेल्थ केयर एसिस्टेन्ट’को रुपमा १०० जना नेपाली नर्सलाई पठाउने गरी सरकारले गत साउन ४ गते अर्थात् २० जुलाई २०२३ मा आवेदन माग गरेको थियो । जसमा ७७१ जनाले आवेदन दिएका थिए । तोकिएको मापदण्डअनुसार विस्तृत जाँचपछि ७१ जना योग्य भए पनि ६० जनाले मात्रै अन्तर्वार्ता दिएका थिए ।
नेपाल र बेलायत सरकारबीच सन् २०२२ को अगस्टमा जिटुजी प्रक्रियामार्फत बेलायतमा नर्स पठाउनेसम्बन्धी समझदारीपत्रमा हस्ताक्षर भएको थियो । सोही आधारमा नर्सलाई बेलायतमा रोजगारीको अवसर दिनेगरी ‘पाइलट प्रोजेक्ट’ तयार गरिएको हो । पहिलो चरणमा छनोट भएका नर्सलाई बेलायल पठाउने काम सम्पन्न भएपछि अर्को चरणमा प्रवेश गर्ने बताइएको छ ।
जिटुजी सम्झौताअनुसार बेलायतको रोजगार भर्ना प्रक्रियामा कुनै पनि व्यक्ति, रोजगारदाता, संघसंस्था वा म्यानपावर कम्पनी वा एजेण्टको सहभागिता निषेध गरिएको छ । साथै रोजगारीका लागि छनोट भएका नर्सहरुले कुनै पनि शुल्क बुझाउनुपर्ने छैन । यद्यपि, उनीहरुले तीन महिना तालिम लिएर त्यहाँको नर्सिङ काउन्सिलमा पनि अनिवार्य दर्ता हुनुपर्ने व्यवस्था गरिएको छ । त्यस्तै श्रम समझदारीअनुसार स्वास्थ्य सेवामा कार्यरत रहँदा नेपाली नर्सहरुको सेवा सुविधा र अधिकार बेलायती स्वास्थ्यकर्मीसरह हुने छ । यो प्रक्रियाबाट बेलायत जाने नर्सहरुको कार्यअवधि पाँच वर्षको हुने छ ।
