काठमाडौं– चालु आर्थिक वर्ष २०८०/८१ को सातौं महिना अर्थात् माघमा वैदेशिक रोजगारीका लागि ६२ हजार बढी नेपाली श्रमिक विदेशिएका छन् । वैदेशिक रोजगार विभागले सार्वजनिक गरेको विवरणअनुसार माघ महिनामा ६२ हजार १४७ जना नेपाली नयाँ तथा पुनः श्रम स्वीकृति लिएर रोजगारीका लागि ९९ वटा मुलुकमा गएका छन् ।
माघमा विदेशिने नेपालीको संख्या गत पुस महिनाको भन्दा तीन हजार ६६६ ले घटेको देखिएको छ । पुसमा ६५ हजार ८१३ जनाले वैदेशिक रोजगारीका लागि श्रम स्वीकृति लिएका थिए । यसअघि गत मंसिर महिनामा ७१ हजार २७६ जनाले श्रम स्वीकृति लिएका थिए ।
चालु आवको सुरुआती महिनादेखि नै संयुक्त अरब इमिरेट्स (युएई) नेपाली श्रमिकहरुको पहिलो गन्तव्य बन्न सफल भएको छ । विभागको तथ्यांकअनुसार युएईका लागि माघ महिनामा १७ हजार ६०२ जनाले श्रम स्वीकृति लिएका छन् । गत पुस महिनामा युएई जाने नेपालीको संख्या १६ हजार ३८५ रहेको थियो ।
यस्तै माघ महिनामा रोजगारीका लागि साउदी अरेबिया जान १२ हजार ३६६ जनाले श्रम स्वीकृति लिएका छन् । दोस्रो स्थानमा परेको साउदी जाने नेपालीको संख्या पुस महिनाको भन्दा एक हजार ९४१ ले कम रहेको छ । त्यसैगरी तेस्रो स्थानमा रहेको कतारमा १२ हजार १६४ जना श्रम स्वीकृति लिएर पुगेका छन् । यसअघि पुस महिनामा कतार जाने नेपालीको संख्या १३ हजार १४ रहेको थियो । चालु आव सुरु भएयता कतार र साउदी जाने नेपालीको संख्या हराहारी जस्तो देखिए पनि युएई जाने संख्यामा उल्लेख्य बृद्धि भएको विभागको तथ्यांकले देखाएको छ ।
यसैगरी गत आर्थिक वर्षभरि पहिलो स्थान ओगटेको मलेसिया सात महिनासम्म पनि चौथो स्थानमै रहेको छ । माघमा मलेसिया जान छ हजार ७९५ जनाले श्रम स्वीकृति लिएका छन् । यस्तै पाँचांै स्थानमा परेको कुवेतमा तीन हजार २५३ जना नेपाली श्रमिक रोजगारीका लागि पुगेका छन् । कुवेत जाने श्रमिकहरुको संख्या पनि क्रमशः बढेको देखिएको छ । उल्लिखित पाँच मुलुकले नै नेपालको वैदेशिक रोजगारीको ठूलो हिस्सा (झण्डै ८० प्रतिशतभन्दा बढी) ओगटेको विभागको तथ्यांकले देखाएको छ ।
यसैगरी रोमानिया एक हजार ३९७, जापान एक हजार २८०, बहराइन ९२३, मोरिसस जान ६२२, क्रोएसिया ५८३, माल्दिभ्स ५६८, ओमान ४४८ र साइप्रसका लागि ४२६ जनाले श्रम स्वीकृति लिएका छन् । त्यस्तै माघ महिनामा इपिएस प्रणालीबाट दक्षिण कोरिया जाने नेपालीको संख्या एक हजार ६६० रहेको छ ।
विभागबाट कूल श्रम स्वीकृति लिनेमध्ये पुनः श्रम स्वीकृति लिने ३१ हजार ३९८ जना छन् भने पहिलोपटक विदेश जान श्रम स्वीकृति लिनेको संख्या ३४ हजार ४१५ जना रहेका छन् । चालु आवको छैटौंैं महिनामा श्रम स्वीकृति लिनेमध्ये छ हजार ८४ जना महिला श्रमिक रहेको विभागले उल्लेख गरेको छ । पछिल्लो समय वैदेशिक रोजगारीका लागि युरोपेली मुलुकमा जान श्रम स्वीकृति लिने नेपालीको संख्या क्रमिक रुपमा बढ्दै गएको विभागको तथ्यांकबाट देखिएको छ ।
धेरै श्रमिक गएका मुलुक
युएई – १७,६०२
साउदी– १२,३६६
कतार– १२,१६४
मलेसिया– ६,७९५
कुवेत– ३,२५३
रोमानिया– १,३९७
जापान– १,२८०
बहराइन– ९२३
मोरिसस– ६२२
क्रोएसिया– ५८३
