काठमाडौं– वैदेशिक रोजगार विभागअन्तर्गतको इपिएस शाखाले यस वर्ष दक्षिण कोरियाको उत्पादनमूलक (म्यानुफ्क्याचरिङ) क्षेत्रमा जाने कामदार भर्ना प्रक्रियाका लागि कोरियन भाषा परीक्षा सुरु गरेको छ । भैँसेपाटीस्थित राष्ट्रिय व्यावसायिक प्रशिक्षण प्रतिष्ठानमा सोमबारबाट भाषा परीक्षा सुरु भएको हो ।
कोरियन भाषा परीक्षाका लागि ठूलो संख्याले आवेदन दिएका कारण यस वर्ष तीन चरणमा लिइने परीक्षा अवधि लामो हुने शाखाले जनाएको छ । पहिलो चरणमा ४७ हजार ५१९ जना परीक्षार्थी सहभागी हुँदै छन् । प्रत्येक दिन पाँच सिफ्टमा सञ्चालन हुने परीक्षामा एक हजार जनाले परीक्षा दिने व्यवस्था मिलाइएको छ । एक सिफ्टमा २०० जना परीक्षार्थीले परीक्षा दिन पाउने छन् ।
एचआरडी कोरियाले सन् २०२४ का लागि नेपालबाट उत्पादनमूलक क्षेत्रमा १५ हजार ८४८ जना कामदारको माग गरेकोमा एक लाख ६३ हजार ६३५ जना परीक्षार्थीले आवेदन दिएको इपिएस शाखाकी निर्देशक मैयाँ कडेलले बताइन् । ‘यति ठूलो मात्रामा आवेदन परेपछि परीक्षालाई व्यवस्थित, पारदर्शी र म¥यादित बनाउन तीन चरणमा परीक्षा सञ्चालन गर्ने निर्णय भएको छ,’ उनले भनिन्, ‘अपेक्षा गरिएको भन्दा बढी परीक्षार्थी भएपछि तीन चरणमा हुने भाषा परीक्षा सम्पन्न गर्न लामै समय लाग्ने देखिएको छ ।’ तीनै चरणमा हुने भाषा परीक्षाको तालिका र सहभागी संख्यासमेत शाखाले सार्वजनिक गरिसकेको निर्देशक कँडेलले जानकारी दिइन् ।
शाखाले सार्वजनिक गरेको तालिका अनुसार सोमबारबाट सञ्चालन भएको पहिलो चरणको परीक्षा आगामी चैत २४ गते सकिने छ । दोस्रो चरणको परीक्षा २०८१ वैशाख ३१ गतेदेखि सोही वर्षको साउन १६ गतेसम्म सञ्चालन हुने छ । जसमा ७९ हजार ९३७ जना परीक्षार्थी सहभागी हुने छन् । त्यस्तै २०८१ कात्तिक २६ गतेदेखि सोही वर्षको पुस २ गतेसम्म सञ्चालन हुने तेस्रो चरणको परीक्षामा ३६ हजार १७९ जना परीक्षार्थी सहभागी हुने छन् । शाखाले सार्वजनिक गरेको तालिका अनुसार भाषा परीक्षा अवधि झण्डै एक वर्षको हुने छ ।
परीक्षा शनिबार पनि सञ्चालन हुने शाखाले जनाएको छ । एचआरडी कोरियाको प्रत्यक्ष निगरानीमा सञ्चालन हुने परीक्षामा मोबाइल फोन, स्मार्टवाचलगायतका कुनै पनि विद्युतीय सञ्चारका साधनहरु लैजान निषेध गरिएको छ । परीक्षामा चिट चोर्ने, नक्कल गर्नेलगायतका अवाञ्छित गतिविधि गरेको भेटिएमा परीक्षा रद्द गर्नुका साथै चार वर्षसम्मका लागि परीक्षामा सहभागी हुन नदिने व्यवस्था गरिएको शाखाले जनाएको छ ।
परीक्षार्थीहरुले आफ्नो परीक्षा कुन दिन कुन सिफ्टमा पर्छ भन्ने थाहा पाउन इपिएस शाखाको वेवसाइटबाट यकीन गर्नुपर्नेछ । परीक्षाको एक दिनअघि सिफ्टअनुसार इपिएस शाखा ग्वार्कोमा बायोमेट्रिक दर्ताका लागि उपस्थित हुनुपर्ने छ । त्यस्तै बायोमेट्रिक भेरिफिकेसन गर्न एक घण्टा अगाडि परीक्षा केन्द्रमा पुग्नु पर्ने छ भने परीक्षा सुरु हुनु ३० मिनेट अगाडि अभिमुखीकरण कक्षा सञ्चालन हुने छ । तोकिए अनुसार प्रक्रिया पुरा गरी निर्धारित समयमा उपस्थित नभए परीक्षार्थीलाई परीक्षामा सहभागी हुन नदिने शाखाले प्रस्ट पारेको छ ।
