काठमाडौं– प्रदेशबाट श्रम स्वीकृति लिनेको संख्यामा वृद्धि भएको छ । सरकारले वैदेशिक रोजगारसँग सम्बन्धित सम्पूर्ण सेवाहरु प्रदेशस्तरबाटै दिन थालेपछि श्रम स्वीकृति लिने कामदारको संख्यामा वृद्धि भएको हो । श्रम रोजगार तथा सामाजिक सुरक्षा मन्त्रालयले वैदेशिक रोजगारीसँग सम्बन्धित सेवाहरु विकेन्द्रीत गरेर सातै प्रदेशबाट दिन थालेपछि श्रम स्वीकृति लिनेको संख्यामा वृद्धि भएको हो ।
सरकारले वैदेशिक रोजगारीको लागि २०७५ सालदेखि प्रदेशस्तरमा रहेका श्रम तथा रोजगार कार्यालयबाट पुनः श्रम स्वीकृति दिँदै आएकोमा गत वर्षदेखि सबैखाले श्रम स्वीकृतिका सेवा प्रवाह गर्ने निर्णय गरेको थियो । जस अन्तर्गत चालु आर्थिक वर्षको छ महिनामा ५७ हजार १५९ जनाले वैदेशिक रोजगारीको लागि श्रम स्वीकृति लिएको वैदेशिक रोजगार विभागले जनाएको छ । विभागको तथ्यांकअनुसार श्रम स्वीकृतिका सम्पूर्ण सेवा दिन थालेपछि गत आव २०७९÷८० मा ५२ हजारको संख्यामा श्रम स्वीकृति लिएका छन् । गत आवको तुलनामा चालु आवको ६ महिनामा नै ५७ हजार बढीले श्रम स्वीकृति लिएर रोजगारीको लागि बाहिरिएका छन् ।
पुनः श्रम स्वीकृतिको मात्रै सेवा दिइरहेका प्रदेशका श्रम कार्यालयबाट नयाँ व्यक्तिगत तथा संस्थागत श्रम स्वीकृति दिन थालेपछि सेवाग्रहीको संख्या बढ्न थालेको विभागका महानिर्देशक डण्डुराज घिमिरेले बताए । ‘आफूलाई पायक पर्ने ठाउँबाट सेवा लिन पाएपछि काठमाडौं नै धाउनुपर्ने बाध्यता हटेको छ,’ उनले भने, ‘जसका कारण प्रदेश कार्यालयमा कार्यव्यस्तता र सेवाग्राहीको चाप बढेको छ ।’ सबै श्रम तथा रोजगार कार्यालयबाट अनलाइनमार्फत संस्थागत, व्यक्तिगत र पुनः श्रम स्वीकृति सेवा प्रवाह भइरहेको महानिर्देशक घिमिरेले बताए ।
हाल वैदेशिक रोजगार कार्यालय काठमाडौंको अलवा सातै प्रदेशका श्रम तथा रोजगार कार्यालय विराटनगर, जनकपुर, पोखरा, बुटवल, सुर्खेत र धनगढीबाट श्रम स्वीकृतिलगायत वैदेशिक रोजगार सम्बन्धी सेवाहरु प्रवाह भइरहेको विभागले जनाएको छ । त्यस्तै ३२ वटाभन्दा बढी म्यानपावर कम्पनीका शाखा कार्यालय र ४० भन्दा बढी अभिमुखीकरण तालिमप्रदायक संस्थाहरुले प्रदेश कार्यालयहरुबाटै सेवा लिइरहेको बताइएको छ ।
