काठमाडौं– गायक तुलसी सिवाकोटीको नयाँ गीत ‘भन्देउ मायाले’को म्युजिक भिडियो सार्वजनिक भएको छ । डीपी खनालको शब्द र विश्व अधिकारीको संगीत तथा एरेन्जमेन्ट रहेको गीतको भिडियोमा नयाँ डान्सग्रुप फ्युचर क्रु र अञ्जिता कँडेललाई फिचरिङ गरिएको छ ।
प्रहिल कार्कीको निर्देशनमा बनेको भिडियोमा आवेश बज्राचार्यको सिनेमाटोग्राफी र माधव बेल्बासेको सम्पादन रहेको छ । फ्युचर क्रु चितवनमा रहेर विभिन्न साँगीतिक कार्यक्रमहरूमा नृत्य गर्दै आइरहेको चितवनको लोकप्रिय डान्स समूह हो । एक कार्यक्रमको सिलसिलामा निर्देशक प्रहिल कार्की चितवन जाँदा उनीहरूको प्रस्तुतीबाट प्रभावित भएपछि उनीहरूलाई काठमाडौं बोलाई म्युजिक भिडियोमा अवसर दिएका हुन् ।
लामो समयदेखि प्रवासमा रहेर नेपाली गीतसंगीतमा निरन्तर रूपमा अगाडि बढिरहेका यूरोप निवासी गायक तुलसी सिवाकोटीले युरोपको हरेक देशमा मात्र नभएर यूरोपबाहिर रहेका बिभिन्न देशहरूमा समेत आफ्नो प्रस्तुति दिइसकेका छन् । यसअघि करिब दुई दर्जनभन्दा बढी गीत बजारमा ल्याइसकेका गायक सिवाकोटीको ‘हे माया’, ‘तिम्रो मेरो प्रेम कहानी’, ‘म त मान्छे सिधा साधा’, ‘प्यारी छोरी न बचाउन सके’जस्ता गीतहरू लोकप्रिय छन् । पाश्र्वगायनमा समेत आफ्नो स्वर दिइसकेका गायक सिवाकोटीको देश तथा बिदेशमा गरिने कार्यक्रममा प्रस्तुति निकै दमदार रहने गरेको छ ।
