काठमाडौं - वैदेशिक रोजगारीका लागि विभिन्न मुलुक पठाइदिन्छु भन्दै प्रलोभनमा पारी ठगी गरेको आरोपमा म्यानपावर सञ्चालकसहित दुईजना पक्राउ परेका छन् । पक्राउ पर्नेमा सप्तरीको बोदेबर्साइन नगरपालिका–६ घर भई हाल काठमाडौं बबरमहल बस्ने सन्तोषकुमार चौधरी र पाथिभारा एचआर म्यानपावरकी सञ्चालक गोमा गिरी क्षेत्री रहेका छन् ।
चौधरीले राजलाल मुखियालाई कतार पठाई मासिक ६० हजार रुपैयाँ तलवमा एक प्रतिष्ठित कम्पनीमा काम लगाइदिने प्रलोभनमा पारी रकम ठगी गरेको प्रहरीले जनाएको छ । उनले पीडितसँग पटक–पटक गरी एक लाख ९० हजार रुपैयाँ लिएर फरार भएको प्रहरी अनुसन्धाबाट खुलेको छ । फरार रहेका चौधरीलाई खोजतालासका क्रममा बबरमहलबाटै पक्राउ गरिएको बताइएको छ ।
त्यस्तै म्यानपावर कम्पनी सञ्चालन गर्दै आएकी गिरीले राजकुमार थापालाई मासिक एक लाख ५० हजार रुपैयाँ तलब हुने गरी माल्टाको एक प्रतिष्ठित कम्पनीमा काम लगाइदिने भन्दै ठगी गरेको बताइएको छ । उनले पीडितबाट पटक–पटक गरी १४ लाख रुपैयाँ लिएर सम्पर्कविहीन भई ठगी गरेको प्रहरीले उल्लेख गरेको छ । फरार अवस्थामा रहेकी गिरीलाई सुकेधाराबाट पक्राउ गरिएको प्रहरीले जनाएको छ ।
उनीहरुले पीडितबाट रकम लिएर सम्पर्कविहीन भएको उजुरीका आधारमा वैदेशिक रोजगार विभाग काठमाडौंले पक्राउ गरी उपस्थित गराइदिन प्रहरीलाई पत्राचार गरेको थियो । सोही आधारमा पक्राउ परेका उनीहरुलाई थप अनुसन्धान तथा कारबाहीका लागि विभागमा बुझाइएको काठमाडौं उपत्यका अपराध अनुसन्धान कार्यालयका प्रहरी उपरीक्षक रविन्द्र रेग्मीले जानकारी दिए ।
