काठमाडौं– राष्ट्रियसभाका सांसदहरुले सरकारले मुलुकमा सुशासन ल्याउनेगरी प्रभावकारी ढङ्गले काम गर्नुपर्नेमा जोड दिएका छन् । राष्ट्रियसभाको आजको बैठकको शून्य समयमा सांसद जितजङ्ग बस्नेतले सरकारले जनताको पक्षमा मुलुकमा सुशासन ल्याउने गरी काम गर्नुपर्नेमा जोड दिए।
सांसद कृष्णबहादुर रोकायाले रुकुम पश्चिमको मुसिकोट नगरपालिका–११ र १२ मा पर्ने पृतीबाङ खोलामा पुल निर्माणका लागि ठेक्का लागेर सम्झौता भएको चार महिना हुँदा पनि काम सम्पन्न नभइ अलपत्र छोडिएको भन्दै सरकारको ध्यानाकर्षण गराए ।
सांसद पदमबहादुर परियारले सङ्घीय संसद भवन अपाङ्गतामैत्री हुनुपर्ने माग गरे। सांसद पूजा चौधरीले राष्ट्रिय परिचय पत्र बनाउने क्रममा महिला र पुरुषमा विभेद गरिएको भन्दै सरकारको ध्यानाकर्षण गराए ।
सांसद मनरुपा शर्माले किसानका उत्पादनको बजार व्यावस्थापन गर्नुपर्नेमा जोड दिए । सांसद रुकमणि कोइरालाले महिला र बालबालिको अपहरण, अपहरणपछि बलात्कार र बलात्कारपछि हत्या गर्ने घटना बढ्दै गएको भन्दै अपराधमा संलग्नलाई कारबाहीको दायरामा ल्याउनुपर्ने माग गरे । सांसद विष्णुकुमारी सापकोटाले गर्मी मौसमको सुरुवातसँगै बाँके जिल्लामा फैलिएको औँलोलाई जतिसक्दो चाँडो रोकथामका लागि पहल गर्नुपर्नेमा जोड दिए ।
सांसद विष्णुदेवी पुडासैनीले सरकारले जनतालाई केन्द्रमा राखेर काम गर्नुपर्ने माग गरे । सांसद सावित्री मल्लले संविधानमा उल्लेख महिलाका अधिकारलाई कानून बनाएर कार्यान्वयन गर्नुपर्ने बताए । सांसद विष्णुबहादुर विश्वकर्माले पनि मुलुकको समसायिक विषयमा सरकारको ध्यानाकर्षण गराए ।
