काठमाडौं– श्रम, रोजगार तथा सामाजिक सुरक्षामन्त्री डोलप्रसाद (डीपी) अर्यालले वैदेशिक रोजगार कार्यालय ताहाचलको अनुगमन गरेका छन् । श्रम स्वीकृति लगायतका वैदेशिक रोजगार सम्बन्धि भइरहेका गतिविधिको निरीक्षण तथा जानकारी लिने उद्देश्यले मन्त्री अर्याल बिहीबार अनुगमनका लागि ताहाचल पुगेका हुन् ।
श्रम स्वीकृतिलगायत सेवा प्रवाहमा भइरहेको ढिलासुस्तीप्रति गुनासो आइरहेको भन्दै मन्त्री अर्यालले छिटोछरितो सेवा उपलब्ध गराउन कर्मचारीलाई निर्देशनसमेत दिए । मन्त्री अर्यालले निर्देशन दिनेमात्र नभई श्रम स्वीकृति प्रदान गर्ने प्रक्रिया ढिला हुनुका कारण र समस्याको विषयमा पनि जानकारी लिएको उनको सचिवालयले जनाएको छ । श्रम स्वीकृति प्रक्रियालाई सहज र सरल बनाउन यस अघि नै निर्देशन दिएका मन्त्री अर्यालले सेवाग्राहीलाई एक घण्टामा सेवा उपलब्ध गराउनुपर्नेमा जोड दिए ।
‘सेवाग्राहीलाई सरल र सहज ढंगबाट सेवा उपलब्ध गराउन प्रत्येक कर्मचारीलाई श्रम स्वीकृतिको लागि निश्चित कोटा तोकिन्छ,’ उनले भने, ‘बिदाको दिनमा पनि श्रम स्वीकृति प्रदान गर्ने व्यवस्था मिलाइनुका साथै श्रम स्वीकृतिको लागि तोकिएको कोटा हटाइनेछ ।’
मन्त्री अर्यालको अनुगमनपश्चात श्रम कार्यालयको कार्यलाई गति दिन २० वटा कम्प्यूटर अपटेड गरिएको छ भने कर्मचारीलाई तीन वटा सिफ्टमा काम गर्न लगाइएको सचिवालयले उल्लेख गरेको छ । श्रम स्वीकृतिको प्रक्रियालाई सहज बनाउन पुनः श्रम स्वीकृतिलाई एउटै तहले स्वीकृत गर्ने व्यवस्था मिलाउन मन्त्रालयले तयारी गरिरहेको बताइएको छ ।
अहिले भइरहेको संरचनाअनुसार संस्थागत श्रम स्वीकृतिको लागि १३ जना कर्मचारीले कागजपत्र प्रमाणीकरण गर्ने र सात जना कर्मचारीले स्वीकृत प्रदान गर्ने व्यवस्था छ । त्यस्तै, व्यक्तिगत श्रम स्वीकृतितर्फ १५ जनाले कागजपत्र प्रमाणीकरण गर्ने र सात जना कर्मचारीले प्रमाणीकरण गर्ने व्यवस्था छ । स्वीकृति प्रक्रियालाइ सरल र सहज बनाउन अबदेखि व्यक्तिगत श्रम स्वीकृतितर्फ २२ जना कर्मचारीले नै श्रम स्वीकृति प्रदान गर्ने व्यवस्था मिलाउने मन्त्रालयको तयारी छ ।
हाल पुनः श्रम स्वीकृतिको लागि दैनिक एक हजार ५०० देखि दुई हजार र एक हजार जनाले नयाँ श्रम स्वीकृतिको लागि आवेदन दिने गरेको श्रम कार्यालयले जनाएको छ । अझैपनि टोकन प्रणालीमा चलिरहेको सेवा प्रवाहलाई सहजै सेवाग्राहीको हातहातै (मोबाइल)मा पुर्याउन मन्त्रालयले अवश्य गृहकार्य गरिरहेको पनि सचिवालयले उल्लेख गरेको छ ।
