काठमाडौं - नेपाल कम्युनिष्ट पार्टी (माओवादी केन्द्र)ले इलाम मा हुन लागेको उपनिर्वाचनमा उम्मेदवारी दिने भएको छ । प्रधानमन्त्री निवास बालुवाटारमा आज बसेको पार्टीको पदाधिकारी बैठकले उम्मेदवारी दिने निर्णय गरेको हो ।
बैठकमा प्रधानमन्त्री एवम् पार्टी अध्यक्ष पुष्पकमल दाहाल ‘प्रचण्ड’ले मुलुकको पछिल्लो राजनीतिक अवस्था र समसामयिक राजनीतिक विषयमा जानकारी गराएका थिए । बैठकपछि सञ्चारकर्मीसँग कुरा गर्दै उपाध्यक्ष एवम् प्रवक्ता अग्निप्रसाद सापकोटाले इलाम क्षेत्र नं २ र बझाङ क्षेत्र नं १ को प्रदेशसभा ‘क’ मा पार्टीका तर्फबाट उम्मेदवारी दिने निर्णय भएको जानकारी दिए ।
उम्मेदवारको नाममा छलफल बाँकी रहेको र आगामी बैठकमा आवश्यक निर्णय गरिने उनको भनाइ छ । ती क्षेत्रका उम्मेदवारको नाम सिफारिस भएर आएपछि आवश्यक निर्णय हुने माओवादी केन्द्रले जनाएको छ ।
यस्तै, प्रदेश सरकारको विषयमा छलफल भए पनि सत्तागठबन्धनमा आबद्ध दलहरुका बीचमा आवश्यक परामर्शपछि निर्णय गरिनेछ । बिहीबारसम्म प्रदेश सरकारका बारेमा टुङ्गो लगाउने तयारी छ ।
