काठमाडौं– युद्धरत मुलुक रुसमा जाने नेपालीहरुका लागि श्रम स्वीकृति खुला गरिएकोप्रति संघीय संसद्मा सांसदहरुले प्रश्न उठाएका छन् । आइतबार र सोमबारको प्रतिनिधिसभा बैठकको विशेष समयमा नेपाली कांग्रेसका सांसदहरु रमा कोइराला पौड्याल र प्रदीप पौडेलले युद्धग्रस्त मुलुकमा युवाहरुलाई धकेल्नेगरी किन श्रम स्वीकृति दिइयो ? भनी प्रश्न उठाएका हुन् ।
सांसद कोइरालाले आइतबारको संसद् बैठकमा युद्धग्रस्त क्षेत्र र देशमा रोजगारीका लागि भन्दै श्रम स्वीकृति दिनु भनेको नेपालीहरुलाई जबरजस्ती युद्धमा धकेल्नु रहेको बताइन् । उनले यस्तो कार्य तत्कालै रोक्नुपर्ने माग गरिन् ।
‘रुस र युक्रेन युद्धका कारण थुप्रै नेपाली युवाले मृत्युवरण गरिसकेका छन्,’ उनले भनिन्, ‘युद्धमा फसेका युवाहरु हामीलाई फर्काइदेऊ भन्दै रोइरहेका छन्, यस्तो समयमा सरकारले नै श्रम स्वीकृति दिएर रुस जाऊ भन्नुको अर्थ मृत्युको मुखमा धकेल्नु हो ।’ उनले देशमा बेरोजगार युवाहरू धेरै भए भनेर श्रम स्वीकृति दिँदै सरकारले मृत्युको बाटो खुलाएको भन्दै आक्रोश व्यक्त गरिन् ।’ देशमा रोजगारी दिन सकिएन भनेर युद्धग्रस्त मुलुका नेपालीलाई पठाउने कार्य स्वीकार्य नहुने उनको भनाइ छ । सांसद कोइरालाले श्रम स्वीकृति दिएर उनीहरुलाई मर्न जाऊ भनेर पठाउन नपाइने बताइन् ।
यस्तै सोमबारको प्रतिनिधिसभा बैठकमा सांसद प्रदीप पौडेलले पनि श्रम, रोजगार तथा समाजिक सुरक्षा मन्त्रालयले रुसका लागि खुलाएको श्रम स्वीकृति कसको स्वार्थमा आएको हो भन्दै प्रश्न गरे । उनले रोजगारीको नाममा मानव तस्करीलाई अनुकूल हुनेगरी श्रम स्वीकृति दिइएको आरोप लगाए । ‘श्रम मन्त्रालयले मानव तस्करीमा अनुकूल हुन गरी किन श्रम स्वीकृति दिइरहेको छ ?,’ उनले प्रश्न गरे । श्रम स्वीकृति दिनुमा गम्भीर स्वार्थ लुकेको भन्दै उनले रुसी सेनामा जाने नेपालीको संख्या बढाउन सरकार नै अग्रसर भएको आरोप लगाए ।
‘रुसी सेनामा रहेका नेपालीहरुको उद्धार गर्नुको साटो श्रम स्वीकृति दिएर पठाउनुले गम्भीर प्रश्न खडा गरेको छ,’ उनले भने, ‘पछिल्लो समय रुसी सेनामा कति संख्यामा नेपाली छन् भन्नेसमेत सरकारलाई थाहा छैन, उनीहरु कस्तो अवस्थामा छन् पूरै वेखबर छ ।’ रुसी सेनामा रहेका नेपालीहरुको सरकारले खोजी गर्ने चेष्टा नै नगरेको भन्दै सांसद पौडेलले पीडित परिवार र उनीहरुसँग काम गरेको स्वयंसेवीहरुले बताएअनुसार ७०० भन्दा बढी नेपाली रहेको उल्लेख गरे ।
