काठमाडौं – नेपाल बास्केटबल संघ(नेबा)ले ट्यालेन्ट हन्ट कार्यक्रम आयोजना गर्ने भएको छ । त्रिपुरेश्वरस्थित रहेकाे नेबाले सोमबार एक सूचना जारी गर्दै यो वर्ष एसइई दिएका विद्यार्थीहरूलाई लक्षित गर्दै ट्यालेन्ट हन्ट कार्यक्रम गर्न लागेको जनाएको हो ।
बास्केटबलमा करियर बनाउन चाहने र यस खेलबाट राष्ट्रको प्रतिनिधित्व गर्न चाहने युवाहरूलाई लक्षित गर्दै ट्यालेन्ट हन्ट कार्यक्रम गर्न लागिएको नेबाले जनाएको छ ।नेबाका अनुसार यो ११औं ट्यालेन्ट हन्ट कार्यक्रम हो ।
ट्यालेन्ट हन्ट वैशाख ६ गतेदेखि विभिन्न स्थानमा सुरू हुने नेबाका अध्यक्ष भीमसिंह गुरुङले जानकारी दिए । ‘हामीले स्कुलदेखि नै खेलाडी उत्पादन गर्ने योजनासहित ट्यालेन्ट हन्ट कार्यक्रम गर्दैछौं । यस पटक काठमाडौं उपत्यकासहित काभ्रेमा ट्यालेन्ट हन्ट कार्यक्रम गर्नेछौं ।’ उनले बताए ।
गुरुङका अनुसार काठमाडौंको तीन र ललितपुरका दुई स्थानमा ट्यालेन्ट हन्ट कार्यक्रम हुनेछ । यस्तै भक्तपुर र काभ्रेको एक-एक स्थानमा कार्यक्रम हुनेछ । ट्यालेन्ट हन्टमा सहभागी हुन विद्यार्थीहरूले चैत २८ देखि वैशाख ४ गतेसम्म नेबाकाे कार्यलयमा गएर फर्म भर्नुपर्नेछ ।
उत्कृष्ट खेलाडीहरूलाई स्कलरसिप प्रदान गरिने नेबाले जनाएको छ । नेबाका अध्यक्ष गुरुङका अनुसार पुरुष ६ र महिला ६ गरी कूल १२ खेलाडीलाई कक्षा ११ र १२ अध्यनका लागि छात्रवृति प्रदान गरिने छ ।
