- उपेन्द्र यादवबाट अलग्गिएका नेताहरुले नयाँ दलको अध्यक्षमा अशोक राई र महासचिवमा मोहम्मद इस्तियाक राईलाई प्रस्ताव गरिएको छ
- सरकारका उपप्रधान तथा स्वास्थ्यमन्त्रीसमेत रहेका यादवले सरकार छाड्नसाथ राई नेतृत्वको जसपा सत्तामा जाने
- एकीकृत समाजवादीका अध्यक्ष माधवकुमार नेपाललाई एमाले र कांग्रेसबाटसमेत प्रधानमन्त्रीको ‘अफर’
- आफ्नो दलमा बचेखुचेको शक्ति जोगाउन प्रधानमन्त्री पुष्पकमल दाहालले राजीनामा दिएरै नेपाललाई प्रधानमन्त्री बनाउने सम्भावना रहेको चर्चा
काठमाडौं– शनिबारमात्र जनता समाजवादी पार्टी (जसपा) नेपालका प्रवक्ता मनिष सुमनले माधवकुमार नेपालबारे भनेका थिए– जम्मा १० सिट भएको पार्टीको नेता प्रधानमन्त्री बन्न असम्भव छ । हुन पनि नेपाल नेतृत्वको एकीकृत समाजवादी १० सिटसहित सातौ दल हो, प्रतिनिधिसभामा । जसपा भने १२ सिटसहित छैटौं दल । यी दुई दल मिलेर पुष्पकमल दाहाल नेतृत्वको सरकार ढाल्ने परिचर्चा चल्दै गर्दा प्रवक्ता सुमनले यो तर्क प्रस्तुत गरेका थिए ।
तर एक दिन नबित्दै उनको तर्क खेर गएको छ । किनकि जसपा फुटेर पाँच सांसदमा झर्ने भएको छ । जसपाकै नेता अशोक राईको अध्यक्षतामा अर्को जनता समाजवादी पार्टी निर्वाचन आयोगमा दर्ताका लागि निवेदन परेको छ । आइतबार राईसहित सात सांसद पुगेर आयोगमा दल दर्ताका लागि निवेदन दिएका हुन् । आयोगमा नयाँ दल दर्ता भएमा सुमन प्रवक्ता रहेको पार्टी जनमतभन्दा पनि मुनि अर्थात् नवौं दलमा झर्ने छ ।
जसपा अध्यक्ष उपेन्द्र यादव अमेरिकाबाट भोलि मंगलबार नेपाल आइपुग्ने कार्यक्रम छ । उनी नेपाल नआइपुग्दै उनको पार्टी फुटतिर लागेको हो । जसपा फुटेपछि प्रवक्ता सुमनले आफ्नो पार्टी फुटेको नभई चोइटिएको तर्क गरेका छन् । अध्यक्ष यादव अमेरिकामा भएकोले उनको कुनै प्रतिक्रिया बाहिर आएको छैन ।
नयाँ पार्टीमा कसको पद के ?
नयाँ दलको अध्यक्षमा अशोक राई र महासचिवमा मोहम्मद इस्तियाक राईलाई प्रस्तावित गरिएको छ । पुराना कम्युनिस्ट नेता अशोक जसपामा वरिष्ठ नेताको हैसियतमा थिए । इस्तियाक पूर्वमन्त्री हुन् । उनी गत निर्वाचनमा बाँके २ मा पराजित भएका थिए ।नयाँ पार्टीको नाम जनता समाजवादी पार्टी नै प्रस्ताव गरिएको छ । निर्वाचन आयोगले निवेदन दर्ता गरे पनि दल दर्ता भइनसकेको जसपाकी सांसद सुशीला श्रेष्ठले बताइन् । ‘हामी दिउँसो ४ बजे नै पुगेका थियौ । तर सनाखतदेखि विभिन्न प्रक्रियाले ढिला भयो,’ श्रेष्ठले भनिन् ।
पार्टीमा एक सहअध्यक्ष र चार उपाध्यक्ष प्रस्तावित छन् । सहअध्यक्षमा रेणुकुमारी यादव छिन् भने उपाध्यक्षहरुमा नवलकिशोर साह सुडी, रणध्वज लिम्बू, परशुराम बस्नेत र सुशीला श्रेष्ठ रहेका छन् ।यस्तै प्रदीप यादवलाई उपमहासचिवमा प्रस्ताव गरिएको छ भने दीपक कार्की र रञ्जु झा सचिव छन् । कोषध्यक्षमा डा. वीरेन्द्र महतोलाई प्रस्ताव गरिएका छन् । विवादास्पद छविका नेता आङकाजी शेर्पाले अशोक राईलाई रोजेका छन् । उनी केन्द्रीय सदस्यमा प्रस्तावित छन् । वीरगञ्ज महानगरपालिकाका मेयर राजेशमान सिंह पनि राईतिरै लागेका छन् ।
बार्गेनिङ पावर बढाउँदै माधव नेपाल
जसपा फुटपछि एकीकृत समाजवादीका अध्यक्ष नेपालको बार्गेनिङ पावर झनै बढ्ने देखिएको छ । नेपाललाई भारतीय पक्षले प्रधानमन्त्री बनाउन चाहिरहेको बताइएको छ । मधेस राजनीतिका एक जानकारका अनुसार जसपा फुटाएर नयाँ दल दर्ताका लागि आयोग पुगेकाहरु भारतीय चाहनामा चल्ने नेताहरु हुन् । उनीहरुकै सहयोगमा नेपाल प्रधानमन्त्री बन्ने वातावरण तय हुने बताइएको छ ।
सुरुमा दाहाल नेतृत्वको सरकारलाई सघाएर एमालेका अध्यक्ष केपी शर्मा ओलीनिकट बन्ने र पछि नेपाललाई साथ दिने रणनीतिका साथ पार्टी फुटेको बताइन्छ । सरकारका उपप्रधान तथा स्वास्थ्यमन्त्रीसमेत रहेका यादवले सरकार छाड्नासाथ राई नेतृत्वको जसपा सत्तामा जाने छ । त्यसपछि नयाँ समीकरणको सरकार बन्ने सम्भावना रहेको छ । नेपाललाई एमाले र कांग्रेसबाटसमेत प्रधानमन्त्रीको ‘अफर’ पुगेको बताइएको छ ।
यस्तो अवस्थामा आफ्नो दलमा बचेखुचेको शक्ति जोगाउन बरु दाहाल राजीनामा दिएरै नेपाललाई प्रधानमन्त्री बनाउने निचोडमा पुगेको स्रोतको भनाइ छ । एमाले र कांग्रेसको निकटताका कारण दाहाल त्रसित छन् । यसै विषयमा दाहालले शुक्रबार मध्यरात ओली र गृहमन्त्री रवि लामिछानेसँग छलफल गरेका थिए ।
कांग्रेस भने दाहाललाई जसरी पनि कर्नरमा पुर्याउने रणनीतिका साथ ओली र नेपाललाई प्रधानमन्त्री बनाएरै अगाडि बढ्नेगरी अघि बढेको सभापति शेरबहादुर देउवानिकट नेताको दाबी छ । ‘कांग्रेसका तीनथरी प्लान छन्, प्लान ए– देउवा आफैं प्रधानमन्त्री बन्ने, नभए ओलीलाई अघि बढाउने उनी नमाने माधव नेपाललाई नेतृत्व दिने,’ ती नेताले भने ।
‘उपेन्द्र यादवको कार्यशैलीका कारण पार्टी फुट्यो’
अशोक राई
अध्यक्ष, जसपा
पार्टी फुटाउनुभएको कि नयाँ दल दर्ता भएको ?
यो पार्टी विभाजन हो । संसदीय दलबाट नै विभाजन गरिएको हो ।
यस्तो बेला किन फुटाउनुपर्यो पार्टी ?
यस्तो निर्णय गर्नैपर्ने आवश्यकता पर्यो । पार्टी महाधिवेशनको सँघारमा भएकोले हो । पार्टी महाधिवेशनजस्तो संवेदनशील विषय समेट्नुपर्नेमा हतारोमात्रै गर्ने र असंवैधानिक ढंगले अगाडि बढ्ने चेष्ट भएपछि सहन हुन्न भनेर हामी लागेका हौं । एकताको महाविधेशन भनिएकोमा विधानमा भएका व्यवस्थालाई मिचेर कुल्चेर काम गर्न थालियो । अर्को। कार्यशैलीको भिन्नता देखियो । अहिले जसपा नेपालमा उपेन्द्र यादवको कार्यशैली असहमतिका कारण यो अवस्था सिर्जना भयो ।
सरकारलाई दिएको समर्थन के हुन्छ ?
हामी अस्थिरताको कारक बन्दैनौ ।
सत्ता समीकरण फेरबदल हुन लागेको हो ?
देखिने रुपमा केही आएको छैन । छस्सछुस्स केही देखिएको हो ।
उपेन्द्र यादव नयाँ समीकरणतिर जान लागेकोले हो पार्टी फुटेको ?
अस्थिरताका संकेत देखिन थालेको हुनाले यस्तो पनि हुन सक्छ कि । तर हामी यसमा सामेल हुँदैनौं ।
भनेपछि तपाईंहरुको साथ रहन्छ दाहाल नेतृत्वको सरकारलाई ?
अहिले सरकारलाई हाम्रो साथ रहन्छ ।
