काठमाडौं–प्रमुख विपक्षी दल नेपाली कांग्रेसका प्रवक्ता विश्वप्रकाश शर्माले कोरोना भाइरसको संक्रमणबाट जोगिन नेपालले सम्पूर्ण सतर्कता अपनाउनुपर्ने सुझाव दिएका छन् ।
कांग्रेस केन्द्रीय कार्यालयमा सोमबार आयोजित पत्रकार सम्मेलनमा उनले यस्तो सुझाव दिएका हुन् । उनले विश्वव्यापी रूपमा फैलिइरहेको कोरोना भाइरस (कोभिड १९) नेपालमा प्रवेश गरे ठुलो मानवीय क्षति हुने हुनाले सतर्कता अपनाउन सुझाव दिएका हुन् । उनले मुलुकले सतर्कताको पर्याप्त पूर्वतयारी गर्न सकेन र जोखिमसँग जुध्न सकेन भने त्यसले ठूलो मानवीय क्षति हुने हुनाले सावधानी अपनाउनुपर्ने उनको भनाई थियो ।
कांग्रेसले विश्व स्वास्थ संगठन (डब्लूएचओ) ले उच्च जोखिममा रहेकोे राष्ट्र भनेर नेपाललाई घोषित गरिसकेको स्थितिमा जोखिम सामना गर्न नेपाल गम्भिर हुनुपर्ने अवस्था आउने बताए । कोरोना संक्रमित मुलुकको सूची जारी गरेर ती देशमा नेपालीको भ्रमणमा अस्थायी रूपले तत्काल रोक लगाउन र संक्रमण फैलिएका मुलुकहरूसँग नेपालीको उद्धार गर्नुपर्ने स्थितिमा बाहेक दोहोरो उडानमा तत्काल रोक लगाउन कांग्रेसले आग्रह गरेको छ ।
प्रवक्ता शर्माले अन्तर्राष्ट्रि«य विमानस्थलको स्थलगत अध्ययनमा जाँचको प्रक्रिया काम चलाउ प्रकृतिको फितलो देखिएको आरोप लगाए । प्रवक्ता शर्माले प्रवेशद्वारमा कठोर ढङ्गको कडाइ गरिएन भने र भाषणका मञ्चबाट सतर्कताको अपिल मात्रै जारी गर्दा स्थिति भयावह हुन सक्नेतर्फ सरकारको ध्यान गराए । स्थलमार्गबाट नेपाल प्रवेश गर्ने नाकामा केरुङको नाकामा कडाइ गरिएको भए पनि अन्य नाका खासगरी तराई–मधेसका सबै सीमा नाकाबाट सोमबार मध्याह्नसम्म निर्वाध प्रवेश जारी रहेको उनले बताए ।
साथै ती नाकाहरूमा पनि तत्काल कडाइ शुरु गर्न विशेष स्वास्थ्य जाँच केन्द्र स्थापना गर्न उनले माग गरे । केन्द्र, प्रदेश र स्थानीय तहका सरकार र राज्यका विभिन्न निकायबीच आवश्यक समन्वय अभिवृद्धि गरेर सम्भावित जोखिम सामना गर्ने कार्ययोजना चुस्त ढंगले अघि बढाउन प्रवक्ता शर्माले सुझाव दिए । संक्रमण भए नभएको ठहर गर्ने ‘राष्ट्रिय जनस्वास्थ्य प्रयोगशाला’ मा परीक्षण ‘कीट’ को कमी हुनसक्ने र परीक्षणका लागि दक्ष जनशक्तिको अभाव हुनसक्ने खतरालाई समयमै ध्यान पुर्याइ आवश्यक बन्दोबस्त यथाशीघ्र मिलाउन उनले आग्रह गरे । चीनको वुहान शहरबाट १८० नेपालीलाई उद्धार गरेर ल्याउन दुई साता लामो छलफल, अन्यौल र विवाद भएको बताउँदै उनले ठूलो संख्यामा नेपाली रहेकोे दक्षिण कोरिया लगायतका कतिपय देशमा कोरोनाको संक्रमण तीव्र ढङ्गले फैलिएको र त्यहाँ रहेका नेपालीलाई संक्रमणबाट सुरक्षित गर्न तथा अत्यावश्यक परे उद्धार गनुपर्ने बताए ।
प्रवक्ता शर्माले वुहानबाट ल्याइएका नेपालीलाई राखिएको क्वारेन्टाइन आगामी दिनमा अपर्याप्त हुनसक्ने खतरालाई दृष्टिगत गर्दै वैकल्पिक दर्जनौँ क्वारेन्टाइन निर्माण गर्नुपर्ने बताए ।
