सरकारले समस्याग्रस्त सहकारीको सूचीमा फेरि नौ वटा सहकारी थपेको छ । कुनैबेला सहकारीलाई विकासको चार खम्बामध्ये एक मानेको सरकारले अहिले भने विभेदकारी नीति अपनाउँदै आएको छ । जसका कारण दिनानुदिन सहकारी डुब्ने क्रममा छ । सहकारी डुब्नु सर्वसाधारणको बचत जोखिममा पर्नु हो ।
सहकारीमा बचतकर्ताले किन आफ्नो कमाई राख्छन् ? प्रस्ट छ, बैंकमा भन्दा बढी ब्याज आम्दानी गर्न । बढी ब्याज आम्दानी गर्न सहकारीले जोखिम मोलेर घरजग्गामा लगानी गर्छ । यसरी नै बैंकहरुले पनि सहकारीमार्फत घरजग्गामा लगानी गरेको धेरै अघिदेखि हो । तर जब सरकारले घरजग्गा व्यवसाय कस्न थाल्यो, अर्थतन्त्र बिस्तारै ओरालो लाग्न थाल्यो ।
सहकारीको रकम घरजग्गामा लगायतका ठूला व्यवसायी पनि समस्यामा पर्न थाले । अहिले हजारौं यस्ता लगानीकर्ता मौनता साँधेर बस्न बाध्य छन् । सरकारको यस्तो नीतिकै कारण गोरखा मिडिया नेटवर्कको ग्यालेक्सी टिभी सञ्चालकदेखि अर्थ टेलिभिजनका सञ्चालक फरार भए । सञ्चारमाध्यमका उद्यमी भएकै कारण उनीहरु फरार भएको चाँडै नै मिडियामा छाए । यस्ता धेरै सञ्चालक समस्याबाट भाग्ने क्रममा छन् ।
यही बेला सरकारकै उपप्रधान तथा गृहमन्त्री रवि लामिछाने सहकारी समस्याका कारण विवादमा तानिएका छन् । उनकै कारण अहिले सरकारले यस प्रकरणमा छानबिन गर्न सात सदस्यीय संसदीय छानबिन विशेष समिति गठन गरेको छ । समितिलाई सहकारीमा अहिले देखिएका समस्याहरु पहिचान गरी बचतकर्ताको रकम फिर्ता गर्न सुझाव पेस गर्ने कार्यदेश पाएको छ ।
सहकारीको समस्या समाधानका लागि यसअघि नै समस्याग्रस्त सहकारी व्यवस्थापन समिति क्रियाशील छ । संसद्को सहकारी समिति पनि छ । यसैगरी भूमि व्यवस्था मन्त्रालयअन्तर्गत सहकारी विभाग पनि सक्रिय छ । यी समिति हुँदाहुँदै सरकारले समग्र सहकारीको समस्या हेर्न अर्को संसदीय समिति गठन गर्नु पहिलो त अचम्मकै विषय हो । किनकि संसदीय समिति गृहमन्त्री लामिछानेलक्षित गरी माग गरिएको थियो । यदि ‘न्यारो डाउन’ गरी समिति गठन गरेको भए यसको काम अघि बढ्ने विश्वास गर्न सकिन्थ्यो ।
तर, विशाल विषयलाई लिएर सात जनालाई जिम्मेवारी दिएको यो समितिले यो काम तीन महिनामा त के तीन वर्षमा पनि पार लाग्ने देखिन्न । यद्यपि दलहरुले विश्वास गरेर सदस्यको छनोट नै गरिसकेको छ । यस्तो अवस्थामा यो समितिले के कसरी काम गर्ने हो कुनै प्रस्टता छैन । यद्यपि दलहरुले नै विश्वास गरेकोले बचतकर्ताको बचत सुरक्षित पार्न र बाँकी समस्या समाधानमा समितिले निष्पक्ष रुपमा काम गरोस् । र, चाँडो निष्कर्ष निकालोस् ।
-1736657698.jpg)
