काठमाडाैं - आफ्नो गीत गाउने या संगीत सिर्जना गर्ने सपना पुरा गर्नकै निम्ती यो क्षेत्रमा लाग्नेको संख्या धेरै छन् जसमा नारायण थापा पनि एक हुन् । निरन्तर रुपमा यो क्षेत्रमा लागिरहने अठोटका साथ सांगीतिक क्षेत्रमा सक्रिय थापाले महिना दिनको अन्तरालमा दुई गीत श्रोता माझ पस्केका छन् । उनले हालै सार्वजनिक गरेको ‘जुन मायाको पुजा गरें’ र ‘दिलमा आगो सल्कायौ’बाट पुष्टि हुन्छ, उनमा गीत, संगीतप्रतिको लगाब कति छ भन्ने ।
२०७२ सालमा पहिलो गीति संग्रह ‘अजम्बरी’ ल्याएका गायक थापाको गीति संग्रहभित्र चोखो मायामा, आज मृत्युले मलाई, रातभरि आएर तिम्रो याद, जलाएँ तिम्रा सारा तस्बिर, तिमीलाई नै सँधै किन लगायतका गीतहरु संग्रहित छन् । गीतकारहरु डा.राजुबाबु श्रेष्ठ, बीबी थापा, रमेश दाहाल, शुशिला पौडेल, डब्बु क्षेत्रीको शब्द एवं केशब पौडेल र गायक थापाकै संगीत रहेको उक्त संग्रहमा भुपेन्द्र रायमाझी र पुष्कर सुनुवारको संगीत संयोजन रहेको छ ।
पहिलो गीति संग्रहबाटै आफुलाई स्थापित गराउन सफल गायक थापाको २०७७ मा दोस्रो गीति संग्रह ‘परिवेस’ तथा २०७९ मा ‘आकर्षण’ गीति संग्रह बजारमा आइसकेको छ भने चाँडै नै ‘आभुषण’ गीति संग्रह बजारमा आउने क्रममा रहेको छ । गीतकारहरु काली प्रसाद रिजाल, राजेन्द्र थापा, आनन्द अधिकारी डा.कृष्णहरी बराल दिनेश सुवेदी, दिनेशराज पुरी तथा संगीतकारहरु अर्जुन पोखरेल बसन्त सापकोटा, दिपक शर्मा, गैरे सुरेश, शिखर सन्तोषजस्ता दिग्गज संगीत हस्तीसँगको सहकार्यमार्फत आफुलाई प्रमाणित गरिसकेका थापा स्थापित र चर्चित गायकसँगै कुशल संगीतकार समेत हुन् ।
आजकलका मुना मदन, एउटा यस्तो पुल बनास्, चोखो माया, लेख्या माया पाइएन, माया जालैमा, नघोच यो छाती, तिम्रो आकर्षणले, तिम्रो मुटु मेरो मुटुलगायतका गीतको सफलताले उनलाई यो क्षेत्रमा क्रियाशिल हुन थप उर्जा मिलेको छ । चर्चामा रहेका यि गीतहरुले थापाको सांगीतिक यात्रालाई अझै फराकिलो बनाउन मद्दत पुग्ने विश्वास गर्न सकिन्छ ।
हालै बजारमा आएको ‘जुन मायाको पुजा गरें’ तथा ‘दिलमा आगो सल्कायौ तिमीले’ गीतको सफलताबाट हौसिएका गायक, थापा भन्छन्, ‘थुप्रै गीतहरु रेकर्ड भएर बसेका छन्, केही दिनमा नै नयाँ गीत आउँदैछ, करिब एक दर्जन गीतहरु रेकर्डिङको क्रममा छन् । पुराना रेकर्ड भएर बसेका गीति संग्रहका तथा फुटकर गीतहरुलाई डिजिटल अडियो प्लेटफर्ममार्फत चाडै नै आभुषण इन्टरटेन्मेन्टको सहकार्य मार्फत बजारमा आउँदैछ ।’ दुई दशकदेखि नेपाली गीत संगीतमा निरन्तर क्रियाशिल र समर्पित कुशल गायक थापा गीतसंगीत उत्पादन तथा बितरण कम्पनी आभुषण इन्टरटेन्मेन्टका सिईओसमेत हुन् ।
सुगम संगीतलाई अंगालेर अघि बढिरहेका अहिलेका लोकप्रिय गायक नारायण थापा भन्छन् ‘रातारात भाइरल बन्ने बजारीया गीतभन्दा पनि कालजयी पछिल्लो पुस्तालेसमेत मनपराउने गीत, संगीतलाई नै निरन्तरता दिन सकूँ र गाउन पाइयोस् भन्ने लाग्छ ।’
