काठमाडौं - ब्लड डोनर्स असोसियसन्स् नेपाल (ब्लोदान)ले विश्व रक्तदाता दिवस-२०२४ भव्य रुपले सम्पन्न गरेको छ । विश्व स्वास्थ्य संगठनलको सहकार्यमा ब्लोदानले ‘रक्तदान उत्सवको दुई दशक, सम्पूर्ण रक्तदाताहरुलाई धन्यवाद’ नाराका साथ शनिबार काठमाडौंको नेपा बैंक्वेटमा एक समारोह गरी "विश्व रक्तदाता दिवस -२०२४ " भव्य रुपले सम्पन्न गरेको हो ।
ब्लोदानले सन् २००४ देखि नै साप्ताहिक कार्यक्रम गर्दै यो दिवस मनाउँदै आईरहेको छ । यसै अनुरुप यस वर्षमा पनि विभिन्न संघ संस्थाहरुसंग सहकार्य गर्दै गत जेष्ठ २६ गते साइकल र्याली, २७ गते हस्पिटलका प्रतिनितिहरु बिच अन्तरक्रिया तथा २८ गते विद्यालयस्तरीय चित्रकला प्रतियोगिता तथा महिला अन्तरक्रिया, २९ गते विद्यालयस्तरीय वक्तृत्वकला प्रतियोगिता र ३० गते रक्तदान कार्यक्रम आयोजना गरी ३२ गते (१४ जुन)का दिन सम्पूर्ण रक्तदान गर्ने संघसंस्थाहरु र रक्तदाताहरुलाई धन्यबाद दिने कार्यक्रम सम्पन्न गरेको हो ।
ब्लोदानका केन्द्रीय अध्यक्ष ई.सानु बाबु प्रजापतिको सभापतित्वमा र ब्लोदानका संरक्षक एवं वरिष्ठ संचार उद्यमी भाष्करराज राजकर्णिकारको प्रमुख आतिथ्यमा सम्पन्न रक्तदाता दिवस संगठनले सम्पन्न गरेको हो ।उक्त कार्यक्रममा रक्तदाता अभिवृद्धि गर्न उत्प्रेरणा जगाउन विभिन्न विधा अन्तर्गतका १२ वटा रनिङ शिल्ड वितरण गरेको थियो भने विभिन्न २९ जना रक्तदाताहरुलाई पटकको आधारमा सिल्भर, गोल्डेन तथा डायमण्ड पीनले सम्मान गरेको थियो ।उक्त कार्यक्रममा ब्लोदानका उपाध्यक्ष राजेश श्रेष्ठले स्वागत गरेका थिए भने केन्द्रीय अध्यक्ष ई. सानु बाबु प्रजापतिले कार्यक्रमबारे जानकारी गर्दै रक्तदान जस्ता महत्वपूर्ण कार्यमा सबैलाई सहकार्य गर्न आह्वान गरेका थिए । ब्लोदानका संस्थापक तथा वरिष्ठ सल्लाहकार सूर्यकुमारी श्रेष्ठले ब्लोदानले विगत लामो समयदेखि रक्तदानमा गरेको योगदानको चर्चा गरेका थिए ।
त्यस्तै गरी पूर्व प्रदेश सभासद नरोत्तम बैद्यले रक्तदान अभियान सफल पार्न सबै क्षेत्रको सहकार्य अपरिहार्य भएको बताए भने नेपाल रेडक्रस सोसाइटीका केन्द्रीय अध्यक्ष प्रा। डा। सुदर्शन प्रसाद नेपालले ब्लोदानले विगत लामो समयदेखि गर्दै आइरहेको स्वयंसेवी रक्तदान अभियानको प्रशंसा गर्दै रेडक्रसले यस्ता महान कार्यमा सहयोग तथा सहकार्य हुने बताए ।
कार्यक्रमका अतिथिहरुमा नेपाल रेडक्रस सोसाइटीका केन्द्रीय अध्यक्ष प्रा. डा. सुदर्शन प्रसाद नेपाल विशेष अतिथि, ब्लोदानका संस्थापक तथा वरिष्ठ सल्लाहकार सूर्यकुमारी श्रेष्ठ अतिथि तथा जनस्वास्थ्य कार्यालय काठमाडौंका डा. अर्जुन प्रसाद सापकोटा, पूर्व प्रदेश सभासद नरोत्तम बैद्य लगायत ब्लोदानका वरिष्ठ सल्लाहकारहरु, विभिन्न ब्लड बैंकका प्रमुखहरु, सहयोगी संस्थाका प्रमुखहरु उपस्थिति रहेको थियो ।
प्रमुख अतिथिको मन्तव्य राख्दै ब्लोदानका संरक्षक एवं वरिष्ठ संचार उद्यमी भाष्करराज राजकर्णिकारले ब्लोदानले गर्दै आइरहेको कार्यको प्रशंसा गर्दै अझ सबै क्षेत्रसँग सहकार्य गरी स्वस्फूर्त रक्तदान गराउने वातावरण बनाउनु पर्ने र युवाहरुमा रक्तदान सम्बन्धी उत्प्रेरणाका कार्यक्रमहरु लैजानु पर्ने धारणा राखेका थिए । कार्यक्रम ब्लोदानका महासचिव केशब महर्जनले संचालन गरेका थिए भने स्वागत मन्तव्य ब्लोदानका केन्द्रीय उपाध्यक्ष राजेश श्रेष्ठले गरेका थिए ।
