काठमाडौं– सत्तारुढ दल राष्ट्रिय स्वतन्त्र पार्टी (रास्वपा)का महामन्त्री डा. मुकुल ढकालको समीक्षा प्रतिवेदनले रास्वपामा हलचल पैदा भएको छ । उनको प्रतिवेदको सार पक्ष भनेको रास्वपा जनविश्वासको गम्भीर संकटमा छ भन्ने हो । पार्टीको लोकप्रियता पूरै खस्किएको र रास्वपाप्रति नागरिकमा निराशा पैदा भएको पनि भनिएको छ ।
यी मूलभूत पक्षलाई समेटेर तयार गरिएको प्रतिवेदन महामन्त्री ढकालले पार्टी सभापतिसमेत रहेका उपप्रधान तथा गृहमन्त्री रवि लामिछानेलाई बुझाइसकेका छन् । तर, उनले लामिछानेलाई प्रतिवेदन बुझाउनुभन्दा अघि नै प्रतिवदेनको सार मिडियाबाट सार्वजनिक भएपछि लामिछाने रिसाएका छन् । पार्टी नेतृत्वसँग छलफलै नगरी समीक्षा प्रतिवेदन मिडियालाई दिएको विषयमा उनीमाथि कारबाहीसमेत हुन सक्ने बताइएको छ ।
प्रतिवेदनमा उनले पार्टी बिरामी अवस्थामा रहेको र निको पार्न सामान्य सिटामोलले नभई शल्यक्रिया नै गर्नुपर्ने निचोड सुनाएका छन् । यति मात्र होइन, प्रदेश खारेजी र जनताबाट चुनिने प्रत्यक्ष कार्यकारीको पक्षमा उभिन पनि उनले सुझाएका छन् ।
प्रतिवेदनमा उनले अहिलेकै अवस्थामा चुनावमा गए पार्टीले निराशाजनक परिणाम पाउने पनि बताएका छन् । लामिछानेनिकट नेताहरूले महामन्त्री ढकाललाई जिम्मेवारीमुक्त गर्नुपर्ने आवाज उठाउन थालेको एक नेताले बताए । प्रतिवेदन बुझाउनुअघि नै ढकाल स्वयम्ले आफू कारबाहीमा पर्ने संकेत गरेका थिए । यद्यपि, बुधबार साँझ लामिछानेले आफ्नो पार्टी लोकतान्त्रिक विधिअनुसार चलेको भन्दै यसकै आधारमा कारबाही नगर्ने बताएका थिए ।
तर, उनी महामन्त्री ढकालले पहिल्यै प्रतिवेदन सार्वजनिक गरेको विषयमा रुष्ट रहेको बुझिएको छ । उनीनिकट नेताहरूले महामन्त्री ढकाललाई कारबाही गर्नुपर्ने सुझाव दिएको ती नेताले बताए । बिहीबार संसद भवनबाट निस्कने बेला शिशिर खनाल लगायत सांसदलाई महामन्त्री ढकालको प्रतिवेदनबारे गम्भीर समीक्षा गरिने बताएका छन् । ''महामन्त्रीलाई हामीले नै दलको समीक्षा यात्रामा पठाएका हौँ । उहाँले यात्रापछि लेख्नुभएको प्रतिवेदन अहिले सभापतिकहाँ छ । त्यहाँ केही हामीलाई झस्काउने विषय छन्’, उनले भने, ''। त्यसबारे गम्भीर छलफल गर्छौँ ।’
स्रोतका अनुसार भने लामिछानेबाहेक उपसभापति स्वर्णिम वाग्ले, डिपी अर्याललगायत पदाधिकारीले ढकालको प्रतिवेदन हेर्न वा छुनसम्म पाएका छैनन् । मुलुक घुमेर आएका महामन्त्री मुकुल ढकाल यतिबेला आफैं आफ्नो प्रतिवेदन सार्वजनिक गरिपाउँ भनेर सभापति लामिछानेलाई गुहारिरहेका छन् । उनले प्रतिवेदन सार्वजनिक नगरुञ्जेल पार्टी केन्द्रीय समिति बैठकसमेत राख्न नदिने ढकालको तयारी छ ।
डोल्पाको शे फोक्सुन्डोनेर बसेर लेखेको भनिएको प्रतिवेदनले रास्वपा महामन्त्री ढकाललाई चर्चाको केन्द्रमा ल्याइदिएको हो । पार्टी सञ्चालनको वर्तमान पद्दति परिवर्तन नगरे २०८४ सालमा रास्वपा सकिने चेतावनीयुक्त प्रतिवेदन ढकालको छ । रास्वपाप्रति जनमत अत्यन्तै निराशाजनक रहेकाले आशामा बदल्नका लागि कठोर निर्णय लिनुपर्ने प्रतिवेदनमा उनले उल्लेख गरेका छन् ।
उनले भने, 'पार्टीलाई २०८४ मा गाह्रो हुने होइन के यस्तै तरिकाले पार्टी चले शतप्रतिशत पार्टी सकिन्छ’, ढकालले भने । बालेनसँग दूरी बढाए थप क्षति हुने पनि ढकालको प्रतिवेदनमा उल्लेख छ । पछिल्लो समय लामिछानेको सम्बन्ध बालेनसँगको टुटिसकेको स्रोतले जनाएको छ ।
