केयर गिभरमा परेका स्वीकृत आवेदनहरु नामावली परीक्षणका लागि पाठाइसकिएको छ । अब कसरी लैजाने, के गरी लैजाने त्यो गन्तव्य मुलुकको कुरा भयो, हामीले गर्नुपर्ने काममा अलमल हुँदैन ।
डण्डुराज घिमिरे
महानिर्देशक, वैदेशिक रोजगार विभाग
काठमाडौं– इजरायलले नेपालबाट दीर्घकालीन स्याहार केन्द्रमा काम गर्नेगरी सहायक कामदार (केयर गिभर)लाई छिट्टै लैजाने तदारुकता देखाएको छ । केयर गिभरका लागि प्राप्त आवेदनको प्रमाणीकरण गरी वैदेशिक रोजगार विभागले स्वीकृत गरेका आवेदन छनोटका लागि इजरायलको सम्बन्धित निकाय पिवालाई पठाएसँगै प्रक्रिया छोट्याएरै भए पनि छिट्टै लैजाने तयारी गरिरहेको बताइएको छ ।
इजरायलले जतिसक्दो छिटो केयर गिभर लैजान पाए हुन्थ्यो भन्ने प्रतिक्रिया दिएको विभागका एक अधिकारीले बताए । उनका अनुसार छनोट प्रक्रियालाई छोटो बनाएर भए पनि इजरायलले छिट्टै कामदार लैजान खोजेको छ । ‘जति सकिन्छ चाँडो कामदार लैजान प्रक्रिया टुंग्याउन इजरायली पक्षबाटै आग्रह भएको छ,’ ती अधिकारीले भने, ‘उनीहरुकै आग्रहमा छनोट प्रक्रिया अघि बढिरहेको छ ।’
इजरायलले केयर गिभरमा जानेले थप अंग्रेजी भाषा परीक्षा उत्तीर्ण गर्नुपर्ने भए पनि अब ब्रिटिस काउन्सिलबाट लिएको भाषा परीक्षालाई नै मान्यता दिन तयार भएको बताइएको छ । ‘पटक–पटक बसेको द्विपक्षीय जुम मिटिङबाट छोटो प्रक्रियाबाट कसरी कामदार लैजान सकिन्छ भन्ने सम्बन्धमा छलफल भइरहेको छ,’ ती अधिकारीले भने, ‘अब इजरायल जाने कामदारले थप अंग्रेजी भाषा पास गर्नु पर्दैन ।’ अन्य प्रक्रिया पनि छोट्याउने विषयमा कुरा भइरहेको उनले बताए । अघिल्लोपटक उचाइ तथा तौल परीक्षणसँगै लिखित परीक्षा तथा अन्तर्वार्तासमेत गरिएकोमा यसपटक उचाइ तथा तौल परीक्षण स्वास्थ्य परीक्षणकै समयमा हुने बताइएको छ ।
इजरायलले प्रक्रिया छोटो बनाएरै भए पनि छिटो कामदार लैजान खोजेको विभागका महानिर्देशक डण्डुराज घिमिरेले बताए । उनका अनुसार यस विषयमा सम्बन्धित शाखा (इजरायल÷जापान)ले विस्तृत रुपमा कुराकानी गरिरहेको छ । ‘केयर गिभरमा परेका स्वीकृत आवेदनहरु ‘नेम चेक’ (नामावली परीक्षण) का लागि पाठाइसकिएको छ,’ उनले भने, ‘अब कसरी लैजाने, के गरी लैजाने त्यो गन्तव्य मुलुकको कुरा भयो, हामीले गर्नुपर्ने काममा अलमल हुँदैन ।’ सबै प्रक्रिया पूरा गरेर सेप्टेम्बरको अन्तिमसम्ममा केयर गिभर लैजाने इजरायली चाहना रहेको उनले बताए ।
विभागले गत असार ११ गते इजरायल जान इच्छुक केयर गिभरको आवेदन माग गरेको थियो । जसमा चार हजार २४ जनाले आवेदन दिएकामा तीन हजार ४६१ जनाको मात्रै स्वीकृत भएको थियो । विभागले आवश्यक कागजात परीक्षण गरेर साउन २१ गते नै तीन हजार ४६१ जनाको सूची पिवालाई पठाएको छ । उक्त सूचीबाट गोलाप्रथामार्फत दुई हजार केयर गिभर छनोट हुने छन् । यसरी गोलाप्रथाबाट अन्तिम नामावली छानिएपछि विभागले कामदारलाई स्वास्थ्य परीक्षणका लागि पठाउने छ ।
इजरायलले दीर्घकालीन स्याहार केन्द्रमा बच्चा, युवा तथा ६५ वर्ष ननाघेका गम्भीर अपांगता भएका व्यक्तिको हेरचाह तथा स्याहार गर्न नेपालबाट केयर गिभरको माग गर्दै आएको जनाएको छ । यसअघि नेपालबाट केयर गिभरमा काम गर्न झण्डै एक हजार २०० नेपाली इजरायल गइसकेको विभागले जनाएको छ । केयर गिभरमा छनोट हुनेले मासिक पाँच हजार ८८० सेकेल इजरायली मुद्रा अर्थात् दुई लाख १० हजार रुपैयाँभन्दा बढी पारिश्रमिक पाउने छन् । यसरी जाने कामदारको करार अवधि सुरुमा एक वर्षको हुने छ । त्यसपछि बढीमा पाँच वर्षसम्म थप गर्न पाइने छ ।
