काठमाडौं– चालु आर्थिक वर्ष २०८१/८२ को पहिलो महिना अर्थात् साउनमा वैदेशिक रोजगारीका लागि झण्डै ६० हजार नेपाली श्रमिक विदेसिएका छन् । वैदेशिक रोजगार विभागले सार्वजनिक गरेको विवरणअनुसार साउन महिनामा ५९ हजार ५७५ जना नेपाली नयाँ तथा पुनः श्रम स्वीकृति लिएर रोजगारीका लागि विभिन्न मुलुकमा गएका हुन् ।
विभागको तथ्यांकअनुसार साउनमा विदेसिने नेपालीहरुको संख्या गत आवको अन्तिम महिना असारको भन्दा केही वृद्धि भएको छ । असारमा ५८ हजार ७३६ जनाले वैदेशिक रोजगारीमा जान श्रम स्वीकृति लिएका थिए ।विभागको तथ्यांकअनुसार नेपाली युवाहरु ९३ वटा मुलुकमा श्रम स्वीकृति लिएर रोजगारीका लागि गएका छन् । गत आवको अन्तिमसम्म पहिलो गन्तव्यको रुपमा रहेको संयुक्त अरब इमिरेट्स (युएई)ले चालु आवको सुरुआती महिनामा पनि पहिलो स्थान ओगटेको छ ।
विभागको तथ्यांकअनुसार युएईमा जानका लागि १७ हजार ५४१ जनाले श्रम स्वीकृति लिएका छन् । गत आवको पहिलो महिना यो संख्या ११ हजार ८७८ थियो ।यस्तै साउन महिनामा रोजगारीका लागि साउदी अरेबिया जान ११ हजार ८०९ जनाले श्रम स्वीकृति लिएका छन् । संख्याको हिसावमा साउदी दोस्रो स्थानमा परेको छ । त्यसैगरी तेस्रो स्थानमा परेको कतारमा ११ हजार ७८५ जना श्रमिकले श्रम स्वीकृति लिएर रोजगारीका लागि पुगेको विभागले उल्लेख गरेको छ ।
गत आवदेखि नै साउदी र कतार जाने नेपालीको संख्या हाराहारीमा रहेको विभागको तथ्यांकले देखाएको छ । यस्तै चौथो गन्तव्यमा कुवेत रहेको छ । कुवेतका लागि चार हजार ६९५ जना रोजगारीका लागि पुगेका छन् । यस्तै युरोपेली मुलुक रोमानिया पाँचौं स्थानमा परेको छ । जहाँ साउन महिनामा दुई हजार २९८ जना गएका छन् ।यसअघि नेपालीहरुको प्रमुख गन्तव्यको रुपमा रहेको मलेसियामा भने नगन्य मात्रामा श्रमिकले श्रम स्वीकृति लिएका छन् । मलेसिया सरकारले गत मे अन्तिमबाट विदेशी कामदार लिन बन्देज गरेसँगै त्यहाँ जाने नेपालीको संख्या घट्दै आएको छ । साउनमा मलेसियाका लागि श्रम स्वीकृति लिने एक हजार ३४४ जनामात्रै रहेका छन् । विभागको तथ्यांकलाई हेर्दा उल्लिखित मुलुकहरुले नै नेपालको वैदेशिक रोजगारीको ठूलो हिस्सा (झण्डै ८० प्रतिशत बढी) ओगटेको देखिन्छ ।
यसैगरी जापान एक हजार ५७२, क्रोएसिया एक हजार १३८, माल्दिभ्स जान ८७८, बहराइन ७९०, साइप्रस ७००, मोरिसस ५८९, जोर्डनका लागि ५२० र ओमान जान ४९० जनाले श्रम स्वीकृति लिएका छन् । त्यस्तै साउन महिनामा इपिएस प्रणालीबाट दक्षिण कोरिया जाने नेपालीको संख्या ८१२ मात्रै रहेको छ । विभागबाट कूल श्रम स्वीकृति लिनेमध्ये पुनः श्रम स्वीकृति लिने २२ हजार ६४७ जना छन् । पहिलोपटक विदेश जान श्रम स्वीकृति लिनेको संख्या ३६ हजार ९२८ रहेको छ ।
चालु आवको पहिलो महिनामा श्रम स्वीकृति लिनेमध्ये आठ हजार १४५ जना महिला श्रमिक रहेको विभागले उल्लेख गरेको छ । साउन महिनामा वैदेशिक रोजगारीका लागि युरोपेली मुलुकमा जान श्रम स्वीकृति लिने नेपालीको संख्या घटेको विभागको तथ्यांकले देखाएको छ । यसरी श्रम स्वकिृति लिएर जानेहरुमा उच्च दक्षता भएकादेखि अदक्ष श्रमिक रहेको विभागले सार्वजनिक गरेको विवरणमा उल्लेख छ । साउन महिनामा उच्च दक्षता हासिल गरेका ८१ जना र पेसागत दक्षता भएका ३०९ जना नेपाली श्रम स्वीकृति लिएर रोजगारीका लागि विभिन्न मुलुकमा पुगेका छन् ।
वैदेशिक रोजगारीको क्रममा सबैभन्दा बढी दक्ष कामदार गएको विभागले जनाएको छ । यो संख्या ४२ हजार ६९४ रहेको छ । यस्तै अर्धदक्ष श्रमिकको रुपमा चार हजार ८०९ जना बाहिरिएका छन् भने ११ हजार ६८२ अदक्ष श्रमिक साउन महिनामा विदेसिएका छन् ।
धेरै श्रमिक गएका मुलुक
