काठमाडौं- पूर्व संस्कृति, पर्यटन तथा नागरिक उडड्यनमन्त्री एवं नेकपा माओवादी केन्द्रका नेता हितबहादुर तामाङ पुस्तक ‘राज्यको रुपान्तरण’ विमोचन गरिएको छ। तामाङद्वारा लेखिएको पुस्तक शनिबार काठमाडौंमा आयोजित एक कार्यक्रममा माओवादी केन्द्रका अध्यक्ष पुष्पकमल दाहालले विमोचन गरेका हुन्।
ताम्सालिङ नलेज सेन्टरले प्रकाशन गरेको पुस्तकमा तामाङले आफ्नो राजनीतिक जीवनका विभिन्न कालखण्ड मूख्यतः शान्ति प्रक्रिया र संविधान निर्माणको दौरानमा लेखिएका विविध लेख रचनाको संकलन समावेश गरिएको छ।
यस्तै राष्ट्रियताका मुद्दा र ताम्सालिङसँग सम्बन्धित विषयमा केन्द्रित भइ छलफल एवं मन्थन गरिएका विचारहरु पुस्तकमा समेटिएका छन्। २०३८ सालदेखि राजनीतिक यात्रा शुरु गरेका तामाङ २०५२ सालमा माओवादी जनयुद्धमा सामेल हुने क्रममा भारतमा पक्राउ परी जेल जीवन बताएका थिए।
विस्तृत शान्ति सम्झौतापछि जेल मुक्त भएर नेपाल फर्किएका तामाङ २०६२/०६३ को परिवर्तनपछि अन्तरिम व्यवस्थापिका संसदको सदस्य भइ २०६८ मा युवा तथा खेलकुद मन्त्री बनेका थिए।
हाल माओवादी केन्द्रका केन्द्रीय सदस्य उनी नुवाकोट क्षेत्र नम्बर १ बाट प्रतिनिधिसभा सदस्य हुन्। यसअघि उनले प्रचण्ड नेतृत्वको सरकारमा संस्कृति, पर्यटन तथा नागरिक उड्डयनमन्त्रीको जिम्मेवारी सम्हालेका थिए।
