मुलुकभर मनसुनजन्य विपद्सँगै दुर्घटनाको क्रम बढिरहेको छ । पछिल्ला दिनहरुमा देशका विभिन्न स्थानमा हरेक दिनजसो दुर्घटना भइरहेका छन् । ती दुर्घटनामा परी कयौंले ज्यान गुमाए । कयौं बेपत्ता छन् । घाइतेहरु कतिपय उपचारकै क्रममा छन् । तनहुँमा भारतीय पर्यटक बोकेको बस मस्र्याङ्दीमा खसेको घटना होस् या सिन्धुलीस्थित सुनकोशी नदीमा गाडी खसेको पछिल्लो घटनामा मृत्यु र बेपत्ता हुनु दुःखद हो । देशका अन्य भागमा पनि सवारी दुर्घटनाबाट जनधनको क्षति भएका समाचारहरु लगातार आइरहेका छन् ।
यति धेरै दुर्घटना भइरहँदा सरकारले न्यूनीकरणका लागि प्रभावकारी काम गर्न नसकेको प्रस्ट देखिन्छ । राजमार्गहरुमा पहिरो खसेर अवरोध सिर्जना हुँदा यात्रुहरुले सास्ती बेहोर्नुपरिरहेको छ । पहिरोले अवरुद्ध राजमार्ग तत्काल खुलाउन पनि सरकारले सकिरहेको छैन । पछिल्लोपटक नागढुंगा सडकमा खसेको पहिरो पन्छाउन चार घण्टाभन्दा बढी समय लागेको घटनाबाटै सरकारको तयारी कति फितलो छ भन्ने बुझ्न कठिन छैन ।
यता अविरल वर्षाका कारण गत जेठ २८ गतेदेखि देशका विभिन्न स्थानमा गएको बाढी, पहिरोलगायत विपद्मा परी आइतबार दिउँसोसम्म २०३ जनाको मृत्यु भएको तथ्यांक छ । बाढी पहिरोलगायत विपद्मा परी काठमाडौं उपत्यकामा तीन, कोशी प्रदेशमा २८, मधेस प्रदेशमा आठ, बागमती प्रदेशमा ४२, गण्डकी प्रदेशमा ५६, लुम्बिनी प्रदेशमा ३७, कर्णाली प्रदेशमा १३ र सुदूरपश्चिम प्रदेशमा १६ गरी २०३ जनाको मृत्यु भएको नेपाल प्रहरीले उपलब्ध गराएको तथ्यांकमा उल्लेख छ । बाढीपहिरोका कारण काठमाडौं उपत्यकामा ११, कोशी प्रदेशमा ३८, मधेस प्रदेशमा १२, बागमती प्रदेशमा २८, गण्डकी प्रदेशमा ४७, लुम्बिनी प्रदेशमा १९, कर्णाली प्रदेशमा ६२ र सुदूरपश्चिम प्रदेशमा ३४ गरी २५१ जना घाइते भएका छन् ।
बाढीपहिरोमा परी कोशी प्रदेशमा तीन, मधेस प्रदेशमा एक, बागमती प्रदेशमा ४५, गण्डकी प्रदेशमा दुई, लुम्बिनी प्रदेशमा एक, कर्णाली प्रदेशमा एक र सुदूरपश्चिम प्रदेशमा एक गरी ५४ जना बेपत्ता भएका छन् । बाढीका कारण आइतबार दिउँसोसम्म ४०८ घर डुबानमा परेका छन् । यस अवधिमा ९२४ पशुचौपायाको मृत्यु भएको छ । विपद्का घटनाबाट छ हजार ४४ परिवार विस्थापित भएका प्रहरीको तथ्यांकमा उल्लेख छ ।
दुर्घटना र विपद्जन्य घटनाबाट भइरहेको यस्तो क्षतिको न्यूनीकरणमा सरकार किन चुकिरहेको छ ? यो गम्भीर प्रश्न छ । जनता आफैं पनि यस्ता घटनाबाट जोगिन सतर्कता अपनाउनु जरुरी छ । अहिले जोखिमपूर्ण क्षेत्रमा बसोबास नगर्ने र अत्यावश्यकबाहेक टाढाको यात्रा नगर्नु नै उचित हुन्छ । दुर्घटना र विपद्बाट आफू जोगिऔं, अरुलाई पनि जोगाऔं ।
-1736657698.jpg)
