काठमाडौं– नेपाल वैदेशिक रोजगार व्यवसायी संघले अन्तर्राष्ट्रिय हवार्ई उडानको भाडादरमा अस्वाभाविक वृद्धि र कृत्रिम अभाव सिर्जना गरी बाध्यतावश विदेसिने नेपाली कामदारमाथि चर्को आर्थिक भार थोपरेको भन्दै आपत्ति जनाएको छ । वैदेशिक रोजगारीका मुख्य गन्तव्य मलेसियालगायत खाडी मुलुकहरुमा उडान भर्ने एयरलाइन्सहरुले एकतर्फीरुपमा हवार्ई भाडामा अस्वाभाविक वृद्धि गरेको भन्दै संघले विरोध जनाएको हो ।
संघले आइतबार एक विज्ञप्ति जारी गर्दै करिब छ महिना अगाडिदेखि नै सम्बन्धित निकायलाई ध्यानाकर्षण गराउँदासमेत समस्या समाधान नभई निरन्तर अन्तर्राष्ट्रिय हवार्ई भाडा बढिरहेकोप्रति विरोध गर्नुपरेको उल्लेख गरेको छ । संघले सम्बन्धित निकायले छानबिन गरी वास्तविक हवार्ई भाडा निर्धारण नगरे सम्पूर्ण व्यवसायीहरु टिकट काट्न बन्द गर्ने चेतावनीसमेत दिएको छ । नेपालबाट भन्दा लामो दूरी तय गर्नुपर्ने बंगलादेश, श्रीलंकाजस्ता देशहरुबाट सोही गन्तव्य पुग्न नेपालको भन्दा कम हवार्ई भाडा रहेको संघको भनाइ छ । छिमेकी मुलुक भारतबाट जानेले आधा मूल्यभन्दा कम हवार्ई भाडा तिर्ने गरेको संघले जनाएको छ ।
गन्तव्य मुलुकहरुबाट नेपाल आउँदा एकतिहाइभन्दा कम भाडामा नेपाल आइन्छ भने नेपालबाट सोही गन्तव्य जाँदा हवार्ई भाडा तीन गुणा बढी मूल्य तिर्नुपर्ने अवस्थाले नेपाली कामदार मारमा परेको संघका महासचिव मेघनाथ भुर्तेलले बताए । ‘सीमित ट्राभल एजेन्सीहरु, एयरलाइन्सहरु र त्यसलाई नियमन गर्ने निकायको मिलेमतोमा अस्वाभाविक हवार्ई भाडा बढेको त होइन भन्ने प्रश्न उब्जिएको छ,’ उनले भने । दैनिक १५ सयभन्दा बढी श्रमिक वैदेशिक रोजगारीमा जान बाध्य भइरहेको अवस्थामा उनीहरुलाई आर्थिक भारमा पर्न नदिन हवार्ई भाडामा गरिएको मनोमानीविरुद्ध छानबिन गरी न्यायोचित भाडदर निर्धारण गराउन पनि महासचिव भुर्तेलले सरकारसँग माग गरे ।
एक महिनाअघिसम्म २५ देखि ३० हजार रुपैयाँ गन्तव्य मुलुकको हवार्ई भाडा रहेकोमा अहिले कामदारले ६४ हजार रुपैयाँसम्म तिर्नुपरेको भुर्तेलको भनाइ छ । सोही गन्तव्यबाट नेपाल आउँदा अहिले पनि १८ हजारमा आइपुग्ने उनले बताए । ‘सरकारले विदेश जाने कामदारलाई सकभर कम खर्चमा पठाइनुपर्छ भने पनि हवार्ई भाडा वृद्धिमा मौन रहेको छ,’ महासचिव भुर्तेलले भने, ‘सम्बन्धित सबै निकायको ध्यानाकर्षण गराइसकेका छौं, कतैबाट सुनुवाइ गरिएको छैन ।’
