काठमाडौं– वैदेशिक रोजगार बोर्डको सचिवालयले ढिलोगरी गत आर्थिक वर्ष २०८०÷८१ को कार्यप्रगति विवरण सार्वजनिक गरेको छ । बोर्डले प्रगति विवरणमा वैदेशिक रोजगारीको क्रममा मृत्यु भएका कामदारको परिवारलाई आर्थिक सहायता उपलब्ध गराउनेदेखि श्रमाधान कल सेन्टर सञ्चालनसम्म उल्लेख गरेको छ ।
वैदेशिक रोजगारीको क्रममा एक वर्षमा मृत्यु भएका एक हजार ३४६ जनाका परिवारलाई ६९ करोड ९९ लाख पाँच हजार रुपैयाँ रुपैयाँ हस्तान्तरण गरेको बोर्डले जनाएको छ । बिरामी एवं अंगभंग भएका कामदारलाई स्वास्थ्य उपचार खर्चबापत १९ करोड ४६ लाख ८५ हजार रुपैयाँ र कामदारको परिवारको सदस्यलाई स्वास्थ्य उपचार खर्च एक करोड २२ लाख ६५ हजार रुपैयाँ प्रदान गरिएको बताइएको छ ।
यस्तै शवबहान सेवामा तीन करोड ४१ लाख ५८ हजार, विदेशमा अलपत्र शव नेपाल ल्याउन र समन्वय गर्न तीन करोड ७३ लाख १२ हजार, अलपत्र कामदारको उद्धार तथा समन्वयमा तीन लाख २० हजार रुपैयाँ खर्च भएको प्रगति विवरणमा उल्लेख गरिएको छ ।
यसैगरी वैदेशिक रोजगारीका लागि जाने महिलाहरुलाई दिइने पूर्वप्रस्थान अभिमुखीकरण तालिम (पिडिओटी)मा शोधभर्नाबापत १० लाख ९० हजार रुपैयाँ खर्च भएको बोर्डले जनाएको छ । वैदेशिक रोजगारबाट फर्किएका वा जान चाहने कामदारलाई लक्षित गरी १९ वटा संस्थासँग १३ वटा सीपमूलक तालिम सञ्चालन गरिएको र त्यसमा छ हजार १३ जनालाई एक महिने निःशुल्क सीप तालिम उपलब्ध गराइएको बोर्डको भनाइ छ ।
साथै, वैदेशिक रोजगारीको क्रममा मृत्यु तथा अंगभंग भएका कामदारको परिवारका बालबालिकाहरुको विवरण संकलन गरी दुई हजार २३३ जनालाई आर्थिक सहयोग भुक्तानी गरिएको उल्लेख छ । ती बालबालिकालाई भुक्तानी गरिएको रकम भन्ने खुलाइएको छैन । यस्तै वैदेशिक रोजगारीमा गएका कामदारका सन्ततीलाई प्रदान गरिने छात्रवृत्ति कार्यक्रमलाई प्रगतिको ‘माइलस्टोन’ (कोशेढुंगा) मानिएको छ । जसमा एक हजार ८७४ जनाले छात्रवृत्ति पाएका बोर्डले उल्लेख गरेको छ ।
बोर्डले श्रमाधान कल सेन्टर सञ्चालनलाई पनि प्रगति विवरणमा समेटेको छ । गत आर्थिक वर्षमा ८६ हजार ८४९ जना सेवाग्राहीलाई श्रम मन्त्रालय र मातहतका सबै निकायहरुसँग सम्बन्धित जिज्ञासा, गुनासा, सुझाव र उजुरीका सम्बन्धमा सेवा प्रदान गरिएको उल्लेख छ । यस्तै एक वर्षको अवधिमा रोजगारीका लागि विदेशमा रहेका तीन हजार ३१ जनाले स्वास्थ्य सेवासम्बन्धी टेलिमेडिसिन सेवा लिएको बताइएको छ । बोर्डको प्रगति विवरणमा धेरै संख्यामा नेपाली कामदार कार्यरत मुलुकमा स्वास्थ्य शिविर सञ्चालन गरेको पनि उल्लेख छ । छ वटा मुलुकमा स्वास्थ्य शिविर चलाइएको भनिए पनि कुन–कुन देश भनेर खुलाइएको छैन ।
बोर्डले विदेशी भूमिमा विभिन्न कारणले अप्ठ्यारोमा परेका, जेल सजाय पाएका नेपाली कामदारको कानुनी प्रतिरक्षा गरेको, विभिन्न नियोगहरुका सुरक्षित गृह सञ्चालनमासहयोग गरेको, नेपाली दूतावासहरुमा श्रमसँग सम्बन्धित जनसम्पर्क सहायक कर्मचारी व्यवस्थापन गरेको, वैदेशिक रोजगारीबाट फर्केका र वैदेशिक रोजगारीमा गएका कमदारको परिवारका सदस्य गरी एक हजारलाई सीप विकास तथा वित्त विकास तालिम दिएको, समय–समयमा अभिमुखीकरण तालिमप्रदाय संस्थाहरुसँग अन्तरक्रिया तथा छलफल गरेको, अभिमुखीकरण तालिम तथा मोबाइल एप निर्माण गरिएको, प्रशिक्षक प्रशिक्षण तालिम दिइएको र वैदेशिक रोजगारीमा गएका कामदारका परिवारसँग गरिएको भेटघाट तथा अन्तरक्रियालाई पनि प्रगति विवरणमा समेटेको छ ।
यस्तै वैदेशिक रोजगार सचेतना अभिवृद्धिका लागि श्रव्यदृष्य सामग्री उत्पादन तथा प्रसारण, स्थानीय तहमा वैदेशिक रोजगारसम्बन्धी नागरिक वडापत्र राख्ने, आप्रवासी कामदार दिवस मनाउने, मनोपरार्श सेवा सञ्चालन गर्ने, वैदेशिक रोजगारीबाट फर्किएका कामदारको स्वास्थ्य परीक्षण गराइएको, विदेशबाट फर्किएका तीन हजारलाई उद्यमशीलता विकास गर्न सीप विकास तालिम दिइएको, नयाँ तथा आकर्षक श्रम गन्तव्यको खोजीका लागि समिति गठन तथा परिचालन गरिएको, वित्तीय साक्षरतासम्बन्धी कार्यक्रम सञ्चालन भएको, वैदेशिक रोजगारसम्बन्धी मेला प्रदर्शनीमा भाग लिएकोलाई प्रगति विवरणमा उल्लेख छ ।
