मुलुकको खेलकुद क्षेत्र राजनीतिक दाउपेचको सिकार बन्नुपरेको छ । सधैं विवाद र अस्तव्यस्त खेलकुद क्षेत्रको विकास अहिलेसम्म नारामै सीमित हुँदै आएको छ । खेलकुद पूर्वाधार विकासमा होस् या खेलाडीको भविष्य सुनिश्चित गर्न सरकार असफल बनेको छ । त्यसैले अन्तर्राष्ट्रिय प्रतियोगिताहरुमा नेपालको प्रदर्शन निराशाजनक बन्दै आएको छ ।
राष्ट्रिय खेलकुदको महाकुम्भको रुपमा चिनिने प्रतियोगिता हो, राष्ट्रिय खेलकुद प्रतियोगिता । यो प्रतियोगिता राष्ट्रको गौरवको विषय बन्नुपर्ने हो । तर, नीतिमा गौरवकै रुपमा उल्लेख गरिए पनि व्यवहारमा प्रतियोगिता सधैं अस्तव्यस्त र फितलो बन्दै आएको छ । यसपटक प्रतियोगिता नै तोकिएको समयमा नहुने लगभग निश्चित भएको छ । कर्णालीमा आगामी मंसिर २–९ गतेसम्म हुने भनिएको १०औं राष्ट्रिय खेलकुद प्रतियोगिता अनिश्चित बनेको हो ।
प्रतियोगिता आउन अब दुई महिनामात्र बाँकी रहँदा युवा तथा खेलकुदमन्त्री तेजुलाल चौधरीले सोमबार मंसिरमा प्रतियोगिता नहुने बताएका हुन् । उनले फागुनसम्ममा प्रतियोगिता सञ्चालन हुने बताए ।दुई वर्षअघि नवौं राष्ट्रिय खेलकुद प्रतियोगिता गण्डकी प्रदेश कास्कीको पोखरामा सम्पन्न भएको थियो । उक्त प्रतियोगिता सम्पन्न भएसँगै १०औं राष्ट्रिय खेलकुद प्रतियोगिता गर्ने जिम्मा कर्णालीले लिएर फर्केको थियो ।
त्यसका लागि प्रदेश गौरवको आयोजनाका रूपमा लिइएको वीरेन्द्रनगर नगरपालिका–८ सुर्खेतमा बन्दै गरेको रंगशालाको काम अन्तिम चरणमा पुगेको छ । तर, अन्य पूर्वाधार निर्माण तोकिएको मितिसम्म तय नहुने अवस्थाका कारण प्रतियोगिता नै सार्न लागिएको हो । यसअघि कर्णाली प्रदेश सरकारका सामाजिक विकासमन्त्री भण्डारीका अनुसार खेलकुद प्रतियोगिताका लागि पूर्वाधार निर्माण कार्य तीव्ररूपले बढे पनि प्रतिकूल मौसमका कारण काममा ढिलाइ भएको बताएका थिए ।
समयमा पूर्वाधार तयार पार्न नसकेको सरकारले अहिले मौसमलाई कारण देखाउन थालेको छ । मन्त्री चौधरीले कर्णाली प्रदेशमा मंसिर, पुस र माघ महिनामा अत्यधिक जाडो हुने भएकाले उक्त प्रतियोगिता फागुन महिनामा गर्ने मन्त्रालयले योजना बनाएको बताए । चिसोको समयमा बसोबासकोसमेत समस्या हुने उनको भनाइ छ । यसरी प्रतियोगिता अनिश्चित बन्नुको कारण पूर्वाधार निर्माणमा भएको ढिलाइमात्र नभई राजनीतिक दाउपेच पनि देखिएको छ । यसअघि राष्ट्रिय खेलकुद परिषद् (राखेप)ले १०औं राष्ट्रिय खेलकुद प्रतियोगिता आगामी मंसिरमा आयोजना गर्ने घोषणा गरेको थियो । राखेपामा अहिले नेकपा माओवादी केन्द्रको तत्कालीन सरकारले नियुक्त गरेका पदाधिकारी छन् । जसले गर्दा पनि समस्या देखिएको छ ।
कारण जेसुकै भए पनि यो सरकार र राखेपाको लापारवाही भएको प्रस्ट छ । प्रतियोगिताको तयारीमा रहेका खेलाडीहरु निराश बन्नुपर्ने अवस्था सिर्जना गर्ने कार्य खेदजनक छ । मौसमलाई नै कारण मान्ने हो भने यसअघि किन यसमा ख्याल गरिएन ? यो गम्भीर प्रश्नको जवाफ सरकार र राखेपले दिनैपर्छ ।
