हिन्दू नेपालीहरुको मुख्य चाड दसैं आउन अब करिब दुई हप्ता बाँकी रहँदा बजारमा चहपहल बढ्दै गएको छ । उपत्यकामा रहेका विभिन्न जिल्लावासीहरु आफ्नो गाउँघर फर्कने तयारीमा छन् । दसैंको बेला सबैभन्दा धेरै मानिसले उपत्यका छाड्ने गरेका छन् । त्यसैले सार्वजनिक यातायातमा सिट पाउनै मुस्किल हुने गरेको छ । यही बेला टिकटमा कालोबजारीसमेत हुने गरेका छन् । सरकारले प्रत्येक वर्ष दसैंमा घर जानेहरुका लागि सहज यात्राको व्यवस्था गर्ने बताए पनि उही सास्ती सर्वसाधारणले भोग्दै आएका थिए । यस वर्षको व्यवस्थापन कस्तो रहने हो, हेर्न बाँकी नै छ ।
यहीबीच आगामी शनिबारदेखि चाडपर्वलाई लक्षित गरी सार्वजनिक यातायतको अग्रिम टिकट बुकिङ खुला गर्ने निर्णय सरोकारवालाहरुले गरेका छन् । यातायात व्यवस्था विभागको नेतृत्वमा मंगलबार बसेको बैठकले यस्तो निर्णय गरेको हो । यस वर्षको दसैं, तिहार र छठ पर्वमा काठमाडौं उपत्यकाबाहिर जाने र काठमाडौं उपत्यका प्रवेश गर्दा यात्रा सहज र सुरक्षित बनाउने सम्बन्धमा आयोजित बैठकमा भौतिक पूर्वाधार तथा यातायात मन्त्रालय, यातायात व्यवस्था विभाग, सडक विभाग, नेपाल प्रहरी, ट्राफिक प्रहरी, यातायात व्यवसायीलगायत सरोकार भएकाहरूको उपस्थिति रहेको थियो ।
बैठकमा चाडपर्वलाई लक्षित गरी यातायात व्यवस्थापनमा सहजता ल्याउन सार्वजनिक यातायात सेवा प्रदायकहरूले मध्यम तथा लामो दूरीका यातायातका लागि शनिबारदेखि अग्रिम टिकट बुकिङ खुला गर्ने निर्णय गरिएको विभागले जनाएको छ । बैठकले अग्रिम टिकट बुकिङ गर्दा यथाशक्य अनलाइनबाट समेत टिकट लिने गरी व्यवस्था मिलाइने निर्णय गरिएको बताइएको छ ।
अग्रिम टिकट बुकिङको यो निर्णय प्रभावकारीरुपमा कार्यान्वयन जरुरी छ । नाममात्रको अग्रिम बुकिङभन्दा पनि सेवाग्राहीलाई सहज बनाउन सरोकारवालाको ध्यान जाओस् । टिकटमा हुने कालोबजारीको कडा निगरानी गरी त्यस्तो कार्य भएको पाइए तत्काल कारबाही गरियोस् । टिकट बुकिङमात्रै होइन, सवारी व्यवस्थापन, सडक सुरक्षा र दुर्घटना न्यूनीकरणका लागि पनि प्रभावकारी योजना बनाई कार्यान्वयन गर्न जरुरी छ ।
यो वर्ष दसैंलगायत चाडपर्व मनाउन करिब १८ लाख मानिस उपत्यकाबाट बाहिरिने अनुमान काठमाडौं उपत्यका ट्राफिक प्रहरी कार्यालयको छ । त्यसैले यो वर्ष सवारी व्यवस्थापन थप चुनौतीपूर्ण हुने देखिन्छ । अर्कोतर्फ दसैंको बेलामा वर्षात् हुने सम्भावनासमेत रहेकोले राजमार्गहरुमा सास्ती बेहोर्नुपर्ने हुनसक्छ । यसतर्फ सरकार र सरोकारवाला सबैको ध्यान पुगोस् । चाडपर्वको मुखमा दुःखद घटना हुन नदिन सुरक्षाका सबै उपाय अवलम्बन गर्ने गरी तत्काल तयारी गरियोस् ।
