काठमाडौं– दक्षिण कोरियामा जान रोजगार अनुमति प्रणाली (इपिएस) अन्तर्गत भाषा तथा सीप परीक्षण उत्तीर्ण गरेका श्रमिकहरुको स्वास्थ्य परीक्षण स्थगित भएको छ । भारी वर्षाका कारण देशका अधिकांश भू–भागमा आएको बाढीपहिरोले यातायात आवागमन अवरुद्ध भएपछि स्वास्थ्य परीक्षण कार्य हाललाई स्थगित गरिएको वैदेशिक रोजगार विभागअन्तर्गतको इपिएस कोरिया शाखाले जानकारी दिएको छ ।
शाखाले आइतबार एक सूचना जारी गर्दै अब यातायातको सहज अवस्था भएपछि मात्रै स्वास्थ्य परीक्षण गराउन सकिने उल्लेख गरेको छ । शाखाले इपिएस भाषा परीक्षामार्फत उत्पादनमूलक क्षेत्रतर्फको दोस्रो चरणको कोरियन भाषा परीक्षा र सीप परीक्षणमा पास भएकालाई स्वास्थ्य परीक्षणका लागि असोज १४ गतेसम्मको समय दिइएको थियो । तर, बाढीपहिरोका कारण यातायातमा भएको समस्या सुधार र सुरक्षित नभएसम्म स्वास्थ्य परीक्षण नगराउने निर्णय गरिएको शाखाले जनाएको छ ।
अविरल वर्षाका कारण आएको बाढीपहिरोले ठाउँ–ठाउँमा बाटो अवरुद्ध भई जनजीवन प्रभावित भएकाले तोकिएको समयमा स्वास्थ्य परीक्षण गर्न नसकेकालाई यातायात सहज र सुरक्षित भएपछि स्वास्थ्य परीक्षण गराउँदा हुने बताइएको छ । यद्यपि, स्वास्थ्य परीक्षण कहिलेसम्म गरिसक्नुपर्ने भन्ने उल्लेख नगरेको शाखाले दसैंअघि नै गर्नुपर्ने संकेत गरेको छ । स्वास्थ्य परीक्षण कार्य सम्पन्न भएपछि दसैं बिदा सकेर अर्थात् यही असोज २९ पछिमात्रै रोजगार आवेदन फाराम इपिएस शाखाबाट एचआरडी कोरियाको सफ्टवेयरमा इन्ट्री गरी पठाउने शाखाले जनाएको छ ।
उत्पादनमूलक क्षेत्रतर्फको दोस्रो सिफ्टको कोरियन भाषा परीक्षा उत्तीर्ण गरेका आठ हजार ९३२ जनामध्ये आठ हजार १५१ जना सीप परीक्षणबाट छानिएका थिए । उनीहरुलाई असोज १४ गतेभित्र तोकिएको अस्पतालमा गएर स्वास्थ्य परीक्षण गराउन शाखाले गत ६ गते एक सूचना जारी गरेको थियो । यद्यपि, शाखाले बाढीपहिरोका कारण तोकिएको अस्पतालमा सम्पर्क गर्न नसकेका व्यक्तिहरुको सुरक्षालाई पहिलो प्राथमिकतामा राखेर स्वास्थ्य परीक्षण गर्ने कार्य पछि गराउन सकिने व्यवस्था गरेको बताएको छ ।
रोजगारीको आकर्षक गन्तव्य दक्षिण कोरियामा जिटुजी सम्झौताअनुसार सन् २००८ देखि इपिएस प्रणालीमार्फत सरकारले नेपाली कामदार पठाउँदै आएको । त्यसका लागि भाषा परीक्षा अनिवार्य उत्तीर्ण भएको हुनुपर्ने व्यवस्था छ । पछिल्लो समय भाषा परीक्षा उत्तीर्ण गरी सीप परीक्षणसमेत उत्तीर्ण भएकालाई मात्र कोरिया रोजगारीको रोस्टरमा राख्ने गरिएको शाखाले जनाएको छ ।
