काठमाडौं– वैदेशिक रोजगार विभागअन्तर्गतको इपिएस कोरिया शाखाले ‘रुट इन्डस्ट्री’ क्षेत्रमा रोजगारीका लागि दक्षिण कोरिया जान चाहनेहरुका लागि सञ्चालन गर्ने भाषा परीक्षाको मिति तय गरेको छ । शाखाले यही कात्तिक ९ गते (अक्टोबर २५) मा परीक्षा सञ्चालन गर्ने भएको हो ।
उक्त भाषा परीक्षाका लागि आवेदन दिएकाहरुको नामावाली र रोल नम्बर कोरियाको एचआरडी सेवाबाट प्राप्त भएसँगै परीक्षाको मिति सार्वजनिक गरिएको हो । इपिएस शाखाले शुक्रबार एक सूचना जारी गरी भाषा परीक्षामा सहभागीलाई तोकिएको मिति र समयमा अभिमुखीकरण समयभन्दा एक घण्टाअगाडि नै परीक्षा केन्द्रमा उपस्थित हुन आग्रह गरेको छ ।
‘निर्धारित मिति, समय र सेसनमा सक्कल राहदानी, रंगीन प्रवेशपत्रसहित उपस्थित हुन नसकेमा निजलाई कुनै पनि अवस्थामा परीक्षामा समावेश गराइने छैन,’ सूचनामा भनिएको छ । उक्त भाषा परीक्षा ललितपुरको भैँसेपाटीस्थित राष्ट्रिय व्यावसायिक प्रशिक्षण प्रतिष्ठानमा सञ्चालन हुने सूचनामा उल्लेख छ । परीक्षा हलभित्र मोबाइल फोन, पिडिए, विद्युतीय शब्दकोश, स्मार्ट वाचलगायतका अन्य विद्युतीय साधनहरु लैजान पूर्ण निषेध गरिने जानकारी गराइएको छ । ‘परीक्षामा चिट चोरेमा, कसैको कपी गरेको भेटिएमा परीक्षा रद्द गरी चार वर्षका लागि परीक्षामा समावेश हुन निषेध गरिने छ,’ शाखाद्वारा जारी सूचनामा उल्लेख छ ।
परीक्षा सञ्चालनका लागि तोकिएको समयभन्दा एक घण्टा अगाडि अभिमुखीकरण सुरु हुने र उक्त अभिमुखीकरणमा अनिवार्य उपस्थित हुनेपर्ने जनाइएको छ । साथै, परीक्षाको मितिभन्दा एक दिन अगावै आफ्नो सिफ्टअनुसार इपिएस शाखाको कार्यालयमा वायोमेट्रिक (फिंगर प्रिन्ट) दिनुपर्ने सूचनामा उल्लेख छ । परीक्षाको दिन फिंगर प्रिन्ट प्रमाणीकरण (भेरिफाई) गरिने हुँदा वायोमेट्रिक अनिवार्य हुने छ ।
नेपालीहरुको आकर्षक रोजगार गन्तव्य कोरियाले इपिएस प्रणालीमार्फत कामदार लगिरहेको छ । दुई देशका सरकारबीचभएको जिटुजी सम्झौताका आधारमा नेपाली कामदारले कोरियामा अवसर पाउँदै आएका छन् । कमाइको हिसाबले कोरिया आकर्षक गन्तव्य हो । कोरियाले पछिल्लो समय नेपाली कामदारको संख्या बढाउँदै लगेको छ ।
