काठमाडाैं - चेकजाँच गर्ने क्रममा रौतहटबाट काठमाडौंतर्फ आउदै गरेका एक युवा प्रतिबन्धित लागुऔषधसहित पक्राउ परेकाे प्रहरीले जनाएकाे छ । पक्राउ पर्नेमा रौतहट जिल्लाकाे गुजरा न.पा. वडा नं.३ बलुवा घर भई बस्ने वर्ष २० को नासिम शेख रहेका हुन् ।
मंगलबार काठमाडाैंकाे दक्षिणकाली नगरपालिका वडा नं.५ फर्पिङ चेकपोष्ट स्थित विभिन्न सवारी साधनहरु चेकजाँच गर्ने क्रममा रौतहटबाट काठमाडौंतर्फ आउदै गरेको ना १ ज १९१० नं. को टाटा सुमोको सिट नं.७ मा सवार रहेका हुन् ।
प्रहरीले नासिम शेखलाई शंका लागी चेकजाँच गर्दा निजले साथमा बोकेको कालो रंगको CAT लेखिएको झोला भित्र पोका बनाई पानीटेपले बेरी लुकाई छिपाई ल्याएको अवस्थामा निम्न परिमाणमा लागुऔषध फेला पारेकाे हाे ।
बरामद लागुऔषधहरुमा नुफिन ५९३ एम्पुल, फेनारगन ५०० एम्पुल, डाईजेपाम ६८८ एम्पुल गरी जम्मा १७८१ एम्पुल उनकाे साथबाट फेला पारिएकाे छ । प्रहरी वृत्त कीर्तिपुरबाट उक्त बरामद लागुऔषधलाई नियन्त्रणमा लिई थप अनुसन्धान भई रहेको प्रहरीले जनाएकाे छ ।
