बेइजिङ – चीनका राष्ट्रपति सी चिनफिङ मङ्गलबार चीनमा कोरोना भाइरसको महामारी फैलिएको सहर वुहान पुगेका छन् । उनले वुहानका वासिन्दा र सङ्क्रमण नियन्त्रणका लागि अग्रमोर्चामा रहेर काम गर्ने अधिकारीहरूसँग भेट गरेका छन् । विश्वलाई चीनमा नोभेल कोरोना भाइरस अर्थात् कोभिड–१९ नियन्त्रणमा आएको सन्देश प्रवाह गर्न मंगलबार उनले वुहान भ्रमण गरेको बताइएको छ । चिनियाँ सञ्चारमाध्यमहरुले कोरोनाको महामारीको रोकथाम र नियन्त्रणको अवस्थाबारे जानकारी लिन पनि राष्ट्रपति सी वुहान पुगेको जनाएका छन् । विश्व स्वास्थ्य संगठनद्वारा कोभिड–१९ नाम दिइएको उक्त भाइरसको सङ्क्रमणका कारण चीनमा मङ्गलबारसम्म तीन हजार १३६ जनाको मृत्यु भएको छ ।
राष्ट्रपति सीले प्रकोप रोकथाम तथा नियन्त्रण परीक्षण केन्द्र, ह्वो शन शान अस्पतालको निरीक्षण भ्रमणपछि प्रकोप नियन्त्रणका शिलशिलामा क्वारेन्टिनमा बसेका स्थानीयसँग पनि भेट गरी जानकारी लिएका थिए ।
उनले स्थानीय र अग्रपङ्तिका स्वास्थ्यकर्मी, सुरक्षाकर्मी, अन्य सरकारी कर्मचारी तथा स्वयंसेवक र संघसंस्थालाई प्रकोप नियन्त्रणका लागि गरेको पहलका लागि आभार व्यक्त गर्दै अस्पतालका सेवा सुविधा, विरामी र चिकित्सक तथा स्वास्थ्यकर्मीको अवस्था र वैज्ञानिक अनुसन्धान आदिको जानकारी लिई उपचाररत बिरामीप्रति सहानुभूति प्रकट गरे। उनले कोभिड–१९ विरुद्ध खटिएका चिकित्सक तथा स्वास्थ्यर्मीलाई हौसला दिँदै सबैले दृढविश्वासका साथ यो लडाइँ जित्नैपर्ने बताए ।
