काठमाडौं– वैदेशिक रोजगार विभागअन्तर्गतको इपिएस कोरिया शाखाले रोजगार अनुमति प्रणाली (इपिएस) मार्फत दक्षिण कोरियामा कामदार पठाउन सञ्चालन गरेको भाषा परीक्षामा सहभागीमध्ये करिब १० प्रतिशतमात्रै सफल हुने देखिएको छ ।
सन् २०२४ सुरु भएयता हालसम्म करिब एक लाख २५ हजारले उत्पादनमूलक क्षेत्रमा रोजगारीका लागि दक्षिण कोरिया जान भाषा परीक्षा दिइसकेका छन् । जसमा १३ हजार ९०४ जना उत्तीर्ण भएका छन् । बाँकी ३६ हजार परीक्षार्थीको परीक्षा सोमबारबाट सुरु हुँदै छ । परीक्षा दिने ३६ हजारबाट पनि २५ सयको हाराहारीमा मात्रै उत्तीर्ण हुने इपिएस शाखाले जनाएको छ । यसरी सन् २०२४ का लागि इपिएस शाखाले लिएको भाषा परीक्षामा उत्तीर्ण भएको संख्या र आगामी परीक्षामा उत्तीर्ण हुने संख्याको आधारमा १० प्रतिशतमात्रै परीक्षार्थी सफल हुने देखिएको हो ।
इपिएस शाखाको तथ्यांकअनुसार जनवरी २० बाट सुरु भएको पहिलो चरणको परीक्षामा सहभागी भएका ४८ हजारमध्ये पाँच हजार ७५३ जनामात्रै उत्तीर्ण भए भने मे महिनामा सुरु भएर जुलाई अन्तिममा सकिएको दोस्रो चरणको परीक्षामा सहभागी झण्डै ७९ हजारमध्ये आठ हजार १५१ जनामात्रै उत्तीर्ण भए । अब तेस्रो चरणको परीक्षामा दुई हजार ४९६ जनामात्रै उत्तीर्ण हुने भएका छन् । इपिएस शाखाले भाषा परीक्षाका लागि ठूलो संख्यामा आवेदन परेका कारण वर्षभरि लगाएर तीन चरणमा परीक्षा सञ्चालन गरेको छ ।
कोरियाले लैजाने कामदारको संख्या पहिले नै तोकेको हुन्छ । यस वर्ष नेपालको कोटाभन्दा १० गुणा बढीले भाषा परीक्षाका लागि आवेदन दिएका कारण झण्डै ९० प्रतिशत छनोटमा नपर्ने अवस्था छ ।
मैया कँडेल
निर्देशक, इपिएस कोरिया शाखा
यस वर्ष उत्पादनमूलक क्षेत्रमा जान आवेदन दिएका परीक्षार्थीहरुको संख्या ठूलो भएकाले परीक्षा सक्न वर्षभरि लाग्ने अवस्था सिर्जना भएको इपिएस शाखाले जनाएको छ । यस वर्ष एक लाख ६३ हजारले कोरिया रोजगारीका लागि आवेदन दिएका थिए । जसअन्तर्गत सञ्चालन भएका दुई चरणको परीक्षा सम्पन्न भइसकेको छ । तेस्रो अर्थात् अन्तिम चरणको परीक्षा यही नोभेम्बर ११ ट सुरु भएर डिसेम्बर १५ मा सकिने बताइएको छ ।
कोरियाले नेपालबाट वर्षभरिमा लैजाने कामदारको कोटा पहिले नै निर्धारण गर्ने भएकाले ठूलो संख्यामा परीक्षा दिए पनि सफल हुनेको संख्या थोरै हुने इपिएस कोरिया शाखाकी निर्देशक मैया कँडेलले बताइन् । ‘कोरिया लैजाने संख्या पहिले नै तोकेको हुन्छ,’ उनले भनिन्, ‘यस वर्ष नेपालको कोटाभन्दा १० गुणा बढीले भाषा परीक्षाका लागि आवेदन दिएका कारण झण्डै ९० प्रतिशत छनोटमा नपर्ने अवस्था आएको छ ।’ यस वर्ष कोरियाले उत्पादनमूलक क्षेत्रमा १५ हजारको कोटा तोके पनि पछि थप गरेर १६ हजार ४०० जना लैजानेगरी परीक्षा लिन इपिएस शाखालाई पत्राचार गरेको थियो ।
दक्षिण कोरियाले सबैभन्दा बढी अंक ल्याउनेहरुमध्येबाट आफूलाई आवश्यक कामदारमात्रै छनोट गरेका कारण पनि भाषा परीक्षामा सफल नहुनेको संख्या धेरै देखिएको बताइन्छ । आगामी वर्ष हुने भाषा परीक्षामा तोकिएको कोटाभन्दा तीन गुणा बढीलाई मात्रै परीक्षामा सहभागी गराउनेगरी व्यवस्था मिलाउन एचआरडी कोरियाले अहिले नै औपचारिक आग्रह गरिसकेको शाखाले जनाएको छ । कोरियाले इपिएस प्रणालीबाट नेपालसहित बंगलादेश, श्रीलंका, पाकिस्तान, कम्बोडिया, म्यान्मारलगायत १६ मुलुकबाट कामदार लैजाने गरेको छ । कोरियाले सन् २०२४ का लागि सबै मुलुकबाट एक लाख ६५ हजार कामदार आपूर्ति गर्नेगरी कोटा निर्धारण गरेको छ ।
कोरियाले पछिल्ला वर्षहरुमा सबैभन्दा धेरै कामदार नेपालबाट आपूर्ति गर्दै आएको छ । गत वर्ष इपिएस प्रणालीअन्तर्गत १९ हजार २१४ जना नेपाली कामदार रोजगारीका लागि कोरिया जान छनोट भएका थिए । त्यसअघि सन् २०२२ मा १४ हजार नेपालीले इपिएसमार्फत कोरियामा रोजगारी पाएका थिए । यस वर्ष पनि तोकिएको कोटाभन्दा बढी नै नेपालीले कोरियामा रोजगारी पाउने सम्भावना रहेको इपिएस शाखाका अधिकारीहरुको अपेक्षा रहेको छ । कोरियाले कृषि तथा पशुपालन र उत्पादनमूलक क्षेत्रका साथै शिप बिल्डिङ, रुट इन्डस्ट्री, फरेस्ट्री र सेवामूलक क्षेत्रमा पनि नेपाली कामदार लैजान थालेको छ ।
